އިޒްރޭލާއި ރާއްޖެއާއިދެމެދު ސީދާ ދަތުރު ބާއްވަން ނިންމާފައެއް ނުވޭ – ޓްރާންސްޕޯޓް މިނިސްޓްރީ

ދިވެހިރާއްޖެ އާއި އިޒްރޭލާއި ދެމެދު ވައިގެ ސީދާ ދަތުރުތައް ބޭއްވުމަށް ނިންމާފައިވާކަމަށް ބުނެ ދައްކަމުންދަނީ ހަޤީޤަތާއި ޙީލާފް ވާހަކަތަކެއްކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ހާމަކޮށްފިއެވެ.

ޓްރާންސްޕޯޓް މިނިސްޓްރީން މިކަމާއި ގުޅޭގޮތުން ނެރުނު ނޫސް ބަޔާނުގައި ބުނީ ރާއްޖެއާއި އިޒްރޭލާއި ދެމެދު ވައިގެ ދަތުރުފަތުރު ކުރުމާއި ގުޅޭ ގޮތުން މިހާތަނަށް އެއްވެސް ވަރަކަށް މަޝްވަރާކުރެވި އަދި ދަތުރު ކުރުމަށް އެއްވެސް އެއަރލައިނަކަށް ހުއްދަ ދީފައިވެސް ނުވާކަމަށެވެ. އަދި ވައިގެ ދަތުރުފަތުރުގެ ޙިދުމަތް ދިނުމާއި ގުޅޭ އެއްވެސް އެއްވަސްވުމެއްގައި ސޮއިކޮށްފައިވާ ނުވާ ކަމަށާއި ދިވެހި ސަރުކާރުން މިފަދަ ހުއްދައެއް ދިނުމަށް ވިސްނާފައިވެސް ނުވާކަމަށް ޓްރާންސްޕޯޓް މިނިސްޓްރީގެ ބަޔާނުގައިވެއެވެ.

advertisement

ރާއްޖެއާއި އިސްރާއީލާއި ދެމެދު ސިޔާސީ އެއްވެސް ގުޅުމެއް ނޯންނައިރު، އިސްރާއީލުގެ އުފެއްދުންތައްވެސް ރާއްޖެ އެތެރެކުރުން ސަރުކާރުން އޮންނަނީ މަނާކޮށްފައެވެ. މީގެއިތުރުން ފަލަސްތީނު ރައްޔިތުންނާއި ދެކޮޅަށް އިސްރާއީލުން ހިންގަމުންދާ ލާއިންސާނީ ޖަރީމާތަކާއި ދެކޮޅަށް ރާއްޖެއިން އަންނަނީ ބައިނަލްއަޤްވާމީ ޕްލެޓްފޯމްތަކުގައި ހުއްޓުމެއްނެތި އަޑު އުފުލައި، ވަކާލާތުކުރަމުންނެވެ.

ރާއްޖެއާއި އިޒްރާއީލާއި ދެމެދު ސީދާ ދަތުރު ފެށުމަށް ހަމަޖެހިފައިވާކަމުގެ ވާހަކަ ފެތުރެންފެށީ އިސްރާއީލުގެ ބައެއް މީޑިއާތަކުން މިގޮތައް ރިޕޯޓްކުރުމާއި ގުޅިގެނެވެ.