ހުޅުމާލޭގައި އަޅާ 1000 ހައުސިންގ ޔުނިޓްގެ މަސައްކަތް 2023 ގައި ނިމޭނެ

ސަރުކާރުން އެޕޯލޯ ހޯލްޑިންސްއާއި ހަވާލުކޮށްގެން ހުޅުމާލޭގައި ކުރިއަށްގެންދާ 1000 ހައުސިންގ ޔުނިޓްގެ މަސައްކަތް 2023 ވަނަ އަހަރުގެ ކުރީކޮޅު ނިމޭނެކަމަށް އެޗްޑީސީން ވިދާޅުވެއްޖެއެވެ.

ސަރުކާރުގެ ބޯހިޔާވަހިކަމުގެ މަޝްރޫޢުގެ ތެރެއިން ހުޅުމާލޭގައި އަޅާ 1000 ހައުސިން ޔުނިޓް އެޅުމުގެ ޢަމަލީ މަސައްކަތް ފަށާފައިވަނީ މިދިޔަ ޖޫންމަހުގެ ތެރޭގައެވެ. މިއީ ސަރުކާރުން ކުރިއަށް ގެންދަން ރާވާފައިވާ މިކްސްޑް ރެސިޑެންޓް ހައުސިންގ ޕްރޮޖެކްޓުގެ ބައެއްވެސް މެއެވެ.

advertisement

1000 ހައުސިންގ ޔުނިޓްގެ މި މަޝްރޫޢުގައި އެކި ރޭންޖްގެ ހައުސިންގ ޔުނިޓްތައް ހިމެނެއެވެ. މި މަޝްރޫޢަކީ ކޮންޓްރެކްޓަރ ފައިނޭންސް އުސޫލުން ހިންގުމަށް ހަމަޖެހިފައިވާ މަޝްރޫޢުއެކެވެ. މިގޮތުން މި މަޝްރޫއުގައި އަޅާ ހައުސިން ޔުނިޓްތަކުގައި ކައުންސިލް ހައުސިންގް އާއި އެފޯޑަބަލް ހައުސިންގެ އިތުރުން މިޑް ރޭންޖްގެ ހައުސިން ޔުނިޓްތައް ހިމެނެއެވެ. މި މަޝްރޫޢުގެ މަސައްކަތް ކުރިއަށްދާނީ ހުޅުމާލެ ފުރަތަމަ ފިޔަވައްސާއި ދެވަނަ ފިޔަވަހީގައި އެކި ޒޯންތަކަށް ބަހާލައިގެންނެވެ.

މި މަޝްރޫއުގެ ދަށުން 2 ކޮޓަރިއާއި 3 ކޮޓަރީގެ އެޕާޓްމަންޓްތައް އަޅާނެއެވެ. މިޑް ލެވެލް ހައުސިންއަކީ ޕްރޮޖެކްޓް ހިންގާ ފަރާތުން ކަނޑައަޅާފައިވާ އަގުތަކަކަށް ވިއްކުމަށް ހަމަޖެހިފައިވާ ޔުނިޓްތަކެކެވެ. މިގޮތުން ޑިވެލޮޕަރުގެ ފަރާތުން ވިއްކުމަށް ހަމަޖެހިފައިވާ މިޑް ލެވެލް ހައުސިންގ ޔުނިޓްތަކުގެ އަގެއްގެ ގޮތުގައި އަކަފޫޓަކަށް 2400 ރުފިޔާއަށްވުރެ ބޮޑުނޫން އަގެއް ހަމަޖެއްސުމަށް ވަނީ އެއްބަސްވެފައެވެ.

މާލެ ސަރަޙައްދުގެ ބޯހިޔާވަހިކަމުގެ މައްސަލައަށް ހައްލެއް ގެނައުމަށް ޚާއްސަ މަސައްކަތްތަކެއް ކުރައްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ވިދާޅުވެފައެވެ. މިގޮތުން މާލެއަށް ދިމާވެފައިވަ ބޯހިޔާވަހިކަމުގެ މައްސަލަ ޙައްލުކޮށް ދެއްވުމަށްޓަކައި މިދައުރުގެ ތެރޭގައި 15000 ހައުސިން ޔުނިޓް ޢިމާރާތްކޮށްދެއްވާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.