ސީލައިފްއާއިއެކު ވެވުނު އެއްބަސްވުން ބާތިލުކުރީ އެއްބަސްވުމާއި ހިލާފުވުމުން – އެޗްޑީސީ

އެޗްޑީސީއާއި ސީލައިފް ގްލޯބަލް އިންކް އާއި ދެމެދު ވެވުނު އެއްބަސްވުން ބާތިލްކޮށްފައިވަނީ އެ ކުންފުނިން އެއްބަސްވުމާއި ހިލާފުވުމުގެ ސަބަބުންކަމަށް އެޗްޑީސީން ވިދާޅުވެއްޖެއެވެ.

ހުޅުމާލޭގައި އެޅުމަށް ހަމަޖެހުނު 3000 ހައުސިންގ ޔުނިޓްގެ މަޝްރޫޢު ހިންގުމާ ގުޅޭގޮތުން ހައުސިންގ ޑިވެލޮޕްމަންޓް ކޯޕަރޭޝަނާއި ސީލައިފް ގްލޯބަލް އިންކް ޕްރައިވެޓް ލިމިޓެޑާ ދެމެދު އެއްބަސްވުމުގައި ސޮއިކުރެވުނީ 2014 މާރިޗު 13 ވަނަ ދުވަހުއެވެ. ފިޔަވަހިތަކަކަށް ބަހާލައިގެން ކުރިޔަށް ގެންދިއުމަށް އެއްބަސްވެވުނު މި މަޝްރޫޢުގެ ފުރަތަމަ ފިޔަވަހީގެ ދަށުން އިމާރާތް ކުރުމަށް ކަނޑައެޅުނީ 1000 ހައުސިންގ ޔުނިޓް ގެ މަސައްކަތެވެ.

advertisement

އެޗްޑީސީން ބުނީ 2015 ވަނަ އަހަރުގެ ސެޕްޓެމްބަރ މަހު ސީލައިފް ގްލޯބަލްގެ ފަރާތުން އެއްބަސްވުމާ އެއްގޮތަށް ޢަމަލުކުރަމުން ނުގެންދިޔުމުގެ ސަބަބުން އެ އަސާސްގެ މައްޗަށް ބިނާކޮށް ހައުސިންގ ޑިވެލޮޕްމަންޓް ކޯޕަރޭޝަނުގެ ފަރާތުން އެއްބަސްވުން ބާޠިލުކުރިކަމަށެވެ. އެއާއެކު ސީލައިފް ގްލޯބަލްގެ ފަރާތުން ހުޅުމާލެ މެޖިސްޓްރޭޓް ކޯޓަށް އެ މައްސަލަ ހުށަހެޅުމުން އެ ކޯޓުން ނިންމީ ހައުސިންގ ޑިވެލޮޕްމަންޓް ކޯޕަރޭޝަނުގެ ފަރާތުން އެއްބަސްވުން ބާޠިލުކޮށްފައި ވަނީ، ފުރިހަމަ ކުރަންޖެހޭ އިޖުރާއަތްތަށް ފުރިހަމަނުކޮށް ކަމަށްވުމުން، އެއްބަސްވުން އަނބުރާ އިޢާދަކުރުމަށެވެ. އެހެންކަމުން ހައުސިންގ ޑިވެލޮޕްމަންޓް ކޯޕަރޭޝަންގެ ފަރާތުން އެއްބަސްވުން އަލުން އިޢާދަކޮށް އެއްބަސްވުމުގައި ބަޔާންކޮށްފައިވާ މުއްދަތުތައް އަލުން ދިނުމާއެކު މަޝްރޫޢު ކުރިޔަށް ގެންގޮސް ނިންމާލުމުގެ ފުރުޞަތު ސީލައިފް ގްލޯބަލްއަށް ދެވުނުކަމަށްވެސް އެޗްޑީސީން ވަނީ ވިދާޅުވެފައެވެ. އެހެންނަމަވެސް މި ފުރުޞަތުގައި ވެސް ސީލައިފް ގްލޯބަލްގެ ފަރާތުން އެއްބަސްވުމުގައި ބަޔާންކޮށްފައިވާ ކަންކަން ނުކޮށް އެއްބަސްވުމާ ޚިލާފުވުމުގެ ސަބަބުން 2018 އޮކްޓޫބަރު 25 ވަނަ ދުވަހުގައި އެއްބަސްވުން ވަނީ އަނެއްކާވެސް ބާޠިލްކުރެވިފައިކަމަށް އެޗްޑީސީން ސާފުކޮށްދެވިއެވެ.

