މިއަހަރުގެ އޯލެވެލް އިމްތިހާނު ކާމިޔާބުކަމާއިއެކު ނިންމާލައިފި

މިއަހަރުގެ އޯލެވެލް އިމްތިހާނު ކާމިޔާބުކަމާއިއެކު އިއްޔެ ނިންމާލައިފިއެވެ. މެއި ޖޫންގެ އޯލެވެލް އިމްތިހާން ކުރިއަށްގެންގޮސްފައިވަނީ ކޯވިޑް-19ގެ ޙާލަތާއި ގުޅިގެން އަޅަންޖެހޭ ރައްކާތެރިކަމުގެ ފިޔަވަޅުތަކާ އެކުއެވެ. މިއަހަރުގެ އިމްތިހާނުގައި 5000 އަށްވުރެ ގިނަ ދަރިވަރުން ވަނީ ބައިވެރިވެފައެވެ.

މިއަހަރުގެ އިމްތިހާނު ބާއްވާފައިވަނީ މެއި 2 އިން ޖޫން 11 އަށެވެ. އިމްތިޙާނުގައި މާލެއާއި އަތޮޅުތަކުން ޖުމްލަ 5955 ދަރިވަރަކު ވަނީ ބައިވެރިވެފައެވެ. އޭގެ ތެރޭގައި ހިމެނެނީ މާލޭގެ ސްކޫލްތަކުން 2196 ދަރިވަރުންނާއި، އަތޮޅުތަކުގެ ސްކޫލްތަކުން 3759 ދަރިވަރުންނެވެ. މީގެތެރޭގައި އެސް.އެސް.ސީ އިމްތިޙާނުގައި ބައިވެރިވާ 225 ދަރިވަރުންވެސް ހިމެނެއެވެ. އޯލެވެލް އިމްތިޙާނު މިފަހަރު ކުރިޔަށްގެންގޮސްފައިވަނީ މާލޭގެ 22 ސެންޓަރަކާއި، އަތޮޅުތަކުގެ 213 ސެންޓަރެއްގައެވެ.

ކޯވިޑް-19ގެ މި ދަތި ވަގުތުގައި ދަރިވަރުންނާއި އެކުދިންގެ ބެލެނިވެރިން ދެއްކި ހިތްވަރާއި ކެތްތެރިކަމާއި އެޑިއުކޭޝަން މިނިސްޓްރީން ވަނީ ސާބަސް ދަންނަވާފައެވެ. އަދި މި އިމްތިޙާނުގެ ކަންކަން އިންތިޒާމުކޮށް ތަންފީޒު ކުރުމުގައި ޑިޕާޓްމަންޓް އޮފް ޕަބްލިކް އެގްޒަމިނޭޝަންސްގެ މުވައްޒަފުން ވެވަޑައިގެންނެވި ޤުރުބާނީ ފާހަގަކޮށް ޑީ.ޕީ.އީގެ މުވައްޒަފުންނަށްވެސް މިނިސްޓްރީން ވަނީ ޝުކުރު އަދާކުރައްވާފައެވެ.

އެކެޑެމިކް ކަލަންޑަރަށް ގެނެވުނު ބަދަލުތަކާއެކު މިއަހަރުގެ އޯލެވްލް އިމްތިޙާނު އެންމެ ފުރަތަމަ ފެށުމަށް ނިންމާފައި އޮތީ އޭޕްރީލް މަހުގެ ތެރޭގައެވެ. އެހެންނަމަވެސް އިމްތިޙާނުގެ ޓޭބަލް ބަދަލުކޮށް އިމްތިހާނު ފަށާފައިވަނީ މެއިމަހުގެ 2 ވަނަ ދުވަހުއެވެ. ފުރަތަމަ ކުރިއަށްގެންގޮސްފައިވަނީ އެސް.އެސް.ސީ އިމްތިޙާނެވެ.