ކަރެކްޝަނަލް ސަރވިސްގެ 24 ވަނަ އަސާސީ ތަމްރީން ޕްރޮގްރާމްގެ ދަސްވެނިވުން ބާއްވައިފި

މޯލްޑިވްސް ކަރެކްޝަނަލް ސަރވިސް (އެސްސީއެސް)ގެ 24 ވަނަ އަސާސީ ތަމްރީން ދިނުމުގެ ކޯހުގެ ދަސްވެނިވުމުގެ ރަސްމިއްޔާތު ބާއްވައިފިއެވެ.

ކ. މާފުށީ ޖަލުގައި ބޭއްވި މި ރަސްމިއްޔާތު ޝަރަފްވެރިކޮށްދެއްވީ ސުޕްރިންޓެންޑެންޓް އޮފް ޕްރިޒަންސް މުޙައްމަދު ޝާހީން ޢަލީއެވެ.

advertisement

މޯލްޑިވްސް ކަރެކްޝަނަލް ސަރވިސްގެ 24 ވަނަ އަސާސީ ތަމްރީނު ކޯސް ފުރިހަމަކޮށް ކަރެކްޝަންސްއާ އަލަށް ގުޅިފައި ވަނީ ކޯހުގައި ބައިވެރިވި 25 މީހުންގެ ތެރެއިން 24 މީހެކެވެ.
މި ރަސްމިއްޔާތުގައި ވަނީ ކޯހުން އެކި ވަނަތައް ހޯދި ފަރާތްތަކަށް އިނާމުވެސް ހަވާލުކޮށްދީފައެވެ. އެގޮތުން މުޅި ކޯހުގެ އެންމެ ދުޅަހެޔޮ ސިއްހަތެއް ހުރި އޮފިސަރު ނުވަތަ “ފިޓެސްޓް” އޮފިސަރުކަމަށް ހޮވިފައިވަނީ ޕްރައިވެޓް ސަނީމް ޝަމާއިލްއެވެ. އަދި މުޅި ޕްރޮގްރާމްއިން އެއްވަނަ ކާމިޔާބުކޮށްފައިވަނީ ޕްރައިވެޓް އަޙްމަދު ނާއިލްކަންވެސް ފާހަގަކޮށްލެވެއެވެ.

މި ރަސްމިއްޔާތުގައި ދަސްވެނިންނަށް ސެޓްފިކެޓް ހަވާލުކޮށްދެއްވާފައިވަނީ މާފުށީ ޖަލުގެ ޑިރެކްޓަރ އޭއެސްޕީ އަޙްމަދު ޖާދުﷲ އާއި ޑެޕިއުޓީ ޑިރެކްޓަރ ޢަބްދުﷲ އަމީން އާއި އޭސްޕީ ޢަބްދުލް ޣަނީގެ އިތުރުން ސީޕީއޯ ޙުސެޢިން ރިޟްވާންއެވެ.

މި ކޯހަކީ އިންސްޓިޓިއުޓް ފޯރ ކަރެކްޝަނަލް ސްޓަޑީޒް އައިކޯސްޓްއިން މޯލްޑިވްސް ކަރެކްޝަނަލް ސަރވިސްގެ ޚިދުމަތާ ގުޅޭ ޕްރިޒަން އޮފިސަރުންނަށް ޖަލުތަކުގައި މަސައްކަތްކުރެވޭ ފެންވަރަށް ޢިލްމު އުގަންނައިދީ، ވަޒީފާގެ މާޙައުލަށް އަހުލުވެރިކޮށް، ތަމްރީނު ކުރުމަށް ހިންގާ ކޯހެކެވެ. ކޯހުގައި ބައިވެރިވާ އޮފިސަރުންނަކީ އަޚްލާޤު ރަނގަޅު، ސިފަވަންތަ ބަޔަކަށް ހެދުމާއި ޖަލުގެ ކަންކަން ހަރުދަނާކޮށް ތަޢުލީމީ ޒުވާނުންތަކަކަށް ހެދުމަކީވެސް މި ތަމްރީން ޕްރޮގްރާމްގެ އަމާޒެކެވެ.