ރިޕޯޓް: ހޯމްސްޓޭ މެދުވެރިކޮށް ޓޫރިޒަމްގެ ފައިދާ އެންމެ ނިކަމެތިންނަށް

މީހުން ދިރިއުޅޭ ރަށްރަށުގައި ގެސްޓް ހައުސްތައް ހެދުމުގެ ވާހަކަ ދައްކަން ފެށުމުން ވަރަށް ގިނަ ބަޔަކު އެކަމާ ކަންބޮޑުވެ ދެކޮޅަށް އަޑު އުފުލިއެވެ. އޭގެ ސަބަބުން ދިވެހިންގެ އާދަކާދަތަކަށް ބުރޫއަރާނެ ވާހަކަ އާއި ދީނާ ހިލާފް ކަންކަން މުޖުތަމައުގެ ތެރެއަށް ވަދެ އިސްލާމްދީން ރާއްޖެއިން ފުހެވިގެންގޮސް ރަލުގެ ކޯރުތަކުން ރާއްޖޭގެ ރަށްރަށް ފުރިގެންދާނެކަށާއި މިހެން ގޮސް ނުކިޔާކަށް އެއްޗެއް ނެތެވެ. އެ ވާހަކަ ދެއްކި މީހުންނަކީ ދީނާދުރު ބަޔަކަށް ވެސް ހެދިއެވެ. ނަމަވެސް އެމްޑީޕީގެ ސަރުކާރުގައި ރައީސް މުހައްމަދު ނަޝީދުގެ ވެރިކަމުގައި ގެސްޓް ހައުސް ޓުއަރިޒަމްގެ ގަވާއިދު ހަދައި ހުއްދަދިނުމާއެކު މަންޒަރު ބަދަލުވިއެވެ. އެކަން ވެގެން ދިޔައީ އެތައް ގޮތަކުން އާންމު މީހާގެ ދިރިއުޅުމަށް ގިނަގުނަ އެތައް ފައިދާތަކެއް ލިބިގެންދިޔަ ކަމަކަށެވެ. މިއަދު 100 އަށް ވުރެ ގިނަ ރަށެއްގައި ކާމިޔާބު ކަމާ އެކުގައި ޓުއަރިޒަމް އިންޑަސްޓްރީގެ ބޮޑު ހިއްސާއަކަށް ގެސްޓް ހައުސް ވިޔަފާރި ވެއްޖެއެވެ.

އެމްޑީޕީގެ މެނިފެސްޓޯގެ ތެރެއިން އަނެއްކާވެސް “ހޯމްސްޓޭ” ފަދަ އާ ވިޔަފާރިއެއްގެ ވާހަކަ ދެއްކުމުން ވެސް ވަކި ބަޔަކު ވަނީ އެކަމާ ކަންބޮޑުވެ ހާސްބޮޑުވެފައެވެ. “ހޯމް ސްޓޭ” ނުވަތަ އަމިއްލަ ގޭގައި ޓުއަރިސްޓް މީހާ އަށް ހުރެވޭނެ ގޮތަށް ފުރުސަތު ހުޅުވާލުމުގެ ވާހަކަ މިހާރު ވެސް ބައެއް މީހުންނަށް ހަޖަމްކުރަން ދައްޗެވެ. މިހާރު ވެސް ދައްކަނީ ގެސްޓް ހައުސް ވިޔަފާރިއާ ބެހޭ ގޮތުން ވެސް ދައްކާ ވާހަކަތަކެވެ. ގޭތެރޭގައި ބަނގުރާ ކެންޓީނުތައް އުފެދޭނެ ވާހަކައެވެ. ދީނާ ދުރު އާދަތައް ދިވެހިންނަށް ދަސްވެ އިސްލާމްދީން ނެތިގޮސް ޓުއަރިޒަމް ނެތިގެން ހިނގައިދާނެ ވާހަކައެވެ. އަދި ހިތާމަޔަކީ މިކަމުގައި ގެސްޓްހައުސް އެސޯސިއަނުން އަމިއްލަ ވިޔަފާރީގެ މަސްލަހަތު އިސްކޮށް ހޯމްސްޓޭ އާ ދެކޮޅަށް އިސްކޮށް ހަރަކާތްތެރިވާކަމެވެ.

