އަނެއްކާވެސް ރެޑްކްރެސެންޓުގެ ނަމޫނާ މަސައްކަތެއް

ކޯވިޑް19 އާއިއެކު ދިރިއުޅުމުގެ ގިނަ ކަންކަމަށް ވަނީ ބަދަލުތަކެއް އައިސްފައެވެ. ޚާއްސަކޮށް ގިނަ ވަގުތު ގޭގައި ތިބެންޖެހުމާއި ގުޅިގެން ނަފްސާނީ ގިނަ ކަންކަމާއިވެސް ކުރިމަތިލާންޖެހިފައިވެއެވެ. އުމުރުން ދޮށީ މީހުންނަށް ކޯވިޑް19 އާއިއެކު ދިމާވި ނަފްސާނީ މައްސަލަތައް އިތުރެވެ. އެހެންކަމުން އުމުރުން ދޮށީ މީހުންނަށް މި ދަނޑިވަޅުގައި އަޅާލުމާއި އެހީ ވަނީ ބޭނުންވެފައެވެ.

ދިވެހި ރެޑްކްރެސެންޓަކީ ޤައުމަށް ދިމާވާ ކޮންމެ ކަމެއްގައިވެސް އެހީތެރިވުމަށް އެންމެ ކުރީގައި ހަރަކާތްތެރިވާ ޖަމިއްޔާއެކެވެ. ރެޑްކްރެސެންޓުން ބުނެފައިވަނީ ކޯވިޑް19 ގެ މި ދަނޑިވަޅުގައި އުމުރުން ދޮށީ މީހުންނަށް ކުރެވިދާނެ ސޯސަލް އެކްޓިވިޓީތައް މަދުވެފައިވާކަމަށެވެ. އެހެންކަމުން އެމީހުންނަށް އޯގާތެރިކަމާއި ރަހުމަތްތެރިކަމާއިއެކު ވާހަކަދައްކާލުމަކީވެސް މި ދަނޑިވަޅުގައި ކުރެވޭނެ ވަރަށް މުހިންމުކަމެއްކަމަށެވެ.

ދިވެހި ރެޑްކްރެސެންޓުގެ ހދ. ބްރާންޗުގެ ވޮލެންޓިއަރުން އުމުރުން ދޮށީ މީހުންގެ ހާލު މި ހާލަތުގައިވެސް ބަލަމުންދާކަމަށް ރެޑްކްރެސެންޓުން ބުނެއެވެ. މި ހާލަތުގައި ގުޅާ އެމީހުންގެ ހާލުބެލުމަކީ އެމީހުންގެ ދުޅަހެޔޮކަމަށްވެސް ކޮށްދެވޭ ވަރަށް މުހިންމުކަމެއްކަމަށް ރެޑްކްރެސެންޓުން ބުނެއެވެ.