ރިޕޯޓު: ވެލާނާ އިންޓަރނޭޝަނަލް އެއާޕޯޓުގެ ހުރިހާ ކަމެއް ބޮއްސުންލާފައި!

މީގެ ކުރިން ވެލާނާ އިންޓަނޭޝަނަލް އެއާޕޯޓުގައި ކުރިމަތިވާ އެންމެ ބޮޑު އެއް މައްސަލައަލީ ފުރާޅުން ފެން ފޭބުމެވެ. ނުވަތަ ވިއްސާރަ ދުވަސްވަރެއް ނަމަ ފެންބޮޑުވުމުގެ މައްސަލައެވެ. މި ކަންކަން ކުރިމަތިވުމުން އެއާޕޯޓް މެނޭޖްމަންޓުން އަބަދު ވެސް އަންނަނީ ވަގުތީ ހައްލެއް ހޯދަމުންނެވެ. ސަބަބަކީ ދާއިމީ ހައްލެއް ލިބެން އޮތީ ޒަމާނީ ފެންވަރުގެ އާ ޓާމިނަލެއް ލިބިގެން ކަމަށް ވާތީއެވެ. ނަމަވެސް މިއަދު ކުރިމަތިވެގެން މިއުޅެނީ އާ ޓާމިނަލެއް ނެތުމުގު މައްސަލައެއް ނޫނެވެ. އެއާޕޯޓް މެނޭޖްކުރުމުގެ މައްސަލައެކެވެ.

މި ދުވަސްވަރަކީ ގިނަ އަދަދަކަށް ދެކުނު އޭޝިޔާގެ ޓުއަރިސްޓުން 14 ދުވަހުގެ ޓްރާންސިޓް މަންޒިލެއްގެ ގޮތުގައި ރާއްޖެ ޒިޔާރަތްކުރަމުން އަންނަ ދުވަސްވަރެކެވެ. އިންޑިއާ އާއި ޕާކިސްތާނު ފަދަ ދެކުނު އޭޝިޔާގެ ބައެއް ގައުމުތަކުން މެދުއިރުމަތީ އަދި ޔޫރަޕްގެ ބައެއް ގައުމުތަކަށް ދަތުރުކުރާ މަސައްކަތްތެރިންނާއި ހިޖުރަކުރާ ފަރާތްތަކަށް ޑައިރެކްޓްކޮށް ނުދެވޭތީ އާއި ސޭފް ލިސްޓްގައި ހިމެނޭ ގައުމެއްގައި 14 ދުވަހުގެ މުއްދަތެއް ހޭދަކުރަންޖެހޭތީ ގިނަ ބަޔަކު މިސްރާބު ޖަހާފައި ވަނީ ރާއްޖެއަށެވެ. އެހެންކަމުން ޕާކިސްތާނާއި އިންޑިއާ ފަދަ ގައުމުތަކުން ކޮންމެ ދުވަހަކު ވެސް އެތައް ހާސް ފަސިންޖަރުންނެއް ރާއްޖެ އާދެއެވެ. ގެސްޓް ހައުސްތަކާއި ޓުއަރިސްޓް ހޮޓާ އަދި ބައެއް ރިސޯޓްތައް ވެސް ވަނީ ފުރާލާފައެވެ. މި ހުރިހާ ފަރާތްތައް ވެސް އަންނަނީ ވެލޭނާ އިންޓަނޭޝަނަލް އެއާޕޯޓަށެވެ. އެހެންކަމުން ކޮންމެ ދުވަހަކު ވެސް އެއާޕޯޓް އޮންނަނީ ތޮއްޖެހިފައެވެ.

