މީހުން ޓްރެފިކް ކުރުމުގެ އަމަލެއް ހިންގުމަކީ ކޮބާ؟

ސަރުކާރުން ދާދިފަހުން ވަނީ މީހުން ޓްރެފިކް ކުރުން ހުއްޓުވުމުގެ ޤާނޫނަށް އިސްލާހުތަކެއް ގެނެސްފައެވެ. މި އިސްލާހުތަކާއިއެކު އިންޓަނޭޝަނަލް ސްޓޭންޑާރޑްތަކާއި އެއްގޮތްވާގޮތުގެ މަތިން މީހުން ޓެރެފިކް ކުރުން ވަނީ މާނަކޮށްފައެވެ.

މީހުން ޓެރެފިކްކުރުން ހުއްޓުވުމުގެ ޤާނޫނުގައިވާ ގޮތުގެ މަތިން މީހުން ޓްރެފިކް ކުރުން ނުވަތަ ޓްރެފިކް ކުރުމުގެ އަމަލެއް ހިންގުމަކީ މީހަކާމެދު އެކްސްޕްލޮއިޓޭޝަންގެ ޢަމަލެއް ހިންގުމުގެ މަޤްޞަދުގައި، އެ މީހަކާމެދު ބާރުގެ ބޭނުންކޮށްގެން ނުވަތަ ބާރުގެ ބޭނުންކުރާނެ ކަމުގެ ބިރުދައްކައިގެން ނުވަތަ އޮޅުވާލައިގެން ނުވަތަ މަކަރު ހަދައިގެން ނުވަތަ އިތުބާރުކުރެވޭ މަޤާމެއްގެ ނަހަމަ ބޭނުންކޮށްގެން ނުވަތަ

advertisement

މީހަކަށް ކުރިމަތިވެފައިވާ ނިކަމެތިކަމެއް ނުވަތަ ނުކުޅެދުންތެރިކަމެއްގެ ބޭނުން ހިފައިގެން ނުވަތަ ފައިސާ ނުވަތަ އެނޫންވެސް މަންފާއެއް ދީގެން ނުވަތަ ޤާނޫނާ ޚިލާފު މަޖުބޫރުކުރުވުމެއް ކުރިމަތިކުރުވައިގެން، އޭނާއާ މެދު ޢަމަލެއް ހިންގުން ހިމެނެއެވެ. އޭގެތެރޭގައި ބޭރު ޤައުމަކުން ދިވެހިރާއްޖެއަށް ގެނައުން ނުވަތަ ބަދަލުކުރުން ނުވަތަ ދިވެހިރާއްޖެއިން ބޭރު ޤައުމަކަށް ފޮނުވުން ނުވަތަ ބަދަލުކުރުމަކީ މީހުން ޓެރެފިކް ކުރުމެވެ. އަދި ދިވެހިރާއްޖޭގެ އެއް ތަނުން އަނެއް ތަނަށް ގެންދިޔުން ނުވަތަ ބަދަލުކުރުމާއި، މީހަކާއި ޙަވާލުވުން ނުވަތަ އޭނާގެ ބެލުމުގެ ދަށުގައި ބެހެއްޓުމާއި، ވަޒީފާއަކަށް ނުވަތަ މަސައްކަތަކަށް ރެކްރޫޓްކުރުން ފަދަ އަމަލުތައް ހިންގުމަކީވެސް މީހުން ޓްރެފިކް ކުރުން ނުވަތަ ޓްރެފިކް ކުރުމުގެ އަމަލެއް ހިންގުންކަމަށް ޤާނޫނުގައި ވަނީ ބުނެފައެވެ.