advertisement

މިއީ އާ ވާހަކައެއް ނޫނެވެ. ގެސްޓް ހައުސްގެ ވިޔަފާރި ތައާރަފްކުރަން އުޅުމުން ވެސް ދެއްކީ މި ވާހަކަތަކެވެ. ނަމަވެސް ހަގީގަތަކީ މިކަންކަން ދިވެހިންނަށް ދަސްކޮށްދެނީ ނުވަތަ މުޖުތަމައުގައި ފަތުރަމުން ގެންދަނީ ޓުއަރިސްޓުން ނޫން ކަމެވެ. ދިވެހިންގެ ތެރޭގައި ހުރި ނުބައި އާދަތައް ދިވެހިންނާ ހަމައަށް ފޯރީ ރަށްރަށުގެ ގެސްޓް ހައުސްތަކަކުން ނޫނެވެ. މަސްތުވާ ތަކެތި ބޭނުންކުރުމާއި، ކުޑަކުދިންނަށް ޖިންސީ ގޯނާކުރުމާއި، ވައްކަންކުރުމާއި، ކުޑަކުދިންނާއި ކައިވެނިކުރުން ފަދަ ކަންކަމަކީ ޓުއަރިސްޓުން ދަސްކޮށްދިން ކަންކަން ހެއްޔެވެ؟ އަނެއްކޮޅުން ޓުއަރިސްޓުންނަކީ ހަމައެކަނި ޣައިރު ދީނުގެ މީހުން އެކަންޏެއް ނޫނެވެ. މުސްލިމް އެތައް ބަޔަކު ވެސް ޓުއަރިސްޓުންގެ ގޮތުގައި ކޮންމެ އަހަރަކު ރާއްޖެ އާދެއެވެ. ހޯމްސްޓޭ މިއީ ދުނިޔޭގައި އަލަށް ކުރާ ކަމެއް ވެސް ނޫނެވެ. މެލޭޝިއާ އަދި އިންޑޮނޭޝިއާ ފަދަ އިސްލާމީ އެތައް ގައުމެއްގައި ވެސް މި ވިޔަފާރި މިހާރު ވަރަށް ފުޅާކޮށް ހެޔޮ ގޮތުގައި ކުރިއަށް ވެސް އެބަ ދެއެވެ.

އިސްލާމިކް ޓުއަރިޒަމް ރާއްޖޭގައި ޕްރޮމޯޓްކުރެއްވުމަށް ގިނަ މަސައްކަތްތަކެއް ކުރައްވަމުންު އަންނަ ފަރާތަކުން ވިދާޅުވީ ޓުއަރިޒަމަކީ ހަމައެކަނި ރަލާއި އޫރު މަސް ނުވަތަ ހަށި ވިއްކުން ނޫން ކަމަށާއި އެފަދަ ކަންކަމާ ނުލައި ވެސް ދުނިޔޭގެ ވަރަށް ގިނަ ގައުމުތަކެއްގައި ޓުއަރިޒަމް ޕްރޮޑަކްޓްތައް ކާމިޔާބުކަމާ އެކު ވިއްކަމުން އަންނަ ކަމަށެވެ. ބެލްޖިއަމް އާއި ކެނެޑާ އަދި ޖަރުމަނީ ފަދަ ތަންތަން ބައްލަވައި ތަޖުރިބާކުރެއްވި ކަމަށާއި ރާއްޖޭގައި ވެސް އެކަން ކުރެވޭނެ ކަމަށާއި، އަދި ރާއްޖޭގެ ޓުއަރިޒަމް ދާއިރާގައި މަސައްކަތްކުރަނީ ވަރަށް ޕްރޮފެޝަނަލް ތަރުތީބު ރަނގަޅު ހެޔޮ މީހުން ކަންވެސް ފާހަގަކުރައްވިއެވެ.