advertisement

އެއާޕޯޓް ތޮއްޖެހުމުގެ ސަބަބުން ކުރިމަތިވާނެ އެތައް ކަމެއް މިހާރު ވަނީ ކުރިމަތިވާން ފަށާފައެވެ. އެ ގޮތުން އެއާޕޯޓްގައި ގިނަ ވަގުތު ހޭދަކުރަން ޖެހުމުން އެއާޕޯޓްގެ އެކި ސަރަހައްދުތަކުގައި ގްރޫޕް ގްރޫޕަށް އިށީނދެ ތިބެ ކައިބޮއި ހެދުމާއި ނިދުމާއި ފަސިންޖަރުންގެ ބޭނުމަށް ހުރި ފާހާނާތައް ބޭނުންކޮށްގެން ފެންވަރު ހެދުން ފަދަ ކަންކަން ދަނީ ފެންމަތިވަމުންނެވެ. އަދި އެއާޕޯޓްގެ ސާފުތާހިރުކަން ދަނީ ގެއްލެމުންނެވެ. ބައެއް ފަރާތްތަކުން މި މަންޒަރުތައް ސިފަކުރަނީ އިންޑިއާގެ ރެއިލްވޭ ސްޓޭޝަންތަކުން ފެންނަ ފަދަ މަންޒަރުތަކެއްގެ ގޮތުގައެވެ. އެ ތަންތަނުގައި ވެސް ގްރޫޕް ގްރޫޕަށް ފައި ވަށްކޮށް އިށީނދެ ތިބެ ކެއުން ފަދަ ކަންކަން އާންމުކޮށް ފެނެއެވެ. ވެލާނާ އިންޓަނޭޝަނަލް އެއާޕޯޓްގެ މިފަދަ މަންޒަރުތައް ވެސް މިހާރު ސޯޝަލް މީޑިއާގައި ދަނީ ދައުރުވަމުންނެވެ.

އެއާޕޯޓް ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފައި ވަނީ އެއާޕޯޓްގައި މީހުން ތޮއްޖެހެނީ ޓުއަރިސްޓުންނާ ހަވާލުވާ މީހުން، ބަލައިދިއުން ލަސްވާތީ އާއި ފްލައިޓްގެ އެތައް ގަޑިއިރެއް ކުރި އެއާޕޯޓަށް މީހުން ގޮސް ތޮއްޖެހޭތީ ކަމަށެވެ. ނަމަވެސް މިއީ ހަގީގަތުގައި ގަބޫލުކުރަން އެހާ ފަސޭހަ ކަމެއް ނޫނެވެ. ޓުއަރިސްޓުން ބަލައިދިއުން ލަސްވެގެން އުޅެނީ އިއްޔެއަކު މިއަދަކު ނޫނެވެ. މީގެ ކުރިން ވެސް ޔޫރަޕާއި އެހެން ސަރަހައްދުތަކުގެ ފަތުރުވެރިންނަށް ވެސް މި މައްސަލަ ދިމާވެއެވެ. އަދި ފްލައިޓްގެ އެތައް ގަޑިއިރެއް ކުރިން އެއާޕޯޓަށް ދާ ފަތުރުވެރިން ވެސް މަދެއް ނޫނެވެ. ނަމަވެސް މި މަންޒަރުތައް އޭރު އެއާ ބޮޑަކަށް ނުފެނެއެވެ. މިކަންކަން ބޮއްސުންލައިގެން ގޮސްގެން އުޅެނީ އޭޝިޔާގެ ގައުމުތަކުގެ ފަތުރުވެރިން އިންތިހާ އަށް ގިނަވެ، އަދި އެ ފަރާތްތައް މެނޭޖްކުރުމުގައި އެމްއޭސީއެލް އަށް ވެސް އެކަށީގެންވާ ހަރުދަނާ އުސޫލްތަކެއް ގާއިމުކުރެވިފައި ނުވާތީ ކަމަށް ބައެއް ފަރާތްތަކުން ދެކެއެވެ.

ރާއްޖެ އަށް ޓުއަރިސްޓުން އެތެރެކުރާ އެޖެންޓަކު ބުނީ ފަތުރުވެރިން އެއާޕޯޓްގައި ތޮއްޖެހެނީ އެމްއޭސީއެލް ދޯދިޔާވުމުން ކަމަށެވެ. އުސޫލްތަކެއް ކަނޑައެޅިފައި ހުރި ނަމަވެސް އެކަންކަން އެކަށީގެންވާ ގޮތެއްގައި ތަންފީޒުނުކުރެވޭ ކަމަށާއި އެއާޕޯޓްގެ ކަންކަން ބެލެހެއްޓުމުގައި އެމްއޭސީއެލްގެ މިހާރު އޮތް މެނޭޖްމަންޓް ފެއިލްވެފަައިވާ ކަމަށް އޭނާ ބުންޏެވެ. ވަރަށް ގިނަ ކަަންކަން ބޮއްސުންލާފައިވާ ކަމަށް އޭނާ ތުހުމަތުކުރިއެވެ. އެއާޕޯޓްތަކަކީ ވަރަށް ސެކިއުރިޓީ ވަރުގަދަ އަދި ވަރަށް އޯގަނައިޒްޑް ތަންތަނަށްވީ ނަމަވެސް ވެލާނާ އިންޓަނޭޝަނަލްގައި އެ މީހަކު ބޭނުން ގޮތަކަށް އުޅެންވީ ކަމަށާއި ބަލާނެ ބަޔަކު ނެތް ކަމަށް އޭނާ ބުންޏެވެ.

