އުމުރުން ދުވަސްވީ، ހާއްސަކޮށް ދިވެހި އަންހެނުންނަށް ކަށި ފީވުމުގެ އުނދަގޫ ތަހައްމަލްކުރަން ޖެހެނީ ކީއްވެ؟

ހަށިގަނޑުގެ އެހެން ސެލްތަކެކޭ އެއްގޮތަށް ކައްޓަކީ ވެސް އޭގެ ސެލްތައް ނެތި ގޮސް އާލަވާތީ، ހެދިބޮޑު ވަމުން އަންނަ ގުނަވަނެކެވެ. ކަށި ބާރުގަދަ، ހަރު ގުނަވަނެއްގެ ގޮތުގައި ހުރުމަށް މެދުވެރި ކުރުވަނީ ކަށީގައި ހިމެނިފައިވާ ކެލްސިއަމް އަދި ފޮސްފޮރަސް ފަދަ ބާވަތްތަކުގެ ސަބަބުންނެވެ. ނަމަވެސް، ކޮންމެވެސް ސަބަބަކާ ހުރެ މި މާއްދާތައް ކަށީގައި ހުންނަވަރު މަދު ވެއްޖެނަމަ ކަށި ފީވުމަށް މެދުވެރި ކުރުވަ އެވެ.

އެހެނީ ކަށި ފީވުން ނުވަތަ އޮސްޓިއޯޕޮރޯސިސްއަކީ އުމުރުން ދުވަސްވީ މީހުންގެ ފަރާތުން އާންމުކޮށް ފެންނަ ބައްޔެކެވެ. މި ބަލި ހުންނަ މީހުންގެ ކަށީގެ ބަރުދަން ލުއިވެ ކަށިތައް ބަލިކަށި ވެއެވެ. އަދި ތަނެއްގައި ޖެހި ނުވަތަ ވެއްޓިއްޖެނަމަ ފަސޭހައިން ކައްޓަށް އަނިޔާވެ، ބިނދޭ ގޮތްވެއެވެ.

advertisement

ފާހަގަކޮށްލެވޭ ގޮތުގައި އުމުރުން ދުވަސްވީ، ހާއްސަކޮށް ދިވެހި އަންހެނުންނަށް ކަށި ފީވުމުގެ އުނދަގޫ ތަހައްމަލްކުރަން ޖެހެއެވެ. މިކަން ދިމާވާ މައިގަނޑު ސަބަބަކަށް ޑޮކްޓަރުން ބުނަނީ ޒުވާން ދުވަސްވަރުގައި އަދި ބަނޑުބޮޑު ދުވަސްވަރުގައި ކެލްސިއަމް ގިނައިން އެކުލެވޭ ތަކެތި ނުކެވުމުގެ ސަބަބުން ދިމާވާކަމެއް ކަމަށެވެ.

އެހެންކަމުން ކަށި ފީވުމުން ރައްކާތެރިވާނީ ކިހިނެތްތޯ ބަލާލުން މިއީ ވަރަށް މުހިންމުކަމެކެވެ. ކަށި ފީވުމުން ދުރުވުމަށް ސިއްހަތަށް ފައިދާހުރި ކާނާ ކެއުންމާއި މޭވާއާއި ތަރުކާރީ ބޭނުންކުރުމަކީ މުހިންމުކަމެކެވެ. ކެލްސިއަމް އެކުލެވޭ ކެއުންތައް ކެއުމާއި ދުންފަތުގެ އިސްތިއުމާލު ނުކުރުމާއި، ކެފެއިން އެކުލެވޭ ބުއިންތައް މަދުކުރުމާއި، ކަށީ ބާރުގަދަ ކުރަން ގަވައިދުން ކަސްރަތުކުރުމަކީ މުހިންމު ކަމެކެވެ.

އަދި ހަމަ އެހެންމެ މާބަނޑު ދުވަސްވަރު ކެލްސިއަމް އެކުލެވޭ ގިނަ ބާވަތްތައް ކެއުން މުހިއްމުވަނީ ކުއްޖާ ބަނޑުތެރޭ ހެދިބޮޑުވާއިރު ކެލްސިއަމް ނުލިބޭ ކާނާ ނުކައިފިނަމަ ކުއްޖާ ކެލްސިއަމް ނަގާނީ މަންމަގެ ގައިން ކަމަށްވާތީއެވެ. މިހެންވުމުން މައިމީހާ އުމުރުން ދުވަސްވާއިރު ކަށިތައްފީވާ މައްސަލަ ދިމާވެއެވެ.

އެހެންކަމުން ޑޮކްޓަރުންދޭ އިރުޝާދާއެކު ކެލްސިއަމް ޓެބްލެޓް އަދި ކެލްސިއަމް ހިމެނޭ ތަކެތި ކެއުން މުހިއްމެވެ.

އާންމުކޮށް ކަށި ފީވުމުގެ އަލާމާތްތައް ފެންނަނީ ކަށިތައް ވަރަށް ބޮޑަށް ފީވާ ފަހުންނެވެ. އެހެނީ މި ބަލި ހުންނަކަން ގިނަ ފަހަރު އެނގެނީ އަނިޔާއެއްވެ ކަށި ބިނދި ނުވަތަ ރެނދުލާ ފަހުންނެވެ. ވީމާ ކަށި ފީވުމުގެ އެންމެ ބޮޑު އަލާމާތަކީ ފަސޭހައިން ކަށި ބިނދި، ރެނދުލުމެވެ. އަދި މީގެ އިތުރުން ބުރަކަށީގައި ރިހުން، ގުދުލައި އިސްކޮޅުން ކުރުވުން ފަދަ އަލާމާތްތައް ހިމެނެ އެވެ.

ކެލްސިއަމް އެންމެ ގިނައިން އެކުލެވެނީ ކިރުގެ ބާވަތްތަކުގަ އެވެ. އެގޮތުން ކޮންމެ ދުވަހަކު ކިރު ތައްޓެއް ބުއިމަށް އާދަ ކުރެވިދާނެ އެވެ. އަދި މީގެ އިތުރުން ސާޑިންސް، ސްޕިނެޗް، އާމަންޑްސް ފަދަ ބާވަތްތަކަކީ ވެސް ކެލްސިއަމްއިން މުއްސަނދިވެފައިވާ ކެއުންތަކެވެ.