ހޯމް ސްޓޭގެ ވާހަކަ ދައްކަން މިއީ ވަރަށް ރަނގަޅު ވަގުތެކެވެ. ރައްޔިތުންގެ މަޖިލީހަށް އެމްޑީޕީން ކެމްޕެއިންކުރި އިރު އެޖެންޑާ 19ގެ ގޮތުގައި ރައްޔިތުންނަށް ހުށަހެޅި ކަންކަމުގެ ތެރެއިން ފާހަގަކޮށްލެވޭ އެއް ކަމަކީ “ހޯމް ސްޓޭ” އެވެ. އެ ވިޔަފާރިއާ ބެހޭ ގޮތުން އައްޑޫ މީދޫ ދާއިރާގެ މެންބަރު ރޮޒައިނާ އާދަމް އޭރު ވިދާޅުވެފައި ވަނީ މިއީ އާމްދަނީ ހޯދޭނެ އިތުރު މަގެއް ކަމަށެވެ. “މިހާރު އޮތް ގޮތުން ވިއްޔާ ގެސްޓްހައުސް ގަވާއިދުގައި މި އޮންނަނީ ގެސްޓްހައުސްއެއް ހިންގޭނީ ތިން ކޮޓަރި މަދުވެގެން ހުރެގެން، ހަ އެނދު ހުރެގެން ކަމަށް. އެހެން ނަމަވެސް އަޅުގަނޑުމެން މިހާރު ހޯމް ސްޓޭ މި ތައާރަފް ކުރަނީ. ގޭގައި މި އިންނަނީ އެންމެ ކޮޓަރިއެއް، ގެސްޓުންނަށް ކުއްޔަށް ދެވޭނެ،” ރޮޒަައިނާ އޭރު ވިދާޅުވެފައި ވެއެވެ.

އެޖެންޑާ19ގައި ހިމެނިފައިވީ ނަމަވެސް މިހާތަނާ ޖެހެންދެން ވެސް “ހޯމް ސްޓޭ” ވިޔަފާރި ތައާރަފްކުރުން އޮތީ މަޑުޖެހިފައެވެ. މިއަހަރު ބޭއްވި ލޯކަލް ކައުންސިލްގެ ކެމްޕެއިންގެ ތެރެއިން ކ. ގުރައިދޫގައި އެމްޑީޕީން ބޭއްވި ހަރަކާތެއްގެ ތެރޭގައި “ހޯމް ސްޓޭ”އާ ބެހޭ ގޮތުން ރައްޔިތުންނަށް ގިނަ މައުލޫމާތުތަކެއް ފޯރުކޮށްދީފައި ވެއެވެ. އެ ދުވަހު އެ ވާހަކަ ދެއްކެވީ “ހޯމް ސްޓޭ” ވިޔަފާރި ޕްރޮމޯޓްކުރެއްވުމަށް ވަރަށް ގިނަ މަސައްކަތްތަކެއް ކުރައްވަމުން އަންނަ އަބްދުﷲ ރަޝީދު (އައިސީ)އެވެ. އައިސީ ވަނީ އެކަމާ ބެހޭ ފޮތެއް ވެސް ނެރުއްވައި ފުވައްމުލަކުގައި އެ ވިޔަފާރި ފުޅާކުރެވޭނެ ގޮތްތަކާ ބެހޭ ގޮތުން ވެސް ވާހަކަ ދައްކަވާފައެވެ. އައިސީ ވިދާޅުވެފައިވާ ގޮތުން މިއީ ރާއްޖެ ފަދަ ޖަޒޒީރާ ގައުމެއްގައި ރައްޔިތުން ބާރުވެރިވެ، ރަށު އިޤްތިސާދެއް އުފެއްދުމަށް އުއްމީދީ ބަދަލެކެވެ. އަދި ދަހިވެތިކަމާއި ބައްކުރުމުގެ ޖަޒްބާތުދޫކޮށްލުމަށާއި ޓޫރިޒަމްގެ ފައިދާ ނިކަމެތިންނަށް ހިއްސާކުރުމަށް އެއްބާރުލުން ދެއްވުން އެދި ގެސްޓުހައުސް އެސޯސިއޭސަނުން ނެރުނު ބަޔާނަށް ރައްދުދެއްވައި ނެރުއްވި ބަޔާނެއްގައި އައިސީ ވަނީ އިލްތިމާސްކުރައްވާފައެވެ.

