ބޭރުގައި ދިރިއުޅޭ ދިވެހިން އެހީތެރިކަން ބޭނުންވެއްޖެނަމަ އެކަން ކޮށްދޭނެ – މިނިސްޓަރ ޝާހިދު

ރާއްޖެއިން ބޭރުގައި ދިރިއުޅޭ ދިވެހިންނަށް ދިވެހި ސަރުކާރުގެ ފަރާތުން އެހީތެރިކަން ބޭނުންވާ ކޮންމެ ހާލަތެއްގައިވެސް އެ އެހީތެރިކަން ފޯރުކޮށްދެއްވާނެ ކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.

ފޮރިން މިނިސްޓަރ މިހެން ވިދާޅުވީ، އދ.ގެ އާއްމު މަޖިލީހުގެ ރިޔާސަތަށް އިންތިޚާބުވުމާ ގުޅިގެން، އޮސްޓްރޭލިއާގައި ދިރިއުޅެމުންދާ ދިވެހިން ބޭއްވި ޚާއްސަ ރަސްމިއްޔާތެއްގައި ވަރޗުއަލްކޮށް ބައިވެރިވެވަޑައިގެން ދެއްކެވި ވާހަކަފުޅުގައެވެ. އޮސްޓްރޭލިއާގައި ބޭއްވި މި ރަސްމިއްޔާތުގައި އެގައުމުގައި ދިރިއުޅޭ އަދި ތަޢުލީމް ހާސިލްކުރަމުންދާ ގިނަ އަދަދެއްގެ ދިވެހިން ބައިވެރިވިއެވެ.

advertisement

ވެސްޓަރން އޮސްޓްރޭލިއާގެ ޕާތުގައި ބޭއްވި މި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ޝާހިދު ވަނީ ރާއްޖެއިން ބޭރުގައި އެކި ބޭނުންތަކަށް ދިރިއުޅޭ ދިވެހިންނަށް ދިވެހި ސަރުކާރުގެ ފަރާތުން އެހީތެރިކަން ބޭނުންވާ ކޮންމެ ހާލަތެއްގައިވެސް އެ އެހީތެރިކަން ފޯރުކޮށްދޭނެކަމުގެ ޔަޤީންކަން ދެއްވާފައެވެ. ކޯވިޑްގެ މި ދަތި އުނދަގޫ ދަނޑިވަޅުގައިވެސް ދިވެހި ސަރުކާރާއިއެކު މަސައްކަތް ކުރެއްވުމަށް އެމަނިކުފާނު ވަނީ އެދިވަޑައިގަނެފައެވެ.

މި ރަސްމިއްޔާތުގައި ވާހަކަދައްކަވަމުން ރާއްޖެއަށް އާއްމު މަޖިލީހުގެ ރިޔާސަތު ކާމިޔާބު ކުރެވުމަކީ ބައިނަލްއަޤްވާމީ ދުނިޔެއިން ރާއްޖޭގެ ޚާރިޖީ ސިޔާސަތު ބަލައިގެންފައިވާކަމުގެ ހެއްކެއްކަމަށް މިނިސްޓަރ ވަނީ ވިދާޅުވެފައެވެ. މީގެ ސަބަބުން ކުދި ޤައުމުތަކަށް ބައިނަލްއަޤްވާމީ މައިދާނުގައި އަދާކުރެވިދާނެ ރޯލު ފެނިގެން ހިނގައްޖެކަމަށާއި، މިއީ ރާއްޖެއަށް ކުދި ޖަޒީރާ ޤައުމުތަކުގެ ފަރާތުން ލީޑަރޝިޕް ދައްކަން ލިބުނު ފުރުޞަތެއް ކަމަށް މިނިސްޓަރ ޝާހިދު ވިދާޅުވިއެވެ.