އިސްލާމީ ޝަރީޢަތުގައި އަދި ޤާނޫނުގައި މަނާކޮށްފައިނުވާ ކަންކަން ކުރުމުގެ މިނިވަންކަން ރައްޔިތުންނަށް ލިބިގެންވޭ: ހިސާން

އިސްލާމީ ޝަރީޢަތުގައި ނުވަތަ ޤާނޫނުގައި ކަނޑައެޅިގެން މަނާކޮށްފައިނުވާ ކޮންމެ ކަމެއްކުރުމުގެ މިނިވަންކަން ކޮންމެ ރައްޔިތަކަށްމެ ލިބިގެންވާކަމަށް ރައްޔިތުންގެ މަޖިލީހުގެ މެންބަރު ޙިސާން ޙުސައިން ވިދާޅުވެއްޖެއެވެ.

މިހެން ވިދާޅުވެފައިވަނީ އިސްލާމް ދީނަށް ފުރައްސާރަކުރުން ހުއްޓުވުމަށް ޤާނޫނުލް އުޤޫބާތަށް ހުށައެޅުއްވި އިޞްލާހުގެ ބިލާމެދު ވާކަދައްކަމުނެވެ. އަދި ހަމަ އެހެންމެ ހިސާން ވިދާޅުވީ މި ބިލް ހުށައަޅާފައިވަނީ ދީނުގެ އަސާސްތައް ނަގަހައްޓައި، ދީނީ އެއްބައިވަންތަކަން ދެމެހެއްޓުމަށް ކަމަށެވެ.

advertisement

ރައްޔިތުންގެ މަޖިލީހުގެ މިއަދުގެ ޖަލްސާއަށް ބިލު ހުށައަޅުއްވަމުން ތުޅާދޫ ދާއިރާގެ މެންބަރު ޙިސާން ޙުސައިން ވިދާޅުވީ، ދިވެހިރާއްޖެއަކީ އިސްލާމީ ގައުމެއްކަމަށާއި، ރާއްޖޭގެ މުޅި ދައުލަތް ތަރުތީބުވެ ބައްޓަންކުރަންވާނީ އިސްލާމީ އުސޫލުތަކުގެ މައްޗަށްކަމަށެވެ. އަދި އެކަން ޤާނޫނުއަސާސީގައި ވަރަށް ސާފުކޮށް ބަޔަންކޮށްފައިވާކަން ފާހަގަކުރައްވަމުން ޙިސާން ވިދާޅުވީ، އިސްލާމީ ޝަރީޢަތުގައި ނުވަތަ ޤާނޫނުގައި ކަނޑައެޅިގެން މަނާކޮށްފައިނުވާ ކޮންމެ ކަމެއްކުރުމުގެ މިނިވަންކަން ކޮންމެ ރައްޔިތަކަށްމެ ލިބިގެންވާކަމަށެވެ.

“ވަކި މީހަކީ ކާފަރެއް ކަމުގައި ލޭބަލްކޮށް، އޭނާގެ ފުރާނަ ނުރައްކަލަށް ހުށަހެޅިދާނޭ ފަދަ ވާހަކަ ދެއްކުން ކުށަކަށް ހެދުމަށްޓަކައި މި މަޖިލީހަށް ސަރުކާރުން ބިލެއް ހުށަހަޅާފައިވޭ. އޭގެ ބޭނުމަކީ އެފަދަ ކަންކަމުން އުފެދޭ ފިތުނަތަކުން ދުރުވުން. އަޅުގަނޑުމެންގެ ދީނީ އެއްބައިވަންތަކަމަށް ލޮޅުން އެރިޔަ ނުދިނުން. އެ ބިލުގެ މަގުސަދާއި، މި ބިލުގެ މަގުސަދަކީވެސް، އިސްލާމް ދީނުގައި، އެފަދަ ކަންކަމުގައި ކަނޑައަޅާފައި ހުރި ހަރުދަނާ އުސޫލުތައް ނެގެހެއްޓުން.” ހިސާން ވިދާޅުވިއެވެ.