ސިއްހީ ދާއިރާގައި ޖިންސުގެ ހަމަހަމަކަން އެބަ އޮތްބާ؟

ސިއްހީ ދާއިރާގައި މަސައްކަތްކުރާ ފަރާތްތަކަކީ ވަރަށް ބުރަ ބޮޑު މަސައްކަތްތަކެއް ކުރާ ފަރާތްތަކެކެވެ. ވަކިން ޙާއްސަކޮށް ކޯވިޑާއިއެކު ސިއްހީ ދާއިރާގައި މަސައްކަތްކުރާ ފަރާތްތަކުގެ ޒިންމާ ބޮޑުވެ މަސައްކަތުގެ ވަގުތު ވަނީ އިތުރުވެފައެވެ. ކޯވިޑްގެ އެންމެ ދަތި އުނދަގޫ ހާލަތްތަކުގައި ޑޮކްޓަރުންނާއި ނަރުހުން ވަނީ އެއްވެސް ޗުއްޓީއެއް އޮފެއް ނެގުމެއްނެތި ވަނީ މަސައްކަތްކޮށްފައެވެ.

ރާއްޖޭގެ ސިއްހީ ދާއިރާގައި މަސައްކަތްކުރާ މީހުންގެ ތެރެއިން އެންމެ ބޮޑު ނިސްބަތެއް ހިއްސާކުރަނީ ނަރުހުންނެވެ. ތަފާސްހިސާބުތައް ދައްކާގޮތުން ނަރުހުންގެ ގޮތުގައި 2900 އަށްވުރެ ގިނަ މީހުން ރާއްޖޭގައި އަންނަނީ މަސައްކަތްކުރަމުންނެވެ. ޑޮކްޓަރުންގެ ގޮތުގައި 1100 އަށްވުރެ ގިނަ މީހުން މަސައްކަތްކުރަމުންއަންނަކަމަށް ތަފާސްހިސާބުތަކުން ދައްކައެވެ.

advertisement

ތަފާސްހިސާބުތައް ދައްކާގޮތުން ނަރުހުންގެ ގޮތުގައި މަސައްކަތްކުރާ ގިނަ އަދަދެއްގެ މީހުންނަކީ އަންހެނުންނެވެ. އަދި ޑޮކްޓަރުންގެ ގޮތުގައި ގިނައިން މަސައްކަތްކުރަމުން އަންނަނީ ފިރެހެނުންނެވެ.

ނަރުހުންގެ ގޮތުގައި މަސައްކަތްކުރާ މީހުންގެ ނިސްބަތައް ބަލާއިރު %87 މީހުންނަކީ އަންހެނުންނެވެ. އަދި %13 މީހުންނަކީ ފިރެހެނުންނެވެ. ފިރެހެނުން ނަރުހުންގެ ގޮތުގައި މަސައްކަތްކުރާ އާބާދީ މީގެ 10 ވަރަކަށް އަހަރާއި އަޅާބަލާއިރު މިހާރު ވަނީ ބޮޑުތަނުން ކުރިއަރާފައެވެ. އެއިރު މިއީ ފިރެހެންކުދިން ކުރަން ހަޑި މަސައްކަތެއްކަމަށް ބެލެވުނު ނަމަވެސް މިހާރު ގިނަ މީހުންގެ ވިސްނުން އަންނަނީ ބަދަލުވަމުންނެވެ.

ޑޮކްޓަރުންގެ ގޮތުގައި ރާއްޖޭގައި މަސައްކަތްކުރާ މީހުންގެ އާބާދީއަށް ބަލާއިރު %64 އަކީ ފިރެހެނުންނެވެ. އަދި %36 އަކީ އަންހެނުންނެވެ.

ނަރުހުންނާއި ޑޮކްޓަރުންގެ ގޮތުގައި ދިވެހި ކުދިން ނެރުމަށް ސްކޮލަރޝިޕްތައްވެސް އަންނަނީ ދެމުންނެވެ. އަދި ޤައުމީ ޔުނިވަރސިޓީގައިވެސް ނަރުސްކަން ކިޔަވާ ކުދިންގެ އަދަދު އިތުރެވެ. ކޯވިޑާއިއެކު ސިއްހީ ދާއިރާގެ މީހުން ހޯދުމަށް އޮތް ޑިމާންޑްވެސް ވަނީ ބޮޑުވެފައެވެ.