އެޑިޔުކޭޝަން މިނިސްޓްރީން ދައްކާފައިވަނީ ހަޤީގަތާއި ހިލާފު ވާހަކައެއް – ޕީއައިއެލްސީ

އެޑިޔުކޭޝަން މިނިސްޓްރީން ޓީޗާސް އެސޯސިއޭޝަންއާއި އަދި ޕަބްލިކް އިންޓްރެސްޓް ލޯރ ސެންޓަރާއި ގުޅޭގޮތުން ހަޤީގަތާއި ޚިލާފު ވާހަކަދައްކާފައިވާކަމަށްބުނެ އެ ޖަމިއްޔާއިން ކަންބޮޑުވުން ފާޅުކޮށްފިއެވެ.

އިއްޒުއްދީން ސްކޫލުގައި މަސައްކަތްކުރި ޕްރިންސިޕަލް އިސްމާއީލް ނަސީރު އެ ސުކޫލުގައި މަސައްކަތްކުރާ 4
ޓީޗަރަކަށް ޖިންސީ ފުރައްސާރަ ކޮށްފައިވާތީ، އެ 4 ޓީޗަރުންގެ ފަރާތުން އެ މައްސަލަ މިނިސްޓްރީ އޮފް އެޑިއުކޭޝަންގެ ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ކޮމިޓީއަށް ހުށަހެޅިއެވެ. އެ 4 ޓީޗަރުންގެ ޤާނޫނީ ވަކީލު ގޮތުގައި ތަމްސީލްކޮށްފައިވަނީ ޕަބްލިކް އިންޓްރެސްޓް ލޯރ ސެންޓަރުންނެވެ.

advertisement

ޕަބްލިކް އިންޓްރެސްޓް ލޯރ ސެންޓަރުން ބުނީ އެޑިއުކޭޝަން މިނިސްޓްރީގެ ޖިންސީ ފުރައްސާރަކުރުމާއި ގޯނާ ކުރުން ހުއްޓުވުމުގެ ކޮމިޓީއިން މައްސަލަ ބައްލަވައި، އިއްޒުއްދީން ސުކޫލުގެ ޕްރިންސިޕަލް އިސްމާޢީލް ނަސީރުގެ ފުށުން ޖިންސީ ފުރައްސާރަ ކުރުމުގެ އަމަލެއް ހިންގިކަމުގައި ބުރަވެވެން އޮތްކަމަށް ނިންމަވައި، ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ޤާނޫނުގެ 22 ވަނަ މާއްދާގެ ދަށުން ފިޔަވަޅު އަޅަން ފެންނަ ކަމަށް މައްސަލަ ބެލި ކޮމެޓީގެ އިއްތިފާޤުން ނިމިފައިވާކަމުގައި އަންގާފައިވާކަމަށެވެ. އެހެންނަމަވެސް، މައްސަލަ ރައްދުވި ފަރާތުގެ މައްޗަށް އެޅި ފިޔަވަޅަކީ ކޮބާކަން މައްސަލަ ހުށަހެޅި ފަރާތަށް އަންގާފައެއް ނުވާކަމަށެވެ. އަދި އިސްމާޢީލްނަސީރު މިހާރު އިއްޒުއްދީން ސުކޫލަށް ވުރެ މާ ބޮޑު ސުކޫލަކަށް ބަދަލުކޮށްފައިވާކަމުގެ މައުލޫމާތު ލިބިފައިވާކަމަށް އެ ޖަމިއްޔާގެ ނޫސްބަޔާނުގައި ވަނީ ބުނެފައެވެ. މިކަމަކީ އޭގެ ޒާތުގައި ފިޔަވަޅަކަށް ވުރެ ބޮޑަށް ޕްރޮމޯޝަނެއްކަމަށް ސިފަވާކަން ވަނީ ފާހަގަކޮށްފައެވެ.

