ރިޕޯޓު: ބޮޑު ބަދަލަކާ އެކު ތައުލީމީ އާ އަހަރަށް ތައްޔާރު!

ރާއްޖޭގެ ތައުލީމީ ހަޔާތުގައި މި ހަފުތާގެ އަންގާރަ ދުވަހަކީ އެތައް ގޮތަކުން ފާހަގަކޮށްލެވޭ ދުވަހެކެވެ. ދިރާސީ އާ އަހަރު ފެށޭ ދުވަސް، އަހަރުގެ މެދު ތެރެއަށް ބަދަލުކުރުމަށް ފަހު އަންގާރަ ދުވަހު މި އަހަރުގެ ދިރާސީ އާ އަހަރު ފެށުމަށް ސްކޫލްތައް މި ވަނީ ތައްޔާރުވެފައެވެ. މި ބަދަލާ މެދު އެކި ފަރާތްތަކުން ދެކެނީ އެކި ގޮތަށެވެ. އެއްބައެއްގެ ނަޒަރުގައި މިއީ ހެޔޮ ބަދަލެކެވެ. މި ބަދަލާ މެދު ހިތްހަމަނުޖެހޭ ބަޔަކު ވެސް އެބަ ތިއްބެވެ. ހަމަ އެ ގޮތަށް މިއީ މަޖުބޫރީ ހާލަތަކުން ގެނެވުނު ބަދަލެއް ކަމުގައި ދެކޭ މީހުން ވެސް އެބަ ތިއްބެވެ.

ފާއިތުވި ދިރާސީ އަހަރުގެ ތެރޭގައި ދަރިވަރުންނާއި ޓީޗަރުން އަދި ބެލެނިވެރިންނަށް ވެސް ބޮޑެތި ގޮންޖެހުންތަކެއް ކުރިމަތިވިއެވެ. ކޮވިޑް ފެތުރި ސްކޫލްތައް ބަންދުކުރަންޖެހުމުން ކިޔަވައިދިނުމާއި ކިޔެވުމުގައި ވެސް މީގެ ކުރިން ތަޖުރިބާކުރަން ނުޖެހޭ އެތައް ކަމެއް ތަޖުރިބާކުރަން ޖެހުނެވެ. މިދިޔަ އަހަރުގެ ކިޔެވުން ފެށިގެން މާ ގިނަ ދުވަހެއް ނުވެ ކޮވިޑް-19ގެ ސަބަބުން ސްކޫލްތައް ބަންދުކުރަން ޖެހުމުން ކިޔެވުން ކުރިއަށް ގެންދަންޖެހުނީ ޓެލެކްލާސްތަކާއި އޮންލައިންކޮށެވެ. އެކަން ވެސް ވީ ސްކޫލްތަކާއި ބެލެނިވެރިންނަށް އަދި ދަރިވަރުންނަށް ވެސް ވަރަށް ބޮޑު ގޮންޖެހުމަކަށެވެ.

advertisement

އިންޓަނެޓްގެ ހިދުމަތް ހުރިހާ ދަރިވަރުންނަށް ލިބޭ ގޮތް ނުވުމާއި ޓީވީގެ ހިދުމަތް ނުލިބުމާއި ވަސީލަތްތައް ނެތުމުން ވަރަށް ގިނަ ދަތިތައް ކުރިމަތިވިއެވެ. ތައުލީމީ ދާއިރާގެ އެތައް ބައެއްގެ މަސައްކަތުން ދަރިވަރުންނަށް ފިލާވަޅުތައް ލިބޭނެ މަގު ތަނަވަސްކުރިއެވެ. ނަމަވެސް ކޮންމެ ބެލެނިވެރިއަކީ އެފަދަ ކަންކަމަށް އަހްލުވެރި މީހަކަށް ނުވުމާއި ވަގުތު ވެސް އެވަރަށް އޮންނަ ބަޔަކަށް ނުވާތީ ދަރިވަރުންނަށް، ހާއްސަކޮށް ދަށް ގްރޭޑްތަކުގެ ދަރިވަރުންނަށް ފިލާވަޅުތައް ހެދުމުގައި ބޮޑެތި ގޮންޖެހުންތަކެއް ކުރިމަތިވިއެވެ. އަދި ގިނަ ދުވަސްތަކެއް ވަންދެން ގޭތެރޭގައި އެއް މާހައުލެއްގައި ތިބެންޖެހުމުން ކިޔެވުމަށް ހުރަސްތައް ކުރިމަތިވެ، ނަފްސާނީ ގިނަ މައްސަލަތަކެއް ކުރިމަތިވިއެވެ.

