ރިޕޯޓު: މައިކްރޯސޮފްޓް 365ގެ އެއްބަސްވުން – ސަރުކާރު މުވައްޒަފުންނަށް ރަށުގައި ތިބެގެން މަސައްކަތްކުރެވޭނެ މަގު ތަނަވަސްވެގެންދާނެ

ދައުލަތުގެ އިދާރާތައް އެއް ވިއުގައެއްގެ ތެރޭގައި މަސައްކަތްކުރެވޭނެ ގޮތް ހެދުމަށް މީގެ އަހަރުތަކެއް ކުރިން ފެށި މަސައްކަތުގައި ސަރުކާރުން ވަނީ ކާމިޔާބީތަކެއް ހޯދާފައެވެ. އޭގެ ސަބަބުން ސަރުކާރުގެ މުއައްސަސާތަކުގެ މެދުގައި ބަދަލުކުރާ ލިޔެކިޔުންތައް ފަސޭހައިން ބަދަލުކުރުމާއި އެ ތަކެތީގެ ރެކޯޑް ބެލެހެއްޓުން މިހާރު ވަނީ އެތައް ގޮތަކުން ކުރިއަށް ޖެހިފައެވެ. މިއީ ވަރަށް ބޮޑު ކުރިއެރުމެއް ކަމަށް ކުރިން ބެލެވުނު ނަމަވެސް ކޮވިޑްގެ ހާލަތާ އެކު އެނގިގެން ދިޔައީ މިއީ އަދި ކުޑަ މިންވަރެއް ކަމެވެ. ގޭގައި ބަންދުވެ ތިބެ މަސައްކަތްކުރަަންޖެހުމުން ޓެކްނޮލޮޖީގެ އާ ވަސީލަތްތައް ހޯދަަން ސަރުކާރަށް ވެސް މި ވަނީ މަޖުބޫރުވެފައެވެ. އެ ގޮތުން އޮންލައިންކޮށް އޮފީސްތަކުގެ ބައްދަލުވުންތައް ބާއްވާނެ ގޮތްތަކާއި އެއް އިދާރާ އިން އަނެއް އިދާރާއާ މުއާމަލާތްކުރާނެ ގޮތްތަކާއި ލިޔެކިޔުންތައް ބަދަލުކުރާނެ އާ ގޮތްތައް މި ވަނީ ހޯދަންޖެހިފައެވެ.

“ވާރކިން ފްރޮމް ހޯމް” ނުވަތަ ގޭގައި ތިބެގެން މަސައްކަތްކުރެވޭނެ މަގު ހޯދުމުގެ ގޮތުން އެކި އޮފީސްތަކުން މިހާތަނަށް ބޭނުންކުރަމުން އައީ އެކި ޕްލެޓްފޯމްތަކެވެ. އެއް ބަޔަކު މައިކްރޯސޮފްޓް 360 ބޭނުންކުރާ އިރު އަނެއް ބަޔަކު ގޫގުލް މީޓް އާއި ޒޫމް ފަދަ ޕްލެޓްފޯމްތައް އަންނަނީ ބޭނުންކުރަމުންނެވެ. އަދި ބައެއް ރަށްރަށުގެ އިދާރާތަކުން މާ މަޝްހޫރު ނޫން ނަމަވެސް އާދަައިގެ އެޕްލިކޭޝަންތައް ބޭނުންކޮށްގެން ބައްދަލުވުންތަކާއި ޕްރެޒެންޓޭޝަންތައް އަންނަނީ ދެމުންނެވެ. އެ ބަޔަކަށް ރަނގަޅު، ފަސޭހަ ޕްލެޓްފޯމެއް ބޭނުންކުރުމުގެ ސަބަބުން އެކި އިދާރާތަކާ އެކު މުއާމަލާތްކުރުމަށް އެކި އެޕްތަކާއި ޕްލެޓްފޯމްތައް ބޭނުންކުރަން ޖެހުމުން ވަރަށް ބޮޑު ތަކުލީފެއް ކުރިމަތިވެއެވެ. މީގެ އިތުރުން އެފަދަ ކަމަކަށް ތައްޔާރުވެފައި ނެތުމާއި އަދި އެކަމާ ބެހޭ ހަރުދަނާ ސިޔާސަތެއް ވެސް ނެތުމުން އެގޮތަށް މަސައްކަތްކުރެވޭނެ އިންތިޒާމްތަކެއް ގިނަ އޮފީސްތަކުގައި ގާއިމުކުރެވިފައެއް ވެސް ނެތެވެ. އެ ގޮތުން އޮފީހުގައި ބާއްވާ ބައްދަލުވުންތަކުގައި ވެސް އެކި މީހުން އެކި ތަންތާ ތިބެގެން ބައިވެރިވެވޭނެ ވީޑިއޯ އަދި އޯޑިއީ ސިސްޓަމްތައް ގާއިމުކުރެވިފައި ނެތުމަކީ މިހާރު ވެސް އޮފީސްތައް ހިންގުމަށް އޮތް ހުރަހެކެވެ.

