އެންމެ ކުޑަ އުޖޫރަ ކަނޑައެޅުމުގެ މަސައްކަތް ލަސްވަމުންދާތީ އެމްޓީޔޫސީން ކަންބޮޑުވުން ފާޅުކޮށްފި

އެންމެ ކުޑަ އުޖޫރަ ކަނޑައެޅުމުގެ މަސައްކަތް ލަސްވަމުންދާތީ މޯލްޑިވްސް ޓްރޭޑް ޔޫނިއަން ކޮންގްރެސް (އެމްޓީޔޫސީ) އިން ކަންބޮޑުވުން ފާޅުކޮށްފިއެވެ.

އެމްޓީޔޫސީއިން ނެރުނު ނޫސްބަޔާނެއްގައި ވިދާޅުވެފައިވަނީ ވަޒީފާއާއި ބެހޭ ޤާނޫނުގައި ވަޒީފާ އަދާކުރާ ފަރާތްތަކަށް އެންމެ ކުޑަމިނުން ދެވޭ މުސާރަ ކަނޑައެޅުމަށް ދައުލަތުގެ މައްޗަށް ލާޒިމްކޮށްފައިވާއިރު މިއަދާއި ހަމައަށްވެސް ތަފާތުއެކި ބަހަނާތަކާއިއެކު އެންމެ ކުޑަ އުޖޫރަ ކަނޑައެޅި ތަންފީޒު ކުރެވެމުންނުދާތީ ކަންބޮޑުވާކަމަށެވެ.

advertisement

މިނިމަމް ވޭޖްއަކީ މަސައްކަތްތެރިންގެ އިޖްތިމާއީ ރައްކާތެރިކަން ކަށަވަރުކުރުމަށާއި އަދި އިޤްތިޟާދީ ގޮތުން މަސައްކަތްތެރިން ބާރުވެރިކުރުވުމާއި މަސައްކަތްތެރިން އަޅުވެތިކަމާއި ނިކަމެތިކަމުން ސަލާމަތްކުރުމަށް މުހިންމު ކަމަކަށްވީއިރު މިނިމަމް ވޭޖް ކަނޑަނޭޅިދާ ކޮންމެ ދުވަހަކީ މަސައްކަތްތެރިންނާއި އެމީހުންގެ އާއިލާތަކަށް ވެވޭ ވަރަށް ބޮޑު ބޭއިންސާފެއްކަމަށް ވަނީ ބުނެފައެވެ.

2019 ވަނަ އަހަރު މިނިމަމް ވޭޖް ކަނޑައެޅުމަށްޓަކައި އެކުލަވާލެވުނު މުސާރައާއި އުޖޫރަ ކަނޑައެޅުމަށް ލަފާދޭ ބޯޑުން ވަނީ ދިރާސާކޮށް އިންޓަނޭޝަނަލް ލޭބަރ ސްޓޭންޑަޑްސްތަކާއި އެއްގޮތްވާ ގޮތުގެ މަތިން މިނިމަމް ވޭޖްގެ ގޮތުގައި ދެވޭނެ އަދަދުތައް ކަނޑައެޅުމަށް ސަރުކާރުން ވަނީ ހުށައަޅާފައެވެ. ނަމަވެސް 2021 ވަނަ އަހަރު ވަޒީފާއާއި ބެހޭ ޤާނޫނަށް އިސްލާހެއް ގެނެސް މިނިމަމް ވޭޖް ކަނޑައެޅުން ވަނީ ގަސްދުގައި ފަސްކޮށްފައިކަމަށް އެމްޓީޔޫސީގެ ބަޔާނުގައި ވަނީ ބުނެފައެވެ.

މިނިމަމް ވޭޖް ކަނޑައެޅުމަށް އަލަށް އެކުލަވާލާފައިވާ ބޯޑުން މިނިމަމް ވޭޖް ކަނޑައެޅުމުގެ މަސައްކަތްތައް ކުރަމުންދަނީ މަސައްކަތްތެރިންނަށް އެންމެ ފައިދާހުރި އަދި މިނިމަމް ވޭޖްއަކުން ލިބެންޖެހޭ ހަޤީޤީ މަންފާ ލިބިގެންދާނެ ގޮތަކަށް ނޫންކަމަށް އެ ޖަމިއްޔާއިން ދެކޭކަމަށް ބަޔާނުގައި ވަނީ ބުނެފައެވެ.