ސިނގިރޭޓް ހުއްޓާލުމުން ވާ އުނދަގޫ ޕީކަށް ދަނީ ހުއްޓާލާތާ ފުރަތަމަ ދެތިން ދުވަސް ތެރޭގައި

ކޮންމެ މީހެއްގެވެސް އާއިލާގެ ނުވަތަ ރަހުމަތްތެރިއަކު ދުންފަތުގެ އިސްތިއުމާލު ކުރާނެއެވެ. އަދި ދުންފަތުގެ އިސްތިއުމާލުން ދުރުވުމަށްވެސް ތިބާ އޭނާގެ ކައިރީގައި ނަސޭހަތްތެރިވެފައި ހުރެދާނެއެވެ.

ދުންފަތުގެ އިސްތިއުމާ ކުރުމަކީ ސިއްހަތަށް ވަރަށް ގެއްލުން ހުރިކަމެވެ. އެކަން އެނގި ތިބެ ވެސް ބައެއް މީހުންނަށް މިއާދަޔާ ދުރުވެވޭ ގޮތެއް ނުވެ އެވެ. ސަބަބަކީ މާބޮޑަށް މިކަމަށް ދެވި ހިފާފައި ހުރުމެވެ. ނުވަތަ އަމިއްލަ ނަފްސު މިކަން ހުއްޓާލަން ބޭނުން ނުވުމެވެ.

advertisement

ދުންފަތުގެ އިސްތިއުމާލު ކުރުމުން ސިއްހީ ތަފާތު ގިނަ މައްސަލަތައް ކުރިމަތިވެ، ނުރައްކާތެރި ބައެއް ބަލިތައް ވެސް ޖެހުމުގެ ފުރުސަތުވެސް ބޮޑުވާ ކަމެކެވެ. އޭގެތެރޭގައި ފުރަމެއަށް ޖެހޭ މައްސަލަތައް ގިނަވެ، ފުރަމޭ ހަލާކުވާލެއް އަވަސްވެ އެވެ. އަދި ހިތުގެ މައްސަލަތައް ޖެހުންވެސް ދުންފަތުގެ އިސްތިއުމާލުގެ ސަބަބުން އިތުރުވެއެވެ.

ދުންފަތުގެ އިސްތިއުމާލު ކުރުމުގެ ސަބަބުން ތިމާއާއި ކައިރީގައި އުޅޭ މީހުންނަށްވެސް މީގެ ގެއްލުން ބޮޑުވެގެންދެއެވެ. ހަޑިގަނޑަށް ލިބޭ ގެއްލުމުގެ އިތުރުން މިއީ ތިމާގެ އަތުން ބޭކާރު ގޮތުގައި ގިނައަދަދެއްގެ ފައިސާވެސް ބޭކާރުވެގެންދާ ކަމެކެވެ.

ދުނިޔޭގެ ސިއްހަތު ޖަމިއްޔާއިންނާއި ސިއްހީ ހޭލުންތެރިކަމަށް މަސައްކަތްކުރާ އެތައް ފަރާތަކުން ކެނޑިނޭޅި ދަނީ ދުންފަތުގެ އިސްތިއުމާލުން ދުރުވުމަށް ގޮވާލައި ހޭލުންތެރިކަމުގެ ޕްރޮގްރާމްތައް ހިންގަމުންނެވެ.

މިހުރިހައި ސަބަބަކަށްޓަކައި އެންމެ އެދެވިގެންވާ ގޮތަކީ ދުންފަތުގެ އިސްތިއުމާލު ނުކުރުމެވެ. އަދި މިކަން ކަށީގައި ހިފާފައި ހުރި ނަމަ ހުއްޓައިލެވޭތޯ މަސައްކަތް ކުރުމެވެ.

ސިނގިރޭޓް ހުއްޓާލުމުން ވާ އުނދަގޫ ޕީކަށް ދަނީ ހުއްޓާލާތާ ފުރަތަމަ ދެތިން ދުވަސް ތެރޭގައި އެވެ. އޭގެ ފަހުން ދުވަހަކަށް ފަހު ދުވަހެއް އުނދަގޫ ކުޑަވަމުން ގޮސް އެއް މަސް ދުވަސް ވާއިރު ގިނަ މީހުންނަށް އެއްކޮށް އުނދަގޫ ފިލައިގެން ދެއެވެ.

ދުންފަތުގެ އިސްތިއުމާލު ކުރާ އެތައް ބަޔަކު މިކަމުން ދުރުވެފައި އެބަހުއްޓެވެ. އެހެންކަމުން ތިމާއަކީ ދުންފަތުގެ އިސްތިއުމާލު ކުރުމަށް ދެވިހިފާފައިވާ މީހެއްނަމަ ތިމާއަށް މިކަން ހުއްޓާ ނުލެވެންވީ ސަބަބެއް ނެތެވެ. ބޭނުންވަނީ ކުޑަ ހިތްވަރެކެވެ. ކުޑަ އަޒުމެކެވެ. އަދި ތިބާ ލޯބިވާ މީހަކު މި ނޭދެވޭ އަމަލުކުރަމުންދާނަމަ އޭނާ މިކަމުން ސަލާމަތްވުމަށްޓަކައި މަސައްކަތްކޮށްދެވިދާނެއެވެ.