އެޗްޑީސީން އަންގަވަނީ ސީލައިފް ގްލޯބަލްގެ ފަރާތުން އެ ކޯޕަރޭޝަނަށް އޮޅުވާލައިގެން ނާޖާއިޒު ފައިދާއެއް ހޯދުމުގެ މަޤްޞަދުގައި ބައިނަލްއަޤްވާމީ ބޭންކެއްގެ ނަންމަތީގައި ފޯޖު ކުރެވިފައިވާ ޕާފޯމަންސް ގެރެންޓީއެއް އެ ކޯޕަރޭޝަނަށް ހުށަހަޅާފައިކަން އެ ބޭންކުންއެޗްޑީސީއަށް އަންގަވާފައިވާކަމަށެވެ.

މި މައްސަލަ މޯލްޑިވްސް ޕޮލިސް ސަރވިސް އިން ތަހުޤީޤު ކުރުމަށްފަހު ޕްރޮސެކިއުޓަރ ޖެނެރަލް ގެ އޮފީހުން ވަނީ ޝަރީއަތަށް ހުށަހަޅާފައެވެ. އަދި، ސީލައިފް ގްލޯބަލްގެ ފަރާތުން އެއްބަސްވުމާ ޚިލާފަށް އެތައް ބައެއްގެ އަތުން ބުކިންގ ފީގެ އިތުރުން ންޓުގެ ގޮތުގައި ގިނަ އަދަދެއްގެ ފައިސާ މަކަރާއި ހީލަތުން ނަގައި އެ ފަރާތްތަކަށް އެ ފައިސާ ހަވާލުނުކޮށްގެން، އެ މުޢާމަލާތާ ގުޅިގެން ބަދަލު ހޯދުމަށް އެދި އެ ކޯޕަރޭޝަނަށް ހުށަހެޅި 395 މީހުންނަށް މި ކޯޕަރޭޝަނުން ބަދަލު ހަމަޖެއްސުމަށްޓަކައި ހޭދަކުރަންޖެހުނު ފައިސާ އަނބުރާ ހޯދުމަށް އެދި ސީލައިފް ގްލޯބަލް އިންކް ޕްރައިވެޓް ލިމިޓެޑްގެ މައްޗަށާއި، އެ ކުންފުނީގެ ޑިރެކްޓަރުންނާއި، ޙިއްޞާދާރުންގެ މައްޗަށް އެ ކޯޕަރޭޝަނުން ވާނީ ދަޢުވާކޮށްފައިކަމަށެވެ.

މި މަޝްރޫޢުއަކީ ދިވެހި އެތައް ރައްޔިތުންގެ މަޞްލަޙަތާއި ގުޅިފައިވާ މަޝްރޫޢަކަށްވާތީ، އެޗްޑީސީން ވާނީ މި
މަޝްރޫޢު ކުރިއަށް ގެންދަން ސީލައިފް ގްލޯބަލްއަށް އެކި ފަހަރު މަތިން އެކި ފުރުޞަތުދީފައެވެ. ނަމަވެސް ސީލައިފް ގްލޯބަލްއަށް ދެވުނު ހުރިހާ ފުރުޞަތެއްގައި ވެސް އެފަރާތް ވަނީ މި މަޝްރޫޢު ހިންގުމަށް ނުކުޅެދިފައިކަމަށް އެޗްޑީސީން ވިދާޅުވިއެވެ.