އަނިޔާލިބޭ އަންހެނުންގެ އަދަދު ދަށެއް ނުވޭ!

އަންހެނުންނަށް ކުރާ އަނިޔާތަކުގެ ވާހަކައަކީ ވަރަށް ގިނައިން ދެކެވޭ ވާހަކައެކެވެ. އަދި މިކަމާއި ދެކޮޅަށް ވަރަށް ގިނަ މުއައްސަސާތަކުންވެސް އަންނަނީ ވަކާލާތުކުރަމުންނެވެ. ނަމަވެސް ތަފާސްހިސާބުތަކައް ބަލާއިރު އަންހެނުންނަށް ކުރާ އަނިޔާތަކުގެ މައްސަލަތައް ދައްވާތަނެއް ނުފެނެއެވެ.

ތަފާސްހިސާބުތައް ދައްކާގޮތުން އަންހެނުންނަށް ކުރާ އަނިޔާތަކުގެ މައްސަލަތައް ދަނީ އިތުރުވަމުންނެވެ. އެގޮތުން ފާއިތުވި 10 އަހަރަށް ބަލާއިރުވެސް ކަންބޮޑުވާންޖެހޭ މިންވަރަށް އަންހެނުންނަށް ކުރާ އަނިޔާތަކުގެ މައްސަލަތައް ވަނީ އިތުރުވެފައެވެ. 2011 ވަނަ އަހަރު ޖިސްމާނީގޮތުން އަންހެނުންނަށް ކުރިކަމަށް ރިޕޯޓްކޮށްފައިވާ މައްސަލަތަކުގެ އަދަދަކީ 22 އެވެ. ނަމަވެސް 2020 ވަނަ އަހަރު މިބާވަތުގެ 180 މައްސަލައެއް ވަނީ ރިޕޯޓްކޮށްފައެވެ. މިއީ އަދަދުން ބަލާނަމަ އިތުރު އަދަދެކެވެ.

advertisement

ސައިކޮލޮޖިކަލީ އަންހެނުންނަށް ކޮށްފައިވާ އަނިޔާތަކަށް ބަލާއިރު 2011 ވަނަ އަހަރު މި ބާވަތުގެ އެއްވެސް މައްސަލައެއް ރިޕޯޓްކޮށްފައެއް ނުވެއެވެ. ނަމަވެސް 2020 ވަނަ އަހަރު މި ބާވަތުގެ 90 އަށްވުރެ ގިނަ މައްސަލަ ވަނީ ރިޕޯޓްކޮށްފައެވެ.

ޖިންސީ ފުރައްސާރައިގެ މައްސަލަތަކަށް ބަލާއިރު 2011 ވަނަ އަހަރު ރިޕޯޓްކޮށްފައިވާ މައްސަލަތަކުގެ އަދަދު 10 އަކަށްވުރެ ދަށެވެ. ނަމަވެސް 2020 ވަނަ އަހަރު މި ބާވަތުގެ 40 މައްސަލަ ރިޕޯޓްކޮށްފައިވެއެވެ.

އަންހެނުންނަށް ކުރާ މިފަދަ ފުރައްސާރައާއި އަނިޔާތަކުގެ މައްސަލަތައް ދަށްނުވުމަކީ ކަންބޮޑުވާންޖެހޭ ކަމެކެވެ. މިއީ ހަމައެކަނި ރިޕޯޓް ކުރެވޭ މައްސަލަތަކުގެ އަދަދެވެ. އެކިއެކި ސަބަބުތަކާއިއެކު ރިޕޯޓްނުކުރާ ކިތައް މައްސަލަ އަދި އޮންނާނެ ހެއްޔެވެ؟ އެހެންކަމުން މުޖްތަމައުގެ ތެރޭގައި އަންހެނުންނަށް ކުރާ އަނިޔާތަކާއި ދެކޮޅަށް އަޑުއުފުލައި މިފަދަ މައްސަލަތައް މަދުކުރުމަށް އެންމެން މަސައްކަތްކުރަންޖެހެއެވެ.