advertisement

މި ކަމަށް ހައްލެއް ހޯދުމުގެ ގޮތުން ސަރަކާރުން މިހާރު ވަނީ މުހިންމު ނިންމުމެއް ނިންމާފައެވެ. ދައުލަތުގެ އިދާރާތައް އެއް ޕްލެޓްފޯމެއްގައި މަސައްކަތްކުރެވޭނެހެން “މައިކްރޯސޮފްޓް 360” ބޭނުންކުރުމަށް މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ މިނިސްޓްރީން ވަނީ އެއްބަސްވުމެއްގައި ސޮއިކޮށްފައެވެ. އެ އެއްބަސްވުމުގައި ސޮއިކުރެއްވުމަށް ފަހު މިނިސްޓަރު އައިމިނަތު ޝައުނާ ވިދާޅުވީ ޑިޖިޓަލް ޓްރާންސްފޯމޭޝަނަކީ ހަމައެކަނި އާ ޓެކްނޮލޮޖީތައް ބޭނުންކުރުން ނޫން ކަމަށާއި އިދާރާތަކުގެ ސްޓްރަކްޗާ ވެސް އެ ގޮތުގެ މަތިން ބަދަލުކޮށް، މުވައްޒަފުންގެ ވިސްނުން ވެސް ބަދަލުކުރުން ކަމަށެވެ.

މިނިސްޓަރު ޝައުނާ ވިދާޅުވީ ހާއްސަކޮށް ރާއްޖެއަކީ ޖަޒީރާ ގައުމަކަށްވެފައި މައިކްރޯސޮފްޓް ކްލައުޑްގެ އެހީގައި އިދާރާތައް ގުޅާލެވުމުން، އިދާރާތައް ގުޅިގެން އެއް ޕްލެޓްފޯމެއްގެ ތެރެއިން މަސައްކަތްކުރުމުން ގިނަގުނަ ފަސޭހަތަކެއް ވެގެންދާނެ ކަމަށެވެ. އޭގެ ނަތީޖާއެއްގެ ގޮތުން ދަތުރުފަތުރު މަދުވެ، އެ ކަމަށް ކުރާ ހޭދަކުޑަވެ، އުޅަނދުފަހަރުން ދޫކުރާ ވިހަ ގޭސްތައް މަދުވެ، ދިރިއުޅޭ މާހައުލަށް ވެސް އޭގެ ފައިދާކުރާނެ ކަމަށް މިނިސްޓަރު ވިދާޅުވިއެވެ.

ކޮވިޑް19ގެ ސަބަބުން ގިނަ ފިލާވަޅުތަކެއް ވަނީ ދަސްވެފައެވެ. އޭގެ ތެރެއިން މުހިންމު އެއް ފިލާވަޅަކީ ރައްޔިތުންނަށް ރަނގަޅު ހިދުމަތެއް ދިނުމަށް ކޮންމެހެން ބޮޑު އޮފީހެއް ބޭނުން ނުވާ ކަމެވެ. ގޭގައި ނުވަތަ އަމިއްލަ ރަށުގައި ތިބެގެން ވެސް ރައްޔިތުންނަށް ހިދުމަތްކޮށްދީ އޮފީސްތަކުގެ މަސައްކަތް ކުރެވޭނެ ކަން މި ބަލިމަޑުކަމުގެ ތެރެއިން ވަނީ ސާބިތުވެގެން ގޮސްފައެވެ. ގިނަ ދުވަސްތަކަކަށް ސަރުކާރުގެ އޮފީސްތައް ބަންދުވި ނަމަވެސް އިންޓަނެޓްގެ އެކި ޕްލެޓްފޯމްތައް މެދުވެރިކޮށް ރައްޔިތުންނަށް ގިނަ ހިދުމަތްތަކެއް ލިބޭނެ މަގު ސަރުކާރުގެ މުއަައްސަސާތަކުން ފަހުކޮށްދިނެވެ. ސަރުކާރުގެ ކުންފުނިތަކުން ފެށިގެން އަމިއްލަ ކުންފުނިތަކާއި ޔުޓިލިޓީ ކުންފުނިތަކުން ވެސް މި މަގުން އަމަލުކުރިއެވެ. އެ ގޮތުން މީގެ ކުރިން ކިޔުގައި ޖެހިގެން ބޭންކް ފަދަ ތަންތަނުން ހޯދަމުން ދިޔަ ބައެއް ހިދުމަތްތައް އެ މީހަކު އެ ހުރި ތަނަކުން ލިބޭނެ މަގު ފަހިވިއެވެ.

