ވެކްސިން ފުރިހަމަނުކުރާ ފަތުރުވެރިންނަށް ގެސްޓްހައުސްތަކަށް މިހާރު ނާދެވޭނެ

ކޮވިޑް-19ގެ ވެކްސިން ފުރިހަމަ ނުކޮށް، ރާއްޖެ އަންނަ އެއްވެސް ޓޫރިސްޓަކަށް ގެސްޓް ހައުސްތަކަށް ނުދެވޭގޮތަށް އެޗްޕީއޭއިން ނިންމައިފި އެވެ.

އެޗްޕީއޭއިން ވިދާޅުވީ، މި މަހުގެ 26 އިން ފެށިގެން ގެސްޓް ހައުސްތަކަށް ދެވޭނީ ޑަބްލިއުއެޗްއޯ އިން ގަބޫލުކުރާ ކޮވިޑް-19 ގެ ވެކްސިންގެ ދެ ޑޯޒު ފުރިހަމަކޮށް، 14 ދުވަސްވެފައިވާ ޓޫރިސްޓުންނަށް އެކަނި ކަމަށެވެ. އެކަމަކު އެ މީހުންނާ އެކު ދަތުރުކުރާ، ވެކްސިން ނުޖެހޭ އުމުރުފުރާގެ ކުދިންނަށް ހުރަހެއް ނޯންނާނެ ކަމަށް އެޗްޕީއޭ އިން ބުންޏެވެ.

advertisement

ވެކްސިން ފުރިހަމަކުރި ނަމަވެސް ޓޫރިސްޓުންނަށް ރާއްޖެ އާދެވޭނީ 72 ގަޑިއިރު ނުވާ ނެގެޓިވް ޕީސީއާރު ނަތީޖާއަކާއެކުގަ އެވެ. އަދި ގެސްޓް ހައުސްތަކުން ޗެކްއައުޓް ވާން ވެސް ނެގެޓިވް ޕީސީއާރު ނަތީޖާއެއް ބޭނުން ވާނެ އެވެ.

ކޮވިޑް ވެކްސިން ފުރިހަމަ ނުކުރާ ޓޫރިސްޓުންނަށް ވަކި ޝަރުތަތަކާ އެކު ގެސްޓް ހައުސްތަކުގައި ތިބެވޭނެ އެވެ. އޭގެ ތެރޭގައި، ވެކްސިން ފުރިހަމަ ނުކުރާ ޓޫރިސްޓަކު ޗެކިންވާ ގެސްޓް ހައުސް ހުންނަ ރަށަކީ ވެކްސިން ޖެހޭ އާބާދީގެ 60 ޕަސެންޓު ވެކްސިން ފުރިހަމަ ކޮށްފައިވާ ރަށަކަށް ވާން ޖެހޭނެ އެވެ.

މީގެ އިތުރުން އެ ޓޫރިސްޓުންނަށް ހިދުމަތް ދޭ ތަންތަނުގައި މަސައްކަތް ކުރާ މީހުންގެ 95 ޕަސެންޓު މީހުން ވެކްސިން ފުރިހަމަ ކޮށްފައި ތިބެން ޖެހޭއިރު، އެ ރަށެއްގައި ދިރިއުޅޭ އުމުރުން 65 އަހަރުން މަތީގެ އާބާދީގެ 90 ޕަސެންޓު މީހުން ވެކްސިންގެ ދެ ޑޯޒް ފުރިހަމަ ކުރަން ޖެހޭނެ އެވެ.

އެޗްޕީއޭއިން ބުނިގޮތުގައި އެ އިދާރާ އިން ވަކި ގޮތެއް އަންގަންދެން މިގޮތަށް އަމަލު ކުރަން ޖެހޭނެ އެވެ. އަދި ރާއްޖެ އަށް ޓޫރިސްޓުން އަންނަ ގައުމުތަކުގެ ކޮވިޑުގެ ހާލަތަށް ބަލައި މި ކަންކަމަށް ބަދަލު ގެންނާނެ ކަމަށް ވެސް އެ އިދާރާ އިން ބުންޏެވެ.

އެޗްޕީއޭ މިހާރު ހަމަޖައްސާފައިވާ ގޮތުން ކޮވިޑް-19 ގެ ވެކްސިން ފުރިހަމަކޮށް، 14 ދުވަސް ފަހުން ރާއްޖެ އަންނަ ދިވެހިންނާއި ވޯކް ޕާމިޓް ހޯލްޑަރުން މި މަހުގެ 26 އިން ފެށިގެން ކަރަންޓީނުވާކަށް ނުޖެހޭނެ އެވެ.