ގާނޫނުލް އުގޫބާތަށް އިސްލާހު ގެނައުމުގެ ބިލާ ދެކޮޅަށް މާލޭ ސިޓީ ކައުންސިލްގެ ބަޔާނެއް

ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ގާނޫނުލް އުގޫބާތަށް އިސްލާހު ގެނައުމުގެ ބިލާ ދެކޮޅަށް މާލޭ ސިޓީ ކައުންސިލުން ބަޔާނެއް ނެރެފިއެވެ. އެ ބަޔާނުގައި ސޮއިކުރައްވާފައިވަނީ މާލޭގެ މޭޔަރު ޑރ. މުހައްމަދު މުއިއްޒު ހިމެނޭހެން މާލެ ސިޓީ ކައުންސިލްގައި ތިއްބެވި ޕީޕީއެމްގެ 13 މެންބަރުން އެކަންޏެވެ. ކައުންސިލްގައި ތިއްބެވި އެމްޑީޕީގެ ހަތް މެންބަރުން އެ ބަޔާނުގައި ސޮއިކުރައްވާފައެއް ނުވެއެވެ.

ސަރުކާރުގެ ފަރާތުން ޖުޑިޝަލް ސާވިސް ކޮމިޝަން (ޖޭއެސްސީ) ގެ ރައީސް އަދި ތުޅާދޫ ދާއިރާގެ މެންބަރު ހިސާން ހުސައިން ހުށަހެޅުއްވި އެ ބިލުގައި ވަނީ އާންމު ތަނެއްގައި މުސްލިމަކު ކާފަރު ކުރުމުގެ ތުހުމަތު ކުރުމަކީ ޖިނާއީ ކުށެއްގެ ގޮތުގައި ކަނޑައެޅުމަށެވެ.

advertisement

މާލެ ސިޓީ ކައުންސިލުން ނެރުނު ބަޔާނުގައި ފާހަގަކޮށްފައިވާ ގޮތުން، އެ ބިލު މިހާރު އޮތް ގޮތުން އިސްލާމް ދީނަށާއި މާތް ރަސޫލާއަށް ފުރައްސާރަ ކުރާ ފަރާތްތަކުން އެ ކުރާ އަމަލާ ދެކޮޅަށް ވާހަކަ ދެކެވޭ މީހުން ކުށްވެރިކޮށް އަދަބު ދިނުމަށް ޖާގަ ލިބިގެން ދާކަމަށެވެ.

އެހެންވެގެން މި ބިލަކީ ރާއްޖޭގެ ގާނޫނު އަސާސީއާއި ތައާރަޒުވާ އަދި ގާނޫނު އަސާސީއާ ޚިލާފު ބިލެއް ކަމުގައި ފެންނަ ކަމަށް މާލެ ސިޓީ ކައުންސިލްގެ ބަޔާނުގައިވެއެވެ.

މި ބިލު އެ އޮތް ގޮތަށް ފާސް ނުކުރަން ރައްޔިތުންގެ މަޖިލީހުގައި ތިއްބެވި މާލޭގެ ދާއިރާތައް ތަމްސީލް ކުރައްވާ މެންބަރުންނަށް މާލެ ސިޓީގެ ކައުންސިލަރުންގެ ފަރާތުން އިލްތިމާސް ކުރާ ކަމަށް އެ ބަޔާނުގައިވެއެވެ.