ރިޕޯޓް: ހައްލަކީ މަޖުބޫރުކޮށްގެން ވެސް ވެކްސިން ޖެހުން!

މީގެ ދޮޅު އަހަރެއްހާ ދުވަސްކުރިން މުޅި ދުނިޔެ ބިރުވެރިކަމެއްގެ ތެރެއަށް ވައްޓާލި ކޮވިޑް-19 އަށް ހައްލެއް ހޯދުމަށް އެތައް ގައުމުތަކެއްގެ އެތައް ކުންފުނިތަކަކުން އަންނަނީ ބުރަ މަސައްކަތްތަކެއް ކުރަމުންނެވެ. މީގެ ކުރިން މިފަދަ ބަލިތަކަށް ހޯދާފައި ނުވާހާ އަވަހަށް ވެކްސިން ހޯދުމާއި ބޭސްތައް އީޖާދުކުރުމަކީ ޒަމާނީ ވަސީލަތްތަކުގެ އެހީގައި ދުނިޔެ ހޯދާފައިވާ ވަރަށް ބޮޑު ކުރިއެރުމެކެވެ. އަހަރެއް ނުވަނީސް ވެކްސިންތަކެއް އީޖާދުކުރުމަކީ ކުޑަކަމެއް ނޫނެވެ. މިވަގުތު ކޮވިޑް-19 އިން ރައްކާތެރިވުމަށް އޮތް ހައްލަކީ ވެސް ސިއްހީ މާހިރުންގެ އިރުޝާދުތަކަށް ބޯލަނބައި ތިމާގެ ދިފާއީ ނިޒާމު ވަރުގަދަކުރުމެވެ. އެކަމަށް އޮތް މަގަކީ ވެކްސިން ޖެހުމެވެ.

ކޮވިޑް-19 އަށް މިހާތަނަށް ކުންފުނިތަކުން ހޯދި ވެކްސިންތަކަކީ ބަލި ފެތުރުން މުޅިން ކޮންޓްރޯލްކުރާ ވެކްސިންތަކެއް ނޫނެވެ. ވެކްސިންތައް އުފެއްދުމުގައި ވެސް ބޮޑަށް އަމާޒު ހިފާފައި ހުރީ ބަލި ޖެހިއްޖެ ނަމަ ލިބޭ ގެއްލުން ކުޑަކޮށް ބޮޑުވަރު ވިޔަނުދިނުމެވެ. ދިފާއީ ނިޒާމު ވަރުގަދަކުރުމެވެ. އެކި ގައުމުތަކުގެ ކުންފުނިތަކުން އުފެއްދި ވެކްސިންތަކުގެ އަސަރު އެކި މިންވަރަށް ކުރި ނަމަވެެސް ހުރިހާ ވެކްސިނެއްގެ ވެސް މައިގަނޑު ގުޅިފައި ވަނީ މި ސަބަބާއެވެ. ބަލިޖެހުން ކޮންޓްރޯލްކުރުން ނުވަތަ ބަލިޖެހުން ހުއްޓުވުމަށް ނުވަތަ ހަށިގަނޑަށް ވައިރަސް ނުވަންނާނެ ފަދަ ދިފާއީ ވެކްސިނެއް ހެދުމަށް އަދި ދުވަސްތަކެއް ނަގާނެ ކަމަށް ސިއްހީ މާހިރުން ފާހަގަކުރެއެވެ. އެހެންކަމުން މި ވަގުތު ސިއްހީ މާހިރުން ވެސް ލަފާ ދެމުން އަންނަނީ ވެކްސިން ޖަހައި ބަލިން ރައްކާތެރިވުމަށެވެ. އަދި ފެތުރުން ކޮންޓްރޯލްކުރުމަށް ކަމާ ބެހޭ އިދާރާތަކުން އަންގާ އެންގުންތަކަށް ތަބާވެ ފިޔަވަޅުތައް އެޅުމަށެވެ.

