ދިވެހި ރެޑްކްރެސެންޓް، ޚިދުމަތުގައި 12 އަހަރު

ދިވެހި ރެޑްކްރެސެންޓު އުފެދިފައިވަނީ އޮގަސްޓް މަހުގެ 16 ވަނަ ދުވަހުއެވެ. ދިވެހި ރެޑްކްރެސެންޓަކީ ޤައުމަށް ދިމާވާ ކޮންމެ ކަމެއްގައި އެންމެ ކުރީސަފުގައި މަސައްކަތްކުރާ އެއް ޖަމިއްޔާއެވެ.

އަހަރީ ދުވަހާއި ގުޅުވައިގެން ރެޑް ކްރެސެންޓުން ކޮށްފައިވާ ޓްވިޓެއްގައި ބުނެފައިވަނީ ދިވެހި ރެޑްކްރެސެންޓުގެ ޚިދުމަތައް 12 އަހަރު ފުރިފައިވާކަމަށެވެ. 12 އަހަރުގެ އިންސާނީ އެހީ ފޯރުކޮށްދިނުމުގައި ހޭދަކޮށްފައިވާކަމަށް ރެޑް ކްރެސެންޓުން ވަނީ ބުނެފައެވެ.

advertisement

12 އަހަރުގެ ދިގު މާޒީގައި ގިނަ ބަޔަކަށް ޝުކުރު ހައްޤުވާކަމަށް ރެޑް ކްރެސެންޓުން ވަނީ ބުނެފައެވެ. އޭގެތެރޭގައި އެ ޖަމިއްޔާގެ ވޮލެންޓިއަރުންނާއި، މެންބަރުންނާއި، ސްޓާފުންނާއި، ޕާޓްނަރުން ވަނީ ފާހަގަކޮށްފައެވެ.

ދިވެހި ރެޑްކްރެސެންޓުގެ މާލެ ބޯޑުގެ މެންބަރަކު ދުވަހާއި ގުޅިގެން ބުނެފައިވަނީ ދަރުމަވެރިން ވޭތުވެދިޔަ 12 އަހަރު އިންސާނިއްޔަތައްޓަކައި ކޮށްދެއްވި އަގުނުކުރެވޭ ފަދަ މަސައްކަތައް ދިވެހި ރެޑްކްރެސެންޓް މާލެ ބޯޑުގެ ފަރަތުން ޝުކުރު އަދާކުރާކަމަށެވެ. އަދި މުސްތަޤްބަލުގައިވެސް ވީހާވެސް ގިނަ ދަރުމަވެރިން މި މަސައްކަތުގައި ބައިވެރިވެ އިންސާނިއްޔަތައްޓަކައި އެހީތެރިވުމުގައި ދެމިތިބުމަކީ އުންމީދެއްކަމަށް ވަނީ ބުނެފައެވެ.

މިފަހުން މުޅި ދުނިޔެއަށް ދިމާވި ކޯވިޑް19 ގެ މަލިމަޑުކަމުގައިވެސް ދިވެހި ރެޑްކްރެސެންޓުން ވަނީ ނަމޫނާ ގިނަ މަސައްކަތްތަކެއް ދައްކާފައެވެ. މުޖްތަމައުއަށް އެހީތެރިކަން ފޯރުކޮށްދިނުމަށް އެ ޖަމިއްޔާއިން ކޮށްފައިވާ މަސައްކަތް ނުހަނު ގިނައެވެ. ކޯވިޑާއިއެކު ސައިކޯސޯސަލް ސަޕޯޓް ބޭނުންވާ ފަރާތްތަކަށް އެ އެހީތެރިކަން ވަނީ ފޯރުކޮށްދީފައެވެ. ކާނެއެއްޗެއް ނުލިބިވި އާއިލާތަކަށް އެކަމުގައި އެހީތެރިވެދިނެވެ. ވެކްސިން ޖެހުމުގެ ޤައުމީ ކެމްޕެއިންގެ ތެރެއިންވެސް ފެނިގެންދިޔައީ ދިވެހި ރެޑްކްރެސެންޓުގެ ނުގުޑާފަދަ ވަރުގަދަ އަޒުމަކާއިއެކު ޤައުމަށް ޙިދުމަތްކުރުމުގައި ދެމިތިބި މަންޒަރެވެ. ކޯވިޑާއިއެކު ނިކަމެތިވެގެންދިޔަ ރާއްޖޭގައި މަސައްކަތްކުރާ ބިދޭސީންގެ ހައްޤުތައް ކަށަވަރުކޮށްދިނުމުގައިވެސް ރެޑް ކްރެސެންޓުގެ ދައުރު ބޮޑެވެ.

ދިވެހި ރެޑްކްރެސެންޓުގައި ގިނައަދަދެއްގެ ވޮލެންޓިއަރުން ހިލޭ ސާބަހަށް އަންނަނީ މަސައްކަތްކުރަމުންނެވެ. ހަޤީޤަތުގައި ރެޑްކްރެސެންޓަށް 12 އަހަރު ފުރިގެންދާއިރު ވޮލެންޓިއަރުންގެ މަސައްކަތަކީ ފާހަގަކޮށްލަންޖެހޭފަދަ މުހިންމު މަސައްކަތްތަކެކެވެ.