މަސްވެރިކަމާއި ދަނޑުވެރިކަމުގެ ސިނާއަތަށް ޒުވާނުން ދަނީ އިތުރުވަމުން

މަސްވެރިކަމާއި ދަނޑުވެރިކަމުގެ ސިނާއަތަކީ ޒުވާނުން މަސައްކަތްކުރަން ހަޑި މަސައްކަތެއްގެ ގޮތުގައި ބެލެވުނު ޒަމާނެއްވެސް ދިޔައެވެ. ނަމަވެސް މިހާރު މަޑުމަޑުން މިކަން އަންނަނީ ބަދަލުވަމުންނެވެ. މި ސިނާއަތުގައި މަސައްކަތްކުރާ ޒުވާނުންގެ އަދަދު މިހާރު އިތުރުވަމުން އަންނަކަމަށް ތަފާސްހިސާބުތަކުންވެސް ދައްކައެވެ.

މޯލްޑިވްސް ސްޓެޓިކްސް ބިއުރޯއިން އާންމުކޮށްފައިވާ ތަފާސްހިސާބުތައް ދައްކާގޮތުން މަސްވެރިކަމާއި އަދި ދަނޑުވެރިކަމުގެ ސިނާއަތުގައި ހަރަކާތްތެރިވާ ޒުވާނުންގެ އަދަދު އުޅެނީ 3654 ގައެވެ. ކާނާގެ އެކި އުފެއްދުންތައް އުފެއްދުމަށް 2454 ޒުވާނުން ހަރަކާތްތެރިވަމުން އަންނައިރު ޖަނަވާރު ގެންގުޅުމުގެ މަސައްކަތުގައި 413 ޒުވާނުން އަދި ބެވަރޭޖް އުފެއްދުމުގެ މަސައްކަތުގައި 186 ޒުވާނުން ހަރަކާތްތެރިވެއެވެ.

advertisement

މަސްވެރިކަމާއި ދަނޑުވެރިކަމުގެ ސިނާއަތަކީ މިހާރު މިކަމުން ރަނގަޅު އާމްދަނީވެސް ލިބޭ މަސައްކަތްތަކެވެ. އަދި ދިވެހި ޒުވާނުން އިސްނަގައި މިހާރު މި ސިނާއަތްތައް ކުރިއެރުވުމަށް މަސައްކަތްތައްވެސް އަންނަނީ ކުރަމުންނެވެ. ސަރުކާރުންވެސް މި ސިނާއަތް ކުރިއެރުވުމަށް އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ދަނޑުވެރިކަމުގެ ސިނާއަތް ކުރިއެރުވުމަށް ވަކި ހާއްސަ ކުންފުންޏެއްވެސް މިހާރު ވަނީ އުފައްދާފައެވެ. އެގްރޯނެޓްގެ ނަމުގައި އުފެއްދި މި ކުންފުނިން މިހާރު އަންނަނީ ދަނޑުވެރިކަން ކުރަން ބޭނުންވާ މީހުންނަށް އާލާތްތަކާއިއެކު އެކަން ކުރެވޭނެ މަގު ފަހިކޮށްދެމުންނެވެ. އަދި އެމީހުން އުފައްދާ ތަކެތިވެސް އަންނަނީ ގަންނަމުންނެވެ.

ރާއްޖޭގެ އާބާދީގެ 257000 އަށްވުރެ ގިނަ މީހުންނަކީ ޒުވާނުންނެވެ. އެއީ އުމުރުން 18 އަހަރާއި 35 އަހަރާއި ދެމެދުގެ އާބާދީއެވެ.