ވީހާވެސް އަވަހަށް ސްކޫލްތައް ހުޅުވުމަކީ ކުދިންނަށް ރައްކާތެރިގޮތް – ޔުނިސެފް މޯލްޑިވްސް

ސްކޫލްތަކަކީ ކުދިންނަށް ރައްކާތެރިތަނެއްކަމަށާއި އެހެންކަމުން ވީހާވެސް އަވަހަކަށް ސްކޫލްތައް ހުޅުވުމަކީ ކުދިންނަށް އެންމެ ރައްކާތެރި ގޮތްކަމަށް ޔުނިސެފް މޯލްޑިވްސްއިން ވިދާޅުވެއްޖެއެވެ.

ޔުނިސެފް މޯލްޑިވްސްއިން ބުނެފައިވަނީ ސްކޫލަށް ދާކުދިންނާއި އަޅާބަލާއިރު ސްކޫލަށް ނުދާކުދިންނަށް ދިމާވާ އެކިއެކި މައްސަލަތައް ގިނަކަމަށެވެ. އޭގެތެރޭގައި ނަފްސާނީ ގޮތުންނާއި ޖިސްމާނީ ގޮތުން އަދި ޖިންސީ ފުރައްސާރައިގެ އެކިއެކި ކަންކަމަށް ހުށައެޅޭ މިންވަރު އިތުރުކަމަށެވެ. އެހެންކަމުން ސްކޫލްތަކަކީ ކުދިންނަށް ރައްކާތެރި އަދި ކުދިންގެ ކުރިއެރުމަށް ނުހަނު މުހިންމު ތަނެއްކަމަށް ވަނީ ބުނެފައެވެ. އެހެންކަމުން ސްކޫލްތައް ވީހާވެސް އަވަހަކަށް ހުޅުވުމަށް ސަރުކާރުން އިސްކަންދޭންޖެހޭކަމަށް ވަނީ ވިދާޅުވެފައެވެ.

advertisement

ކޯވިޑް19 ގެ ސަބަބުންވެސް ގިނަ ކުދިންނަށް ނަފްސާނީ އަދި ޖިސްމާނީ ގިނަ މައްސަލަތަކާއި ވަނީ ކުރިމަތިލާންޖެހިފައެވެ. އަދި ގިނަ އަދަދެއްގެ ކުދިންނެއް ސްކޫލުން ކެނޑިފައިވާކަމަށްވެސް ޔުނިސެފުން ވަނީ ވިދާޅުވެފައެވެ.

މިމަހުގެ 10 ވަނަ ދުވަހު ކޯވިޑް19 އަށްފަހު އަލުން ސްކޫލްތައް ހުޅުވުމަށް އެޑިޔުކޭޝަން މިނިސްޓްރީން ވަނީ ނިންމަވާފައެވެ.