އިޤްތިޟާދުގައި ބިދޭސީ މަސައްކަތްތެރިންގެ ހިއްސާ ބޮޑު!

ރާއްޖޭގެ އާބާދީގެ 3 ބައިކޮށްފައި 1 ބަޔަކީ ރާއްޖޭގައި މަސައްކަތްކުރާ ބިދޭސީ މަސައްކަތްތެރިންނެވެ. އިޤްތިޞާދުގެ ހުރިހައި ދާއިރާއެއްގައިވެސް ބިދޭސީ މަސައްކަތްތެރިންގެ ހިއްސާ އޮވެއޭ ބުނުމަކީ ދޮގަކަށް ނުވާނެއެވެ. މި މަސައްކަތްތެރިންގެ ބޭނުންވެސް މިއަދު ވަނީ ޤައުމަށް ނުހަނު ބޮޑަށް ބޭނުންވެފައެވެ.

މިއަހަރުގެ އާބާދީގެ ދުވަހާއި ގުޅުވައިގެން ނެރެފައިވާ ތަފާސްހިސާބުތައް ދައްކާގޮތުން ރާއްޖޭގެ އާބާދީއަކީ 568،362 އެވެ. މީގެތެރެއިން ރާއްޖޭގައި މަސައްކަތްކުރާ ބިދޭސީ މަސައްކަތްތެރިންގެ އަދަދަކީ 182،666 އެވެ. މީގެތެރެއިން އަންހެނުންގެ އިންސައްތައަކީ %9 އެކެވެ. އަދި ބާކީއޮތް %91 އަކީ ފިރެހެނުންނެވެ.

advertisement

ރާއްޖޭގެ އިޤްތިޞާދުގެ އެންމެ މުހިންމު ސިނާއަތްތަކުގައި ބިދޭސީ މަސައްކަތްތެރިން އަންނަނީ އެންމެ ކުރީސަފުގައި މަސައްކަތް ކުރަމުންނެވެ. ފަތުރުވެރިކަމުގެ ސިނާއަތައް ބަލާލިނަމަވެސް ބިދޭސީ މަސައްކަތްތެރިން ނުހަނު ގިނައެވެ. އަދި އިމާރާތްކުރުމުގެ ސިނާއަތުގައި މުޅިންހެންވެސް މަސައްކަތްކުރަނީ ބިދޭސީ މަސައްކަތްތެރިންނޭ ދެންނެވުމަކީ ދޮގަކަށް ނުވާނެއެވެ.

ސިއްހީ ދާއިރާގައިވެސް ޑޮކްޓަރުންނާއި ނަރުހުންނުން ފެށިގެން ލެބޯޓްރީ ޓެކްނީޝަނުންނާއި އެހެނިހެންވެސް ވަޒީފާތަކުގައި މިއަދު ބިދޭސީ މަސައްކަތްތެރިން ހަރަކާތްތެރިވެއެވެ. ތައުލީމީ ދާއިރާއާއި ދަނޑުވެރިކަމާއި ދިވެހިންގެ ލޭނާރު ކަމަށްވާ މަސްވެރިކަމުގެ ދާއިރާގައިވެސް މިހާރު ބިދޭސީ މަސައްކަތްތެރިން އަންނަނީ މަސައްކަތްކުރަމުންނެވެ.

މިހުރިހައި ސިނާއަތްތަކެއްގައިވެސް ބިދޭސީންގެ ހިއްސާ މިއަދު އޮތް އިރު ބިދޭސީ މަސައްކަތްތެރިންނަކީ މިއަދު ރާއްޖޭގެ އިޤްތިޞާދުގައި މުހިންމު ބައެކެވެ. ނަމަވެސް ހިތާމައަކީ ބައެއް ބިދޭސީން ރާއްޖެގެނެސް އަޅާލާނެ ބަތަކު ނެތި މަގުމަތިވަމުން ދިއުމެވެ. މީގެ ސަބަބުން ޤައުމުގައި ހުރި ބައެއް މައްސަލަތަކުގެ ފެށުމަށްވެސް ބައެއް ފަހަރު އެމީހުން ވެފައިއެބަތިއްބެވެ.

ބިދޭސީ މަސައްކަތްތެރިންގެ ހައްޤުގައި މަސައްކަތްކުރާ ޖަމިއްޔާތައްވެސް މިއަދު ރާއްޖޭގައި އެބަހުއްޓެވެ. އެ ޖަމިއްޔާތަކުން ރާއްޖޭގައި ދިރިއުޅޭ ބިދޭސީ މަސައްކަތްތެރިންގެ ހައްޤުގައި ގިނަ މަސައްކަތްތަކެއްވެސް އަންނަނީ ކުރަމުންނެވެ. އެމީހުން ފާހަގަކުރާގޮތުގައި ބިދޭސީންގެ ހައްޤުތައް ރައްކާތެރިކުރުމަކީ ދިވެހިރާއްޖެ ކުރިއެރުވުމަށް ކުރެވޭ މަސައްކަތެކެވެ.