މި ބަލިމަޑުކަމުން ދަސްވި އަނެއް ފިލާވަޅަކީ ދައުލަތުގެ އުފެއްދުންތެރިކަން ނުވަތަ ދޭންޖެހޭ ހިދުމަތްތައް ފޯރުކޮށްދިނުމަށް ކޮންމެހެން އޮފީހެއް ނުވަތަ މާގިނަ މުވައްޒަފުން ބޭނުން ނުވާ ކަމެވެ. ބައެއް ކަހަލަ މަސައްކަތްތަކަކީ ބަލިމަޑުކަމެއް ނޫނަސް ގޭގައި ތިބެގެން ކުރެވޭނެ މަސައްކަތްތައްކަން އަންނަނީ ސާބިތުވަމުންނެވެ. މި ބަލިމަޑުކަމުން ފިލާވަޅު ލިބި ދައުލަތުގެ މުއައްސަސާތައް އެ ގޮތަށް ބައްޓަންކުރެވިއްޖެ ނަމަ މާލީ ގޮތުން ވެސް ދައުލަތަށް ހަރަދުތައް ވަރަށް ބޮޑުތަން ކުޑަކުރެވޭނެއެވެ.

އަސާސީ ހައްގުތަކާއި މުވައްޒަފުންގެ ހައްގުތަކަށް ވަކާލާތުކުރަމުން އަންނަ އަދި މިހާރު އަމިއްލަ ރަށުގައި، އަމިއްލަ ގޭގައި ހުރެގެން ޓުއަރިޒަމް މިނިސްޓްރީގެ މަސައްކަތްތަކެއް ކުރަމުން އަންނަ ފާތިމަތު ޝާއިރާ ސޯޝަލް މީޑިއާގައި ބުނެފައިވަނީ ނޮލެޖް ބޭސްޑް ވަޒީފާތައް އަދާކުރާ މީހުން ގޭގައި ތިބެ މަސައްކަތް ކުރުމުގެ ސިޔާސަތެއް ހަދައިފި ނަމަ ރަށްތަކުގެ އިގްތިސާދާއި، މީހުންގެ ދިރިއުޅުން “ހާސް ތަނުން” ކުރިއަރައިގެން ދާނެ ކަމަށް އެތައް ބަޔަކު ގަބޫލުކުރާ ކަމަށެވެ.

“ސަރުކާރުން މިގޮތަށް މިކަން ބަދަލުކޮށްފި ނަމަ ރަށްރަށުގެ އާބާދީތައް އަލުން ރަށަށް ހިޖުރަކުރުމަށް ބާރަކަށް ވާނެ. އަދި ދަރިން ބޮޑުކުރުމަށް އެކަށީގެންވާ މާހައުލެއްގައި ދަރިން ބޮޑު ކުރުމާއި، ފަހަށް ރައްކާކުރުން އަދި ދިރިއުޅުން ބިނާ ކުރުމަށް ކުރަންޖެހޭ އެހެން އެތައް ކަމަކަށް މަގުފަހިވެ، އާއިލާތައް ދުޅަހެޔޮވެ، ރަށްރަށުގެ މުޖުތަމައުތަކަށް އެތަކެއް އިގްތިސާދީ އަދި އިޖުތިމާއީ ކުރިއެރުން ލިބޭނެ،” މިނިމަމް ވޭޖް ފަދަ މަސައްކަތްތެރިންނާ ގުޅޭ ގިނަ ކަންތައްތަކެއްގައި ފާޅުކަން ބޮޑު ގޮތެއްގައި އަޑުއުފުލުމުގައި ދެމިހުރި ޝާއިރާ ހިޔާލު ފާޅުކޮށްފައި ވެއެވެ.

އޭނާ ދެކޭ ގޮތުގައި މާލެ ދޫކޮށް އަަމިއްލަ ރަށަށް ދިރިއުޅެން ބޭނުންވާ ފަރާތްތަކަށް އެހީވުމުގެ ސްކީމެއް މިހާރު ވެސް ސަރުކާރުން ފަށާފައިވާ އިރު، ވަޒީފާގައި ތިބި މީހުންގެ ތެރެއިން ވަޒީފާ ނުގެއްލޭނެ ގޮތަކަށް ރަށަށް ބަދަލުވެވޭނެ މީހުން ދެނެގަނެ، އެފަދަ އާއިލާތަކަށް އެފުރުސަތުތައް ފަހިކޮށްދިނުމަކީ ބާރުތަކާއި، މީހުން އަދި ފައިސާ ލާމަރުކަޒުކުރަން ކުރެވޭ އިހުލާސްތެރި މަސައްކަތަކަށް ވެގެންދާނެ ކަމެކެވެ.