ކޮވިޑްގެ ސަބަބުން ދަރިވަރުންނަށް ފިލާވަޅުތައް ފޯރުކޮށްދިނުމަށް ހުރަސްތައް ކުރިމަތިވުމާއި ބައިނަލްއަގުވާމީ އިމްތިހާނުތަކުގައި ބައިވެރިވެވޭ ގޮތް ނުވުމުގެ ސަބަބުން ސަރުކާރަށް ޖެހުނީ ދިރާސީ އަހަރު ވެސް ދިގު ދައްމާލަންށެވެ. މިކަން ކުރިމަތިވި އިރު ވެސް ސަރުކާރުގެ ވައުދުގެ ތެރެއިން އަހަރީ ޗުއްޓީ ބަދަލުކުރުމުގެ މަޝްވަރާތައް އޮތީ ފެށިފައެވެ. ރިސޯޓްތަކުގައި މަސައްކަތްކުރާ އެތައް ހާސް މުވައްޒަފުންނަށް ޑިސެމްބަރާއި އާ އަހަރުގައި ޗުއްޓީ ނުލިބޭތީ ކުރަމުންދިޔަ ޝަކުވާތަކަށް ހައްލެއް ހޯދައިދިނުމުގެ ގޮތުން، ޑިސެމްބަރުގެ އަހަރީ ޗުއްޓީ ދެ ބަޔަކަށް ބެހުމަށް ސަރުކާރުން އައި މަޝްވަރާކުރަމުންނެވެ. އެ ކަމުގައި އާންމުންގެ މެދުގައި ހިޔާލު އޮތީ ދެކަފި ވެފައެވެ. އެއްބަޔަކު ދެކޭ ގޮތުގައި ސްކޫލްތަކުގެ ބޮޑު ޗުއްޓީ ޓުއަރިޒަމް އިންޑަސްޓްރީގެ އޮފް ސީޒަން ނުވަތަ އަހަރުގެ މެދު ތެރެއަށް ބަދަލުކުރި ނަމަވެސް މުޅި މައްސަލަ އަށް ހައްލެއް ނާންނާނެއެވެ. އަދި ޖޫން ޖުލައިގެ ވިއްސާރައިގެ ސަބަބުން ދަތުރުފަތުރުކުރުން ފަދަ ކަންކަމަށް ހުރަސްތައް ކުރިމަތިވާނެތީ އެންމެ އެކަށީގެންވާ ގޮތުގައި ޗުއްޓީގެ ބޭނުން ނުހިފޭނެ ކަމަށް ބައެއް މީހުން ދެކެއެވެ. ބޮޑު ޗުއްޓީ ދެ ބަޔަކަށް ބަހާލުމުން ވެސް ބައެއް ފަރާތްތަކުން މި ގޮތަށް ވާހަކަ ދެއްކިއެވެ.