މައްސަލަ ހުށަހެޅި 4 ފަރާތް އެހެން ސުކޫލަކަށް ބަދަލުކުރަން އުޅޭކަމުގެ މައުލޫމާތު ލިބި އެކަން އެގޮތަށް ނުކުރުމަށް އިލްތިމާސްކޮށް މިނިސްޓްރީ އޮފް އެޑިއުކޭޝަން އަދި ސިވިލް ސަރވިސް ކޮމިޝަނަށް އެޖަމްޢިއްޔާއިން ސިޓީ ފޮނުވާފައިވަނިކޮށް، މައްސަލަ ހުށަހެޅި 4 ފަރާތް ވަނީ އެހެން ސުކޫލުތަކަށް ބަދަލުކޮށްފައިކަމަށް ވަނީ ބުނެފައެވެ.

ޕަބްލިކް އިންޓްރެސްޓް ލޯރ ސެންޓަރުން ބުނީ މިނިސްޓްރީ އޮފް އެޑިޔުކޭޝަންގެ ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ކޮމިޓީއިން މައްސަލަ ހުށައެޅުމުގެ ކުރިން ސިވިލް ސަރވިސް ކޮމިޝަނާއި، މިނިސްޓްރީ އޮފް އެޑިޔުކޭޝަންއާއި، ރައީސުލްޖުމްހޫރިއްޔާގެ އޮފީހުގެ ސަމާލުކަމަށް މިކަން ގެނެސް އެތައް ފަހަރަކު މައްސަލައިގައި ހިމެނޭ ފަރާތްތައް ސިޓީ ފޮނުވާފައިވާކަމަށެވެ.

މައްސަލަ ރައްދުވާ ފަރާތައް ފިޔަވަޅު އެޅުމެއްނެތި އެފަރާތް އިއްޒުއްދީން ސްކޫލަށްވުރެ މާ ބޮޑު ސުކޫލަކަށް ބަދަލުކޮށްފައިވާކަމުގެ މައުލޫމާތު ލިބިފައިވާތީ އެކަމަކީ އޭގެ ޒާތުގައި ފިޔަވަޅަކަށް ވުރެ ބޮޑަށް ޕްރޮމޯޝަނެއްކަމަށް ސިފަވާކަމަށް ދެކޭކަމަށް އެޑިޔުކޭޝަން މިނިސްޓްރީއަށް ފޮނުވާފައިވާ ސިޓީގައި ބަޔާންކޮށްފައިވާއިރު އެ ސިޓީއަށް އެއްވެސް ރައްދެއް ދީފައިނުވާކަމަށެވެ. ސިޓީއަށް ޖަވާބު ދިނުމެއްނެތި މައްސަލަ ހުށައެޅި 2 މުވައްޒަފުންނާއި މައްސަލައިގައި ހިމެނޭ 2 ފަރާތް އެހެން ސްކޫލަށް ބަދަލުކުރުމުން އެކަމާއި ގުޅިގެން އެ އެސޯސިއޭޝަންއާއި ޗީޓާސް އެސޯސިއޭޝަނުން ބަޔާނެއް ނެރުމުން އެ ބަޔާނުގައި ފާހަގަކޮށްފައިވަނީ ހަޤީގަތާއި ހިލާފު ވާހަކަތަކެއްކަމަށްބުނެ ދޮގު ތުހުމަތު އަޅުވާފައިވުމަކީ ކަމުގެ ހަޤީގަތް ބެލުމެއްނެތި ކޮށްފައިވާ ޒިންމާދާރުކުޑަ އަމަލެއްކަމަށް ވަނީ ބުނެފައެވެ. އެ ޖަމިއްޔާއިން ބުނީ މިނިސްޓްރީގެ ބަޔާނުގައި ޖިންސީ ފުރައްސާރައިގެ އަމަލުކުރި ޕްރިންސިޕަލްގެ މައްޗަށް ޖިންސީ ފުރައްސާރައިގެ އަމަލު ސާބިތުވާކަމަށާއި އެކަމާއި ދޭތެރޭ ފިޔަވަޅު އަޅާފައިނުވާކަމަށް އިންކާރުނުކޮށް އަދި އެކަމާއި ގުޅިގެން އެއްވެސް ކަމެއް އެ ބަޔާނުގައި ހިމަނާފައިނުވާކަމަށެވެ.