ސޯލަރ ހަކަތައިގެ ނިޒާމު ޤާއިމުކުރުމަށް 61 ކުންފުންޏަކުން ޝައުގުވެރިކަން ފާޅުކޮށްފި

ރާއްޖޭގެ އެންމެ އާބާދީބޮޑު 6 ސަރަހައްދެއްގައި ސޯލަރ ހަކަތައިގެ ނިޒާމު ޤާއިމުކުރުމަށް ހުޅުވާލުމުން 61 ކުންފުންޏަކުން ޝައުގުވެރިކަން ފާޅުކޮށްފައި ވާކަމަށް މިނިސްޓްރީ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލޮޖީން ވިދާޅުވެއްޖެއެވެ. ރާއްޖޭގެ 6 ސަރަޙައްދެއްގައި 11 މެގަވޮޓްގެ ސޯލަރ ހަކަތައިގެ ނިޒާމު ޤާއިމުކުރުމަށް ވަނީ ހަމަޖެހިފައެވެ.

ހަކަތައިގެ މި މަޝްރޫޢަކީ ވޯލްޑް ބޭންކާ ގުޅިގެން ހިންގާ “އެކްސެލެރޭޓިންގް ސަސްޓެއިނަބަލް ޕްރައިވެޓް އިންވެސްޓްމަންޓް އިން ރިނިއުބަލް އެނަރޖީ” އެސްޕަޔަރ ޕްރޮޖެކްޓްގެ ދަށުން ކުރިއަށްގެންދާ މަސައްކަތެކެވެ. މި މަޝްރޫޢުގެ ޢަމަލީ މަސައްކަތް ރަށްރަށުގަ ފަށާނީ އަންނަ އަހަރުގެ ކުރީކޮޅުއެވެ. މި 61 ކުންފުނީގެ ތެރެއިން 34 ކުންފުންޏަކުން ވަނީ ޕްރީ ކޮލިފިކޭޝަން ހުށައަޅާފައެވެ. މިނިސްޓްރީއިން ވިދާޅުވީ ބަލަންޖެހޭ މިންގަނޑުތަކަށް ބެލުމަށްފަހު 12 ކުންފުންޏަކަށް ބިޑް ހުށައެޅުމަށް ފުރުޞަތު ދީފައިވާކަމަށެވެ.

advertisement

އަވިން ހަކަތަ އުފައްދާ ނިޒާމު ޤާއިމުކުރާ ރަށްތަކުގެ ތެރޭގައި ހިމެނެނީ އައްޑޫ ސިޓީ ހުޅުދޫ އަދި މީދޫ، ފުވައްމުލައް ސިޓީ، ކުޅުދުއްފުށި ސިޓީ، ގދ.ތިނަދޫ، ބ.އޭދަފުށި އަދި ޅ.ހިންނަވަރެވެ.

މަސައްކަތް ކުރިއަށްގެންދިއުމަށް ޝަރުޠު ހަމަވި ކުންފުނިތަކުން އޮކްޓޯބަރުމަހުގެ 14ގެ ކުރިން ބީލަން ހުށައަޅަން ޖެހޭނެއެވެ.