ދިރާސީ އަހަރު ފެށުން އޯގަސްޓަށް ބަދަލުކުރުމުގެ ފައިދާތައް ގިނަ ކަމަށް އަނެއް ބަޔަކު ދެކެއެވެ. ހާއްސަކޮށް ބޭރު ގައުމުތަކުގެ ދިރާސީ އަހަރާ އެއްގޮތްވުމުން އިމްތިހާނުތައް ހަދާ ދަރިވަރުންނަށް އޭގެ ފައިދާ ބޮޑުވާނެއެވެ. އަދި އޯ ލެވެލް އަދި އޭ ނިންމާ ދަރިވަރުން ވެސް ކުރިން އޮތް ގޮތުން ހައެއްކަ މަސް މަޑުކުރަންޖެހެއެވެ. ކޯސްތަކަށް ކުރިމަތިލާ ފަރާތްތަކަށް ވެސް މި ބަދަލާ އެކު ފަސޭހަތަކެއް ލިބިގެންދާނެ ކަމަށް ބެލެވެއެވެ.

ދިރާސީ އަހަރަށް ގެނެވުނު އާ ބަދަލާ އެކު ބައެއް ކަންކަމުގައި ފުރަތަމަކޮޅު ދަތިތަކެއް ހުރުން އެކަށީގެން ވެއެވެ. ނަމަވެސް މިއީ ތަޖުރިބާ އަށް ބަލައި ކުރިއަށް އޮތްތަނުގައި ކަންކަން ރަނގަޅުކުރުމަށް ވެސް ލިބޭ ފުރުސަތެކެވެ. ހާއްސަކޮށް ކޮވިޑްގެ ތެރޭގައި ތައުލީމީ ދާއިރާ އިން ކުރެވުނު ތަޖުރިބާތަކަށް ބަލައި ކިޔަވައިދިނުމުގެ ވައްޓަފާޅި އަށް ބޮޑެތި ބަދަލުތަކެއް އައުން އެކަށީގެން ވެއެވެ. ފިޒިކަލްކޮށް ސްކޫލުގައި ދެވޭ ފިލާވަޅުތަކައި ހަވާލުކުވޭ މަސައްކަތްތައް މަދުކޮށް އޮންލައިން މެދުވެރިކޮށް ކުރެވޭ މަސައްކަތްތައް ކުރިއަށް އޮތްތަނުގައި އިތުވާނެ ކަމަށް ބެލެވެއެވެ. ހާއްސަކޮށް ޒަމާނީ ވަސީލަތްތަކުގެ އެހީގައި ކިޔެވުމުގެ ވައްޓަފާޅި ވަރަށް ބޮޑަށް މިހާރު ވެސް ވަނީ ބަދަލުވެފައެވެ.

ސްކޫލަށް ހާޒިރުވެގެން ކިޔެވުން ފެށި ނަމަވެސް ކޮވިޑް-19 މުޅިން ފިލައިގެން ނުދާކަން ހަނދާނުގައި ބަހައްޓަންޖެހެއެވެ. ރައްކާތެރިކަމުގެ ފިޔަވަޅުތައް އަދިވެސް އަޅަންޖެހެއެވެ. ސްކޫލްތަކުން ވެސް އެކަންކަން ކަށަވަރުކުރަންޖެހެއެވެ. އެކަން ކަށަވަރުކުރުމަށް ސަރުކާރުން މިހާރު ވެސް ވަނީ ސިޔާސަތުތަކެއް ކަނޑައަޅާފައެވެ. އެ ގޮތުން ވެކްސިން ނުޖަހާ ފަރާތްތަކަށް ސްކޫލްތަކަށް ވަނުން މަނާކޮށްފައިވާ އިރު 12 އަހަރުން މަތީގެ ދަރިވަރުންނަށް ވެކްސިން ޕްރޮގްރާމެއް ވެސް އަންނީ އެކުލަވާލަމުންނެވެ. ދިރާސީ އާ އަހަރުގެ އާ ބަދަލާ އެކު ސްކޫލްތަކާއި ދަރިވަރުން އަދި ބެލެނިވެރިން ވެސް މި ފަށަނީ އާ ދަތުރެކެވެ.