މި ސަރުކާރުގެ މެނިފެސްޓޯގައި “ހޯމް ސްޓޭ” ހިމެނިފައިވީ ނަމަވެސް އެކަން ތައާރަފްކުރުމާއި އެކަމަށް މަގުފަހިކުރުމަށް ގާނޫނާއި ގަވާއިދަތަކަށް ގެންނަންޖެހޭ ބަދަލުތައް ގެނައުމުގެ މަސައްކަތް އެކަށީގެންވާ ގޮތެއްގައި މިހާތަނަށް ކުރެވިފައެއް ނުވެއެވެ. އެކަން ފަސްވުމުގައި ކޮވިޑްގެ ހާލަތަކީ ވެސް އެއް ސަބަބެވެ. މީގެ އިތުރުން ވެސް ބައެއް ފަރާތްތަކުން މިކަމަށް ހުރަސް އެޅުމަށް ސަރުކާރަށް ފިއްތުންތައް ކުރިމަތިކުރުވާ ކަމަށް ވެއެވެ. ހިތާމައަކީ އޭގެ ތެރޭގައި ގެސްޓް ހައުސްގެ ވިޔަފާރި މިހާރު ކުރަމުން އަންނަ ބައެއް ފަރާތްތައް ވެސް ހިމެނޭ ކަމެކެވެ. ހަމަ އެ ވާހަކަތައް މިހާރު “ހޯމް ސްޓޭ”އާ ބެހޭ ގޮތުން މިފަދަ ފަރާތްތަކުން ދެއްކުމަކީ ތާކުންތާކު ޖެހޭ ކަމެއް ނޫނެވެ.

ކޮވިޑްގެ މިހާލަތުން އަރައިގަތުމަށް ކުރާ މަސައްކަތާ އެކު އިގްތިސާދު ކޮޅަށްޖެހުމަށް އެންމެ މުހިންމު އެއްކަމަކީ އާންމު މީހާ އަށް އާމްދަނީ ލިބޭނެ މަގުތައް ތަނަވަސްކުރުމެވެ. އެ ގޮތުން “ހޯމް ސްޓޭ” ވިޔަފާރި ހުޅުވާލުމަކީ މިކަމަށް ހުޅުވާލެވޭ އިތުރު ދޮރެކެވެ. އަނެއްކޮޅުން ރާއްޖޭގެ ޓުއަރިޒަމް ވިޔަފާރި އަށް އަންނަ އަހަރު 50 އަހަރު ފުރުން ފާހަގަކުރާ އިރު މިއީ ކޮންމެހެން ކުރަންޖެހޭ ކަމެކެވެ. ހާއްސަކޮށް ސަބަބަކީ “ހޯމް ސްޓޭ” ވިޔަފާރި ހުޅުވާލެވިއްޖެ ނަމަ ޓޫރިޒަމްގެ މަންފާ އެންމެނަށް ލިބި އެތައް ބަޔަކަށް އޭގެ މަންފާކުރާނެ ކަމެވެ. ހޯމްސްޓޭ ވިޔަފާރިއާއެކު 100 މިލިއަން ޑޮލަރުގެ އާމްދަނީއެއް ކޮންމެ އަހަރަކު ސީދާ ރައްޔިތުންނަށް ލިބިގެންދާނެކަމަށް މިދާއިރާގެ ތަޖުރިބާކާރުން އަންދާޒާކުރައްވައެވެ. މިއީ ކޮންމެހެންކުރަންޖެހޭ ނުކޮށް ދޫކޮށްލާވަރުގެ ކަމެއް ނޫނެވެ. އެންމެ އާދައިގެ ރައްޔިތުންނަށް ފައިދާކުރާނެ ހުރިހާކަމެއްވެސް ވީހާވެސް އަވަސްކުރަންވީއެވެ. މިހާރުން މިހާރަށް ފަށާންވީއެވެ.