“މިއީ ދުނިޔޭގެ އެހެން ހިސާބުތަކުގައި މިކަން ކުރަން ފަށާ، މިކަމާ މެދު ސްޓަޑީތައް ހަދާފައިވާ ކަމެއް. މިކަން ކުރެވެން ހުރި މަގުތައް ބައިވަރުކަން އެ ދިރާސާ ކަރުދާސްތަކާއި މީހުންގެ ފީޑްބެކް އިން އެނގެން އެބަހުރި،” އަމިއްލަ ތަޖުރިބާގެ އަލީގައި ޝާއިރާ ބުނެފައި ވެއެވެ.

ދައުލަތުގެ ވަޒީފާތަކުގައި 45،000 ވަރަކަށް މުވައްޒަފުން ތިބި އިރު ބަޖެޓުން މިހާރު ވެސް ބޮޑު ހޭދައެއް ހަމައެކަނި މުސާރަ އަށް ހޭދަކުރެއެވެ. އޭގެ އިތުރުން އޮފީސް އިމާރާތްތަކަށާއި ހިންގުމުގެ ހަރަދަށް ވެސް ބޮޑު ހޭދައެއް ކުރަންޖެހުމުން ތަރައްގީގެ މަސައްކަތްތަކަށް ބަޖެޓުން ފުރުސަތު ލިބެނީ ހަނި ގޮތަކަށެވެ. ކޮވިޑްގެ ފިލާވަޅުތަކުގެ ތެރެއިން ލިބުނު ތަޖުރިބާގެ އަލީގައި ސަރުކާރުގެ މަސައްކަތްތައް އެއް ވިއުގައެއްގެ ތެރެއިން ކުރެވޭނެ ގޮތަކަށް ހަމަޖެއްސި ނަމަ މި ހަރަދު އެތައް ގޮތަކުން ކުޑަވެގެންދާނެއެވެ. ބައެއް އަމިއްލަ ކުންފުނިތަކުން މިހާރު ވެސް މި ގޮތަށް މަސައްކަތްތައް ބައްޓަންކުރަމުން އެބަ ގެންދެއެވެ. ހާއްސަކޮށް ކޮންޓްރެކްޓް އުސޫލުން ކުރެވޭނެހެން ހުރި މަސައްކަތްތައް އެ ގޮތަށް ބަދަލުކުރުމުގެ ފައިދާ ފެންނަ ކަމަށް އެ ފަރާތްތަކުން އަންނީ ސާބިތުކޮށްދެމުންނެވެ.

ރަށްރަށަށް ދިރިއުޅުން ބަދަލުކުރަން ބޭނުންވާ މީހުންނަށާއި ރަށުގައި، އަމިއްލަ ގެދޮރުގައި އަނބިދަރިން ކައިރީގައި ތިބެގެން މާލޭގެ އޮފީސްތަކުގެ ވަޒީފާތައް އަދާކުރެވޭނެ މަގު، ޓެކްނޮލޮޖީގެ އެހީގައި މި ވަނީ އީޖާދުވެގެން އައިސްފައެވެ. ދެން އޮތީ ސަރުކާރުން ވެސް އެފަދަ ޒަމާނީ ވިއުގަތަކަށް އަހުލުވެރިވެ، ހަރަދު ކުޑަ، އަދި އުފެއްދުންތެރިކަން ވެސް އިތުރުކުރެވޭނެ ގޮތަކަށް މަސައްކަތްތައް ބައްޓަންކުރުމެވެ. ޓެލެކޮމިއުނިކޭޝަން އޮތޯރިޓީން މައިކްރޯސޮފްޓް 360 ގާއިމުކުރުމަށް ފަށައިގަންނަ މި މަސައްކަތަކީ މި ކަމަށް ހުޅުވިގެންދާނެ މުހިންމު ދޮރެކެވެ. އޭގެ ބޭނުން ހިފައި އެފަދަ ސިޔާސަތެއް އެކުލަވައިލުން މުހިންމެވެ. ވަކި ކަހަލަ ބަޔަކަށް ގޭގައި ތިބެގެން މަސައްކަތްކުރާނެ އުސޫލެއް މިހާރު ވެސް ސަރުކާރުގައި އެބަ އޮތެވެ. އެހެންކަމުން މި އުސޫލު ހަރުދަނާކޮށް ޒަމާނަށް ފައްތައި، އެ މީހަކު ދިރިއުޅޭ ތަނަކަށް ނުބަލައި މުޅި ރާއްޖެ ވެސް ހިމެނޭހެން ސިޔާސަތު އެކުލަވާލައި ތަންފީޒުކުރުން މުހިންމެވެ.