advertisement

ވެކްސިން ޖެހުމުގައި ރާއްޖެއިން މިހާރު ވެސް ވަނީ ވަރަށް ބޮޑު ކުރިއެރުންތަކެއް ހޯދާފައެވެ. އެ ގޮތުން ރާއްޖޭގައި ދިރިއުޅޭ 70 ޕަސެންޓަށް ވުރެ ގިނަ މީހުންނަށް ވެކްސިންގެ އެއް ޑޯޒް ނަމަވެސް ވަނީ ފޯރުކޮށްދީފައެވެ. ދަތި އެހެން ނަމަވެސް ސަރުކާރުން ވަނީ މުޅި އާބާދީ އަށް ބޭނުންވާ ވަރަށް ވެކްސިން ވެސް ކަށަވަރުކޮށްފައެވެ. ނަމަވެސް ކޮވިޑް ބައްޔަކީ ފަސޭހައިން ގައިން ގަޔަށް އަރާ ބައްޔަކަށް ވެފައި އެ ބަލި ފެތުރުން ހުއްޓުވާނެ ވެކްސިނެއް މިހާތަނަށް އުފައްދާފައި ނެތުމުން އޮތް ހައްލަކީ ބަލިން ކުރާ އަސަރު ކުޑަކުރުމެވެ. އެކަން މުޅި އާބާދީން ފުރިހަމަކޮށްފި ނަމަ ސިއްހީ ހިދުމަތް ދޭ ތަންތަނާއި ފަރާތްތަކަށް ބާރުބޮޑު ނުވެ ފަސޭހަކަމާ އެކު ބަލި ކޮންޓްރޯލް މިންވަރެއްގައި ހިފެހެއްޓުމަށް މަގުފަހިވާނެއެވެ. އެހެންކަމުން ވެކްސިން ޖެހުން ކޮންމެހެން މުހިންމެވެ.

މުޅި އާބާދީ އަށް ޖެހޭ ވަރަށް ވެކްސިން ލިބިފައިވާ އިރު ދެން އޮތީ އެ ވެކްސިން ޖެހުމެވެ. ވެކްސިން ޖެހުމަކީ މި ވަގުތު ގާނޫނަކުން ނުވަތަ ގަވާއިދަކުން ކަނޑައެޅިގެން މަޖުބޫރު ކަމެއްގެ ގޮތުގައި ނެތް ނަމަވެސް މި ކަމަށް ބާރު އެޅުމަކީ ސަރުކާރުގެ އިތުރުން އަމިއްލަ ކުންފުނިތަކާއި ހިދުމަތް ދޭ ތަންތަނުން ވެސް ކުރަންޖެހޭ ކަމެކެވެ. ވެކްސިން ޖެހުމަށް ބާރު އެޅުމުގެ ގޮތުން ސަރުކާރުން މިހާރު ވެސް ވަނީ ކަންތައްތަކެއް ރާވާފައެވެ. އެ ގޮތުން ވެކްސިން ނުޖަހައި ސްކޫލްތަކަށް ބެލެނިވެރިންނަށް ނުވަދެވުމާއި ސްކޫލްތަކުގެ ޓީޗަރުންނާއި މުވައްޒަފުން ވެކްސިން ފުރިހަމަކުރަންޖެހުން ފަދަ ކަންކަން ވަނީ ކަނޑައަޅާފައެވެ. މީގެ އިތުރުން ވެސް ސަަރުކާރަށް ކުރެވިދާނެ ކަންކަން އެބަހުއްޓެވެ. އެ ގޮތުން ދައުލަތުގެ ހިދުމަތް ދޭ އިދާރާތަކަށް ވެކްސިން ފުރިހަމަނުކޮށް ނުވަދެވޭ ގޮތަށް ހެދުމާއި ކުޅިވަރުކުޅޭ މައިދާންތަކާއި ޕާކްތަކަށް މީހުން ވެއްދުމުގައި ވެސް އެ އުސޫލް ހިފެހެއްޓުން އެއީ ވެކްސިން ޖެހުމަށް ބާރު އެޅުމަކަށް ވާނެއެވެ. ސަރުކާރުގެ އިތުރުން މިހާރު ވެސް ބައެއް ވިޔަފާރިތަކުން ވެކްސިން ޖެހުމަށް ބާރު އެޅުމުގެ ގޮތުން ވެކްސިން ޖަހާ ފަރާތްތަކަށް ޑިސްކައުންޓް ލިބޭ ޕްރޮމޯޝަންތައް ފަށާފައިވާ އިރު އާންމު ވިޔަފާރިތަކާއި ކެފޭ ރެސްޓޯރެންޓްތަކުން ވެސް މި ކަމުގައި ބައިވެރިވާން އެބަޖެހެއެވެ.

