ޚަބަރު

ހިޔާ ފްލެޓްތަކަށް މީހުން ވަޒަންވެރިވީމާ މާލޭގެ ކުލި ކުޑަ ވާނެތަ؟

29 އޯގަސްޓް 2021 - 15:42

ސަރުކާރުން މިހާތަނަށް ހިންގި ބޯހިޔާވަހިކަމުގެ އެންމެ ބިޔަ މަޝްރޫއު ހިޔާ ފްލެޓްތައް ނިމި މިހާރު ވަނީ ފްލެޓްތައް ލިބުނު މީހުންނަށް ތަޅުދަނޑި ހަވާލުކޮށްފައެވެ. އެތަނަށް ވަނުމަށްޓަކައި ކުރަންޖެހޭ މަރާމާތުގެ މަސައްކަތްތައް ބާރު ސްޕީޑްގައި މިހާރު ދަނީ ފްލެޓް ލިބުނު މީހުން ކުރަމުންނެވެ.

އެހާ އަވަހަށް ފްލެޓް ތަކަށް މީހުން ވަންނަން ބޭނުންވާ ސަބަބުތަކުގެ ތެރޭގައި އަމިއްލަ ފްލެޓެއްގައި ހެޔޮ އަގުގައި އުޅެވޭނެ އިންތިޒާމް ހަމަޖެހުން ހިމެނެއެވެ. ހިޔާ ފްލެޓްތައް ދައްކާލުމާއިއެކު އެތަން ކުޑަކަމުގެ ޝަކުވާވެސް ބައެއް މީހުން ކުރިއެވެ. ނަމަވެސް މިއީ އާއިލާއެއް އުޅެން އެކަށީގެންވާތަނެކެވެ. ޙާއްސަކޮށް މާލޭގައި ބޮޑު ކުލި ދައްކައިގެން އުޅޭ މީހުންނަށް މިއީ ލިބިގެންދިޔަ ވަރަށް ބޮޑު ހިތްހަމަޖެހުމެކެވެ.

advertisement

މާލޭގެ އެޕާޓްމަންޓްތަކުގެ ކުލި މިހާރު ވަނީ އަތްނުފޯރާފަށައް އަރާފައެވެ. ނަމަވެސް ހިޔާ ފްލެޓްތަކަށް މީހުން ބަދަލުވުމާއިއެކު މާލޭ އެޕާޓްމަންޓްތަކަށް އޮތް ޑިމާންޑް ދަށްވެ އަގުތައް ދަށްވެގެންދާނެކަމަށް ބެލެވެއެވެ. ކޯވިޑަ19 އާއިއެކު މާލީ ތަނަވަސްކަން ދަށްވެ މާލޭގައި ދިރިއުޅުން އަތޮޅުތެރޭގެ ގިނަ ބަޔަކު ރަށައް ބަދަލުވުމުންވެސް މާލޭ އެޕާޓްމަންޓްތަކުގެ އަގުތައް ވަނީ ދަށްވެގެންގޮސްފައެވެ. ނަމަވެސް ފަހުން މީހުން އަނެއްކާވެސް މާލެ އަންނަން ފެށުމުން އަގުތައް މަތިވެގެންދިޔައެވެ.

ހަޤީގަތަކީ ހިޔާ ފްލެޓްއަށް މީހުން ވަނުމާއިއެކު ގިނަ އާއިލާތަކެއް އެތަނަށް ބަދަލުވާނެއެވެ. މިއާއިއެކު މާލޭ އެޕާޓްމަންޓްތަކުގެ އަގުތައް މިހާރަށްވުރެ ކުޑަކުރަން މަޖުބޫރުވާނެއެވެ.

ރިއެކްޝަންސް
11
1
2
4
4
1
3