ވާހަކަ ދައްކަން ނުފަށާ ކުދިން ގިނަ ވަގުތު ސްކްރީން ކުރިމަތީ ވަގުތު ހޭދަ ކުރުމުން މައްސަލަތައް ދިމާވޭ

ސްކްރީނާއި ދުރެއް ