“އަހަރުމެންގެ ސަގާފަތް ތަންދެނީ ދެމެހެއްޓެނިވި މަސްވެރިކަމަށް”

ރާއްޖޭގައި ކުރާ ދޮށީގެ މަސްވެރިކަމަކީ މުޅި ދުނިޔެއަށްވެސް މަޝްހޫރު މަސްވެރިކަމެކެވެ. ސަބަބަކީ ރާއްޖޭގެ ދޮށީގެ މަސްވެރިކަން ކުރަނީ ފަހަރަކު މަހެއް ބާނައިގެންނެވެ. މިގޮތައް މަސްވެރިކަން ކުރުމަކީ ދާޖަހައިގެން މަސްވެރިކަން ކުރުމާއި އަޅާބަލާއިރު ތިމާވެއްޓާއި އެންމެ ރަހުމަތްތެރި ގޮތެވެ.

މުޅި ދުނިޔޭގައިވެސް ދަޅުގައި ބަންދުކުރި މަހުގެ ތެރެއިން %10 އަކީ ދޮށީގެ މަސްވެރިކަމުގައި ބާނާ މަހުން ތައްޔާރުކޮށްފައިވާ މަސްދަޅެވެ. މީގެތެރެއިން ބޮޑު ބަޔަކީ ވެސްޓާން އަދި ސެންޓްރަލް ފެސިފިކް ސަރަހައްދާއި ރާއްޖެއިން ބާނާ މަހެވެ.

advertisement

ރާއްޖޭގައި ކުރާ ދޮށީގެ މަސްވެރިކަމަކީ މުޅި ދުނިޔޭންވެސް ބަލައިގަނެފައިވާ މަސްވެރިކަމެކެވެ. ރާއްޖެއިން ދޮށީގެ މަސްވެރިކަން ކުރާގޮތަކީ ތިމާވެއްޓާ އެންމެ ރަޙުމަތްތެރި އަދި ދެމެހެއްޓެނިވި ގޮތްކަމާއި އަދި އޭގެ ސަބަބުން ކަނޑުއަޑީގެ ދިރުންތަކަށްވެސް އޭގެ ގެއްލުން ނުފޯރާކަމުގައި ބައިނަލްއަޤްވާމީ ޕްލެޓްފޯމްތަކުގައި ސަރުކާރުން އަންނަނީ ބުނެދެމުންނެވެ. އެހެންކަމުން މީއީ މަހުގެ ސްޓޮކަށްވެސް ގެއްލުންނުވެ ކަނޑުގެ ދިރުންތައް ދެމެހެއްޓެނިވި ގޮތެއްގައި ހިމާޔަތްކުރުމަށް ބާރުލިބިގެންދާ ކަމެއްގެ ގޮތުގައި ސަރުކާރުން ފާހަގަކުރެއެވެ.

ދާދިފަހުން ބޭއްވި އިންޑިއަން އޯޝަން ޓޫނާ ކޮމިޝަނުގެ 25 ވަނަ ސެޝަނުގައި، ރީނދޫ އުރަހަ ކަންނެއްލި އަދި ކަޅުބިލަމަހުގެ މަސްވެރިކަން އޭގެ ސްޓޮކަށް ގެއްލުންވާ މިންވަރަށް ކުރަމުންދާތީ އެ ބާވަތްތަކުގެ މަހުގެ ސްޓޮކް ދިރުވާ އާލާ ކުރުމަށާއި ދެމެހެއްޓެނިވި ގޮތެއްގައި އެ ބާވަތްތަކުގެ މަސްވެރިކަން ކުރުމާބެހޭގޮތުން ރާއްޖެއިން ވަނީ އަޑުއުފުލާފައެވެ.