މާލީ މައުލޫމާތު ހާމަކުރުމުގެ އެންމެ މަތީ ދަރަޖަ ރާއްޖެއަށް

މާލީ މައުލޫމާތު ހާމަ ކުރުމަށް ކުރިޔަން ގެންދާ މަސައްކަތުގެ އެންމެ މަތީ ދަރަޖަ ރާއްޖެއިން ހާސިލް ކޮށްފައިވާ ކަމަށް އިންޓަނޭޝަނަލް މަނިޓަރީ ފަންޑް (އައިއެމްއެފް)އިން ބުނެފި އެވެ. އައިއެމްއެފުން މިގޮތަށް ބުނެފައި ވަނީ، އެފަރާތުން ނެރެފައިވާ ފިސްކަލް ޓްރާންސްޕޭރެންސީ އިވެލުއޭޝަން ރިޕޯޓުގައެވެ.

މާލީ ހިސާބުތަކުގެ ހާމަކަން ބެލުމަށް އައިއެމްއެފްއިން ގެންގުޅޭ މިންގަނޑުން މި ރިޕޯޓުން ރާއްޖެއަށް ލިބިފައިވަނީ “އެޑްވާންސްޑް” ރޭޓިން އެވެ. މިއީ އެންމެ މަތީ ދަރަޖައެވެ.

advertisement

މާލީ ހިސާބުތައް ހާމަކުރުމަށް ސަރުކާރުން ރަނގަޅު ފިޔަވަޅުތަކެއް އަޅައިފައިވާކަން ރިޕޯޓުގައި ވަނީ ފާހަގަކޮށްފައެވެ. ނަމަވެސް ބައެއް ދައިރާތަކުން ރަނގަޅުކުރަންވީ ކަންކަން ރިޕޯޓުގައި ވަނީ ފާހަގަކޮށްފައެވެ. އޭގެތެރޭގައި ބައިނަލްއަގްވާމީ މިންގަނޑުތަކާ އެއްގޮތަށް އޮޑިޓް ރިޕޯޓްތައް ތައްޔާރު ކުރުމާއި، މެދު ރާސްތާގެ ފިސްކަލް ސްޓްރެޓަޖީ އާއި ބަޖެޓް ފްރޭމްވޯކް އިތުރަށް ތަރައްގީކުރުމާއި، ޓެކްސް އާމްދަނީގެ ހަރަދުތައް ކުރާ ގޮތް އާންމުކުރުން ހިމެނެ އެވެ. އަދި އެސްއޯއީތަކުގެ ހާމަކަން އިތުރުކުރުމަށާއި ދައުލަތުން ގެރެންޓީ ދިނުމުގެ އުސޫލާ އެއްގޮތަށް ގެރެންޓީތައް މެނޭޖްކުރުން ހިމެނެ އެވެ.