ވަކި ފިކުރެއް ނުވަތަ ވިސްނުމެއްގެ ސަބަބުން ވެކްސިން ނުޖަހާ އާބާދީއެއް ވެސް ރާއްޖޭގައި އެބަ އޮތްކަން ގަބޫލުކޮށް އެކަމަށް ވެސް ހައްލުތަކެއް ހޯދަން އެބަޖެހެއެވެ. ވެކްސިން ޖެހުމަކީ އިސްލާމް ދީނާ ހިލާފު ކަމެއްގެ ގޮތުގައި ދެކިގެން ހަރުކަށި ވިސްނުމެއްގައި ތިބި ބަޔަކު ވެސް މި މުޖުތަމައުގައި އެބަ އުޅެއެވެ. އަދި ސްކޫލްތަކަށް ދަރިން ނުފޮނުވުމާއި މިފަދަ އެތައް ކަންކަމެއްގައި މުޖުތަމައުއާ އެކަހެރިވެގެން އުޅޭ ބަޔަކު ތިބި އިރު އެ ފަރާތްތައް ވެސް ވެކްސިން ޕްރޮގްރާމްގެ ތެރެއަށް ގެނައުމަށް ދީނީ އިލްމުވެރިން ބާރު އަޅަން އެބަޖެހެއެވެ. ކިތަންމެ ބޭނުން ނުވިޔަސް އުމުރާއަށާއި ހައްޖަށް ދިއުމަށް މިހާރު ވެސް ވެކްސިން ޖަހަންޖެހޭ އިރު ކޮވިޑް-19ގެ ވެކްސިން ޖެހުމަށް ވެސް މަޖުބޫރީ ހާލަތެއް މެދުވެރިކުރުވަން އެބަޖެހެއެވެ. އެ ގޮތުން ދައުލަތުން ދޭ އާސަަންދަ ފަދަ ހިދުމަތްތައް ފޯރުުކޮށްދިނުމުގައި ވެކްސިން ފުރިހަމަ ކޮށްފައި ވޭތޯ ބެލުމާއި އެއް ރަށުން އަނެއް ރަށަށް ދަތުރުކުރުމުގައި ވެކްސިން ފުރިހަމަކޮށްފައި ވޭތޯ ބެލުން ފަދަ ކަންކަން ތައާރަފްކޮށްފި ނަމަ ވެކްސިން ޕްރޮގްރާމް ކާމިޔާބުކުރުމަށް ބާރަކަށް ވާނެއެވެ.

ކޮވިޑް-19 އިން އަށް މި ވަގުތު އޮތް ހައްލަކީ ވެކްސިނެވެ. ނަމަވެސް ވެކްސިންގެ ފައިދާ ފުރިހަމަ ގޮތުގައި ލިބެން އޮތީ މުޅި އާބާދީ ވެކްސިން ފުރިހަމަ ކޮށްގެންނެވެ. ވެކްސިން ނުލިބިގެން އެތައް ގައުމެއް ގޮތް ހުސްވެފައި ތިބި އިރު ރާއްޖެ އށް ލިބިފައި މިވާ ފުރުސަތު ބޭނުން ހިފަން އެބަޖެހެއެވެ. އެއީ ސަރުކާރުން މަޖުބޫރުކޮށްގެން ވިޔަސް މެއެވެ.