މިސްކް – ކޯވިޑްޖެހޭ ކުޑަކުދިންނަށް ޖެހޭ ބައްޔެއް، ރާއްޖެއިންވެސް ފެނިއްޖެ!

ރާއްޖޭގައި ކޯވިޑް ޖެހުނު ބައެއް ކުޑަކުދިންގެ ގައިން މަލްޓިސިސްޓަމް އިންފްލެމޭޓަރީ ސިންޑްރޯމް އިން ޗިލްޑްރެން “މިސްކް” ފެނިފައިވާ ކަމަށް ކުޑަކުދިންގެ ޚާއްސަ ޑޮކްޓަރ ޑރ.އަޙްމަދު ފައިސަލް ވިދާޅުވެއްޖެއެވެ.
ފުރާނައަށް ނުރައްކާވާ މިބަލީގައި ބޮޑުވާރުވާ ކުދިންގެ ސިކުނޑިއާއި ކިޑްނީއާއި ލޮލާއި ހިތް ފަދަ ގުނަވަންތައް ބަލީގެ ސަބަބުން ދުޅަވެ ނުރައްކާތެރި ޙާލަތަށް ކުއްޖާ ދާކަމަށް ސިއްޙީ މާހިރުން ވިދާޅުވެއެވެ.

މިސްކަކީ ކޯވިޑުގެ ސަބަބުން ޖެހޭ ނުރައްކާތެރި ބައްޔެކެވެ. މިބަލީގެ ސަބަބުން ގަދަޔަށް ބަނޑުގައި ރިއްސުމާއި، ލޭގެ ޕްރެޝަރ ދައްވުންފަދަ ސިއްޙީ މައްސަލަތަކާ ކުރިމަތިލާން ޖެހެއެވެ. އަދި ކިޑްނީއާއި ސިކުނޑިއަށް ވެސް ބަލީގެ ސަބަބުން އަސަރުކުރާކަމަށް ފައިސަލް ވިދާޅުވިއެވެ.

advertisement

ކޯވިޑް ބަލިޖެހުމަށްފަހު 2 ހަފްތާފަހުންވެސް މިބަލީގެ އަލާމާތްތައް ފެންނަން ފަށައެވެ. އެގޮތުން ގަދަޔަށް ކަރުގައި ރިއްސުމާއި، އުކުޅުވަޅަށް ތަދުވުމާއި، 39-40 ޑިގްރީއަށް ހުން ގަދަވުމާއި، ބޭރަށް ހިންގުން ފަދަ އަލާމާތްތައް ބަލީގެ ކުރީކޮޅު ފެންނަމުންދާ ކަމަށް ފައިސަލް ވިދާޅުވިއެވެ.

މީގެ އިތުރުން އަތާއިފައި އަދި ހަށިގަނޑު ރަތްވުން، އަތާއިފައި ދުޅަވުން، އަތާއިފައިން ހަންފޮޅުން، އެކިވައްތަރުގެ ބިހިތައް ނެގުން، ލޮލުގަ މަޑުނުލާ ލޯ ރަތްވުން، ކަރުގައި ގޮށްލުން އަދި ދުލާއި ތުންފަތާއި ކަރު ރަތްވުން ފަދަ އަލާމާތްތައް ހިމެނޭ ކަމަށް އޭނާ ވިދާޅުވިއެވެ.

މިސްކަކީ ކޯވިޑް ބަލި ތަޙައްމަލް ކުރަމުންދާ ކުދިންނާއި ބަލިން ރަނގަޅުވާ ކުދިންނަށް ވެސް ޖެހޭ ބައްޔެކެވެ. އަދި ކޯވިޑް ބަލިން ރަނގަޅުވާތާ 2 ހަފްތާ ފަހުން ވެސް މިބަލި ބައެއް ކުދިންގެ ގައިން ފެންނަ ކަމަށް ރެކޯޑް ކުރެވިފައިވާކަމަށް ފައިސަލް ވިދާޅުވިއެވެ. މިބަލި އާއްމުކޮށް ޖެހެނީ އުމުރުން 10 އަހަރާއި 11 އަހަރުން ދަށުގެ ކުދިންނަށެވެ. ނަމަވެސް އެހެންނިހެން އުމުރުފުރާތަކުގެ ކުދިންނަށް ވެސް ބަލިޖެހުން ގާތްކަމަށް އޭނާ ވިދާޅުވިއެވެ.

މިހާތަނަށް ރާއްޖެއިން ތިން އަހަރާއި ދިހަ އަހަރާއި ދެމެދުގެ އުމުރުފުރާގެ ހަތް ކުއްޖަކަށް މިބަލިޖެހިފައިވާކަމަށެވެ. ގިނައިން މިބަލީގެ އަސަރު ފެނިފައިވަނީ މާލޭ ސަރައްޙައްދަށް ނިސްބަތްވާ ކުދިންނަށް ނަމަވެސް އަތޮޅުތެރެއިންވެސް ބަލީގެ އަލާމާތް ފެނުނު ކުއްޖަކަށް ދަނީ ފަރުވާދެމުންނެވެ.