އެޗްއާރުސީއެމްއިން ފިޔަވައްޗަށް ފޮލޯ-އަޕް ޒިޔާރަތެއްކޮށްފި

ފިޔަވައްޗަށް ހިއުމަން ރައިޓްސް ކޮމިޝަންގެ ނޭޝަނަލް ޕްރިވެންޓިވް މެކޭނިޒަމްއިން މައުލޫމާތުހޯދުމަށް ފޮލޯ އަޕް ޒިޔާރަތެއްކޮށްފިއެވެ. އެޗްއާރުސީއެމްއިން ވިދާޅުވީ މިއީ ރައީސް އޮފީހާއި ރައްޔިތުންގެ މަޖިލީހާއި އަދި ޖެންޑަރ މިނިސްޓްރީން 2018 ވަނަ އަހަރުގެ ޖަނަވަރީ މަހު ހުށައަޅާފައިވާ ރިޕޯޓުގައިވާ ކަންކަން ތަންފީޒުވެފައިވާ މިންވަރު ބެލުމަށް ކުރި ޒިޔާރަތެއްކަމަށެވެ.

މި ޒިޔާރަތުގައި ފިޔަވަތީގެ މިހާރުގެ ހާލަތު ބަލައި ފިޔަވަތީގައި ބަލަހައްޓަމުންދާ ކުދިންނާއި ދޭތެރޭ އަނިޔާވެރި ލާއިންސާނީ ނުވަތަ ދަށުދަރަޖައިގެ އަމަލެއް ހިނގާތޯއާއި އެފަދަ ކަމަކަށް މަގުފައިވާ ކަމެއް ހިނގާތޯ ބަލާފައިވާނެކަމަށް އެޗްއާރުސީއެމްއިން ވިދާޅުވެއެވެ. މީގެއިތުރުން ދައުލަތު ބެލުމުގެ ދަށުގައިތިބޭ ކުދިންނަށް ލިބެންޖެހޭ ހައްޤުތައް ކަށަވަރުކުރެވިފައިވާ މިންވަރާއި ފިޔަވަތީގައި މަސައްކަތްކުރާ މުވައްޒަފުންގެ ހާލަތުވެސް ބަލާފައިވާނެކަމަށް އެ ކޮމިޝަނުން ވިދާޅުވެއެވެ.

މި ޒިޔާރަތުގައި ފާހަގަވި ކަންކަމަށް ބަލައި އަވަސް ކަރުދާހެއް ގިނަވެގެން 3 ދުވަސް ތެރޭގައި މަރުކަޒަށް ހަވާލުކުރެވޭނެކަމަށް އެޗްއާރުސީއެމްއިން ވިދާޅުވެއެވެ. މި ޒިޔާރަތުގެ މައްޗަށް ބިނާކޮށް ލިޔާ ރިޕޯޓު އެ މަރުކަޒާއި ޖެންޑަރ މިނިސްޓްރީއާއި ކަމާގުޅުންހުރި އެހެން އިދާރާތަކަށް ފޮނުވާނެކަމަށްވެސް އެޗްއާރުސީއެމް އިން ވަނީ ވިދާޅުވެފައެވެ.