18 އަހަރު ނުފުރޭ ކުދިންގެ ރެކޯޑް އަމިއްލަ ފަރާތްތަކަށް ދޫނުކުރާނެ – ޖުޑީޝަލް އެޑްމިނިސްޓްރޭޝަން

18 އަހަރު ނުފުރޭ ކުދިންގެ ރެކޯޑު އަމިއްލަ ފަރާތްތަކަށް ދޫނުކުރާނެކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ބުނެފިއެވެ.

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ބުނީ އެކިއެކި ކަންކަމާއި ގުޅިގެން ދައުލަތުގެ އިދާރާތަކުންނާއި އަމިއްލަ ފަރާތްތަކުން، ޢުމުރުން 18 އަހަރު ނުފުރޭ ކުދިންގެ ރެކޯޑު ސާފުކުރުމަށް އެ ޑިޕާޓްމަންޓަށް ހުށަހަޅަމުން ގެންދާކަމަށެވެ. ކުޑަކުދިން ކުރާ ކުށްތަކުގެ ރެކޯޑު ބަލަހައްޓަންވާނީ ސިއްރުގޮތުގައި އަދި ތިންވަނަ ފަރާތަކަށް ނުލިބޭ ގޮތަށް ކަމަށާއި، އެފަދަ ރެކޯޑުތަކަށް ވާޞިލްވެވޭނީ ކޯޓު އަމުރަކުން ހުއްދަލިބިގެން ކުއްޖާގެ މައްސަލަ ބަލާ ފަރާތަށާއި ކަނޑައެޅިގެން އެކަމަށް ހުއްދަކުރެވޭ އެހެން ފަރާތަކަށް ކަމަށް ކުޑަކުދިންގެ ޢަދުލުގެ ޤާނޫނގައި ބަޔާންކޮށްފައި ވާތީ، އާއި އެއްވެސް މީހެއްގެ މައްޗަށް އުފުލޭ ދަޢުވާއެއްގައި، އޭނާގެ ކުޑައިރުގެ ރެކޯޑު ބޭނުންކޮށްގެން ނުވާނެކަމަށް ޤާނޫނުގައި ބަޔާން ކޮށްފައިވާތީ، 18 އަހަރު ނުފުރޭ ކުދިންގެ ރެކޯޑު އަމިއްލަ ފަރާތްތަކަށް މި ޑިޕާޓްމަންޓުން ދޫކުރާ ގޮތަށް ހަމަޖެހިފައި ނުވާ ކަމަށް ވަނީ ބުނެފައެވެ.

advertisement

ނަމަވެސް، 18 އަހަރު ފުރުމުގެ ކުރިން ކުޑަކުއްޖަކު ކޮށްފައިވާ ކުށަކާ ގުޅިގެން ޖުވެނައިލް ކޯޓުން ކޮށްފައިވާ ޙުކުމެއް، ނުވަތަ ޖުވެނައިލް ކޯޓުގެ އިޚްތިޞާޞްގެ ތެރޭގައި ހިމެނޭ މައްސަލައެއްގައި މެޖިސްޓްރޭޓް ކޯޓަކުން ކޮށްފައިވާ ޙުކުމެއް، ނުވަތަ ޖުވެނައިލް ކޯޓަށް ހުށަހެޅިފައިވާ ނުވަތަ ޖުވެނައިލް ކޯޓުގައި ހިނގަމުންދާ މައްސަލައެއްގެ ރެކޯޑު، ދައުލަތުގެ ކަމާބެހޭ ފަރާތަކުން ބަލަން ބޭނުންވެގެން ހުށަހަޅައިފިނަމަ ރެކޯޑު ބޭނުންވި ސަބަބުތަކަށް ރިއާޔަތްކޮށް ކޮންމެހެން ހާމަކުރަންޖެހޭ ރެކޯޑު ޖުވެނައިލް ކޯޓުން ހުއްދަކުރާމިންވަރަށް ދޫކުރެވޭނެކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ވަނީ ބުނެފައެވެ.

މީގެ އިތުރުން މަސްތުވާތަކެތީގެ ފަރުވާގެ ޕްރޮގްރާމުގައި ކުއްޖަކު ބައިވެރިކުރުމަށް ކުށުގެ ރެކޯޑު ސާފުކުރުމަށް ބޭނުންވެގެން، ފަރުވާދޭ މަރުކަޒުން އެޑިޕާޓްމަންޓުގައި އެދުމުން އެފަދަ ފަރާތްތަކުގެ ރެކޯޑު އެއިދާރާއަށް ދޫކުރެވޭނެކަމަށްވެސް ޖުޑީޝަލް އެޑްމިނިސްޓްރޭޝަނުން ވަނީ ބުނެފައެވެ.