ބޭނުންވަގުތަކު ދިރާގު ކަސްޓަމަރުންނަށް މިހާރު ރީލޯޑް ކުރެވޭނެ

ދިރާގު މޯބައިލް އެޕްލިކޭޝަނާއި ދިރާގު ޕޭ އަދި ވެބްސައިޓު މެދުވެރިކޮށް، ބޭނުން ވަގުތަކު ރީލޯޑު ކުރެވޭނެ ގޮތްތަކެއް ދިރާގު ޕްރިޕެއިޑް ކަސްޓަމަރުންނަށް އެ ކުންފުނިން ހަމަޖައްސައިދީފި އެވެ.
ދިރާގުން ބުނީ މި ބަދަލު ގެނައީ ކޮވިޑް-19 ފެތުރެމުންދާ މި ނާޒުކް ދުވަސްވަރު އެ ކުންފުނީގެ ކަސްޓަމަރުން ގޭގައި ތިބެގެން ހިދުމަތް ހޯދުމަށް ބާރު އެޅުމުގެ ގޮތުން ކަމަށެވެ.

ދިރާގު މޯބައިލް އެޕްލިކޭޝަން މެދުވެރިކޮށް، ރީލޯޑު ކުރަން ބޭނުންވާ ކަސްޓަމަރުންނަށް އެ އެޕްލިކޭޝަންގައި ހިމެނޭ “އީޒީ ޓޮޕްއަޕް” ބައިން ބޭނުން އަދަދަކަށް ރީލޯޑު ކުރެވޭނެ އެވެ. މިގޮތަށް ރީލޯޑު ކުރުމަށް ދިރާގު ޕޭ ނުވަތަ ބީއެމްއެލް ނުވަތަ އެމްއައިބީގެ ޑެބިޓް ނޫނީ ކްރެޑިޓްކާޑު ބޭނުންކޮށްގެން ފައިސާ ދެއްކޭނެ އެވެ.

advertisement

ދިރާގު ޕޭ މެދުވެރިކޮށް ރީލޯޑު ކުރަން ބޭނުންވާ ކަސްޓަމަރުންނަށް އެ އެޕްލިކޭޝަނަށް ވަދެ “ރީލޯޑް މައި މޯބައިލް” ނުވަތަ “ރީލޯޑް އަނަދާ” ހިޔާރު ކުރުމަށް ފަހު ބޭނުންވާ ނަންބަރު ޖަހައި ފައިސާ ދެއްކުމުން ރީލޯޑު ކުރެވޭނެ އެވެ. ދިރާގު ޕޭ ވޮލެޓަށް ކޭޝް އިން ކޮށްގެން ފައިސާ ދެއްކޭނެ އެވެ.

އެ ކުންފުނީގެ ވެބްސައިޓު މެދުވެރިކޮށް ރީލޯޑު ކުރަން ބޭނުންވާ ކަސްޓަމަރުންނަށް ވެބްސައިޓުގެ ހޯމް ޕޭޖުގައިވާ “އީޒީ ޓޮޕްއަޕް” ހިޔާރުކޮށް، ބޭނުންވާ އަދަދު ޖަހައި ފައިސާ ދެއްކުމުން ރީލޯޑު ކުރެވޭނެ އެވެ. ވެބްސައިޓު މެދުވެރިކޮށް ރީލޯޑު ކުރުމަށް ފަހު ދިރާގު ޕޭ ނުވަތަ ބީއެމްއެލް ނުވަތަ އެމްއައިބީގެ ޑެބިޓް ނޫނީ ކްރެޑިޓްކާޑު ބޭނުންކޮށްގެން ފައިސާ ދެއްކޭނެ އެވެ.

ދިރާގުން ވަނީ މި ދުވަސްވަރު އެ ކުންފުނީގެ ހުރިހާ ހިދުމަތެއް ވެސް އޮންލައިންކޮށް ހޯދުމަށް އެދިފަ އެވެ. އެކަމަށް ބާރު އެޅުމުގެ ގޮތުން ކަސްޓަމަރުންގެ ޑިޖިޓަލް ތަޖުރިބާ އިތުރަށް ފުރިހަމަ ކޮށްދިނުމަށް މަސައްކަތް ކުރާނެ ކަމަށް ވެސް އެ ކުންފުނިން ބުންޏެވެ.