އުސޫލްތަކާއި ގަވާއިދުތަކެއް ހެދިފައި ހުރި ނަމަވެސް ނަތީޖާ ނުކުންނާނީ އެއަށް އަމަލުކުރާ މިންވަރު ދެނެ ގަނެ ނުވަތަ އަމަލުކުރުމަށް ބާރު އަޅައިގެންނެވެ. އެއާޕޯޓަށް މިހާރު ކުރިމަތިވެފައިވާ އެންމެ ބޮޑު މައްސަލައަކީ ވެސް އެއީއެވެ. އުސޫލްތައް ހެދިފައި ހުރި ނަމަވެސް އެކަންކަން ބެލުމުގައި އެއާޕޯޓްގެ މެނޭޖްމަންޓަށް އެކަށީގެންވާ މަސައްކަތްތަކެއް ނުކުރެވުމެވެ.

އެއާޕޯޓް މެނޭޖްކުރުމުގައި މައްސަލަތައް ކުރިމަތިވެފައިވާ އިރު ރާއްޖޭގައި މިހާރު ހިންގާ އެންމެ ބޮޑު އެއް މަޝްރޫއު ކަމަށްވާ އެއާޕޯޓްގެ އާ ޓާމިނަލްގެ މަސައްކަތް ވެސް ވަނީ ވަރަށް ބޮޑަށް ލަސްވެގެން ގޮސްފައެވެ. މިދިޔަ ސަރުކާރުން ފެށި މި މަޝްރޫއުގެ މަސައްކަތް މިހާރު ހަލުވިކަމާ އެކު ކުރިއަށް ދާ ކަމަށް އެމްއޭސީއެލް އިން ބުނެއެވެ. ނަމަވެސް ވެރިކަން ބަދަލުވުމާ އެކު މަޝްރޫއު މަޑުޖެހުނު ގޮތަށް ސްޕީޑް ވަނީ ވަރަށް ބޮޑަށް ލަސްވެފަ ގޮސްފައެވެ. ވެރިކަމަށް ތިން އަހަރު ވާން ކައިރިވެފައިވާ އިރު އާ ޓާމިނަލް ނިމުމުގެ ކޮޅު މަތި އަދިވެސް ނުފެނެއެވެ. މަސައްކަތް އަވަސްކުރުމުގައާއި އަދި އެކަމަށްޓަކައި ކުރަމުންދާ މަސައްކަތްތަކާ ބެހޭ ގޮތުން އެމްއޭސީއެލް އިން މާ ބޮޑު މައުލޫމާތެއް ހާމައެއް ވެސް ނުކުރެއެވެ.

މީގެ އިތުރުން އާ ސީޕްލޭން ޓާމިނަލްގެ މައްސަލާގައި ވެސް އެމްއޭސީއެލް އަށް ގިނަ ފާޑުކިޔުންތަކެއް ދަނީ ރައްދުވަމުންނެވެ. ޗައިނީސް ކޮންޓްރެކްޓާ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އިން އެމްއޭސީއެލްއާ އެތަން މިހާރު ވަނީ ހަވާލުކޮށްފައެވެ. އެތަން ހަވާލުކުރުމުގެ ކުރިން ހިންގާނެ ގޮތްތައް ރޭވުމުގައި އެމްއޭސީއެލް އަށް އަދިވެސް ވަނީ ގޮތެއް ނުހޯދިއެވެ. ތަނުގެ މަސައްކަތް ނިމުމުގެ ކުރިން އެކަމަށް ގޮތްތަކެއް ހޯދުމަށް މަސައްކަތްކުރި ނަމަވެސް މިހާތަން އެކަން ވަނީ ކޮޅެއްގައި ނުޖެހިއެވެ. މިދިޔަ ސަރުކާރުގައި ތަރައްގީކުރި އާ ރަންވޭ ބޭނުންކުރެވެން އަންނަނީ ވެސް އާ ސީޕްލޭން ޓާމިނަލް ބޭނުންކުރަން ފެށި މިހާރު ބޭނުންކުރާ ޓާމިނަލުން ހުސް ޖާގަ ލިބިގެންނެވެ. އެހެންކަމުން އާ ސީޕްލޭން ޓާމިނަލްގެ ބޭނުން ވީއެންމެ އަވަހަކަށް ހިފޭނެ ގޮތަކަށް އެމްއޭސީއެލް އިން ކަންކަން ރާވަންޖެހެއެވެ.

އެއަރޕޯޓުގެ ގިނަ އަދަދެއްގެ މުވައްޒަފުންގެ ހިތްހަމަނުޖެހުން މިހާރުގެ މެނެޖްމަންޓާއި ދޭތެރޭއޮތްކަން ގިނަ މުވައްޒަފުންގެ ފަރާތުން ވަނީ ލިބިފައެވެ. އަދި ބޭރުގެ ފަރާތްތަކަށް އިސްވަޒީފާތައް ބޮޑެތި މުސާރަތާކާއެކު ދެމުންދާއިރު، ދިވެހިން ބާކީ ކުރަމުންދާކމަުގެ ޝަކުވާގެ އަޑު ވަނީ ގަދަވެފައެވެ. ގިނަ ބަޔަކު ދެކޭގޮތުގައި އެއަރޕޯޓުގެ ހިންފުން މިހާ ދޯދިޔާވެގެން ދިޔަޒަމާނެއް ފެންނާކަށް ނެތެވެ.

އެއާޕޯޓަށް އޮތް ހަމައެކަނި ހައްލަކީ ސީޕްލޭން ޓާމިނަލް އާއި އާ ފަސިންޖަރ ޓާމިނަލް ކަމަށް ބުނުމަކުން ނުފުދެއެވެ. އާ ޓާމިނަލްގެ މަސައްކަތް އަވަސްކުރުމަކީ ވެސް އެމްއޭސީއެލްގެ ޒިންމާއެކެވެ. އެތަންތަން ބޭނުންކުރެވެންދެން ވެސް އެއާޕޯޓް މެނޭޖްކުރުމުގައި ހުރި މައްސަލަތައް ހައްލުކުރަންޖެހެއެވެ. ތޮއްޖެހުން ބޮޑުވާން މެދުވެރިވާ ސަބަބުތައް ދެނެގަނެ އެކަން ހައްލުކުރަން ޖެހެއެވެ. މަތީފަންތީގެ މާކެޓެއްގެ ގޮތުގައި މަޝްރޫއުވެފައިވާ ރާއްޖޭގެ ނަން ދެމެހެއްޓެން އޮތީ ރިސޯޓްތަކާއި ޓުއަރިސްޓް ހޮޓާތައް އިތުރުކޮށް ފެންވަރު ރަނގަޅު ހިދުމަތެއް ދީގެން އެކަންޏެއް ނޫނެވެ. މާކެޓްގައި ރާއްޖޭގެ އަގު، އަދި ރާއްޖެއާ މެދު މީހުން ދެކޭ ގޮތް ހިފެހެއްޓުމަށް، ޓުއަރިސްޓުން އެތެރެވާ ދޮރު، ވެލާނާ އިންޓަނޭޝަނަލް އެއާޕޯޓްގެ ހިދުމަތްތަކުގެ ފެންވަރު ވެސް ރަނގަޅުވާންޖެއެވެ. އެކަށީގެންވާ ގޮތެއްގައި މެނޭޖްކުރެވެން ޖެހެއެވެ. ނަމަވެސް މިވަގުތު ފެންނަ މަންޒަރުތަކުން އެއާޕޯޓް ފެންނަނީ ބޮއްސުންލާފައިވާ ތަނެވެ.