ހިޔާ ޓަވަރުތައް އަޅަން ހަވާލުކުރީ އެ މަޝްރޫއަށް ކުރިމަތިލީ ކުންފުނިތަކުގެ ތެރެއިން އެއް ބިލިއަން ރުފިޔާ ބޮޑުކޮށް ހުށަހެޅި ކުންފުޏަށް

މި ސަރުކާރުން ކުރިއަށް ގެންދާ މަޝްރޫއުގެ ތެރެއިން ތިން ކޮޓަރީގެ ފްލެޓްތައް އަޅަނީ ފިނިޝިން މަސައްކަތްތައް ހިމެނޭ ގޮތަށް ޔުނިޓެއް 62،000-66،000 ޑޮލަރާ ދެމެދުގެ އަގަކަށް ކަމަށް ރައީސް އޮފީހުން ހާމަކޮށްފިއެވެ. މި އަދަދަކި ހިޔާ މަޝްރޫއުގެ ދެ ކޮޓަރީގެ ފްލެޓްތަކުގެ ޔުނިޓަކަށް ފިނިޝިންގ އާއި ނުލައި ގާތްގަނޑަކަށް ޖެހޭ އަގެވެ.

ރައީސް އޮފީހާއި އެޗްޑީސީ ގުޅިގެން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ މި ސަރުކާރުން ތިން ކޮޓަަރީގެ ފްލެޓް އަޅަނީ ފިނިޝިން މަސައްކަތް ވެސް ހިމަނައިގެން ކަމަށެވެ. އެކަމަކު ހިޔާ މަޝްރޫއުގައި ދެ ކޮޓަރީ ފްލެޓްތައް ހިމެނޭއިރު އެތަން ވެސް އަޅަން ހަވާލުކޮށްފައިވަނީ އެންމެ ބޮޑު އަގު ހުށަހެޅި ކުންފުންޏަށް ކަމަށާއި، އަދި ކުރީ ސަރުކާރުން ހިޔާ ފްލެޓް އަޅަން ހަވާލުކުރީ ތިން ކޮޓަރީގެ އެޕާޓްމަންޓް ހެދުމަށްދާ އަގުގަައި އެތެރޭގެ އެއްވެސް މަސައްކަތެއް ނުހިމަނާކަމަށް އޭނާ ވިދާޅުވި އެވެ.

advertisement

ހިޔާ މަޝްރޫއުގެ ފްލެޓް އަޅަން ހަވާލުކުރި ކުންފުންޏަކީ އެ މަޝްރޫއު ހިންގުމަށް ޝައުގުވެރިވެރިކަން ފާޅުކޮށް ބިޑް ހުށަހެޅި ކުންފުނިތަކުގެ ތެރެއިން އެއް ބިލިއަން ރުފިޔާ އަގު ބޮޑުކޮށް ހުށަހެޅި ކުންފުންޏެވެ.

އެ މަޝްރޫއު ހިންގުމަށް ހަވާލުކުރި ކުންފުނި ފިޔަވައި އެހެން ހުރިހާ ކުންފުންޏަކުން ވެސް ޕްރޮޕޯސަލް އަގުކޮށްފައި ވަނީ ޔުނިޓެއް 50،000 ޑޮލަރު (771،000ރ.) އާއި 52،000 ޑޮލަރު (801،840ރ.) އާ ދެމެދުގަ އެވެ.

ހިޔާ މަޝްރޫއުގެ ޔުނިޓުތަކަށް ކަނޑައަޅާފައިވާ ކުލި އަގުތައް ބަދަލުކުރަން ޖެހުނީ ކުރީ ސަރުކާރުގެ ހައުސިން މިނިސްޓްރީން ހިސާބު ކުރުމުގައި ހަދާފައިވާ ގޯސްތަކެއްގެ ސަބަބުން ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ވަނީ ހާމަކުރައްވާފައެވެ.

ހިޔާ ފްލެޓްތަކުގެ އަގުގެ މައްސަލައިގައި ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި އަގުތައް ކަނޑައެޅި ގޮތުގެ މައުލޫމާތު ދެއްވަމުން އެޗްޑީސީގެ ޗީފް ފައިނޭންޝަލް އޮފިސާ އަހުމަދު ޝާމް ވިދާޅުވީ ކުރިން އަގުތައް ކަނޑައަޅާފައި އޮތީ އާންމުކޮށް މަހަކު ދައްކަންޖެހޭ އަދަދު ނުވަތަ އީއެމްއައި ކަނޑައެޅުމުގައި ގެންގުޅޭ ބެސްޓް ޕްރެކްޓިސް އަދި އުސޫލުތަކާ ހިލާފަށް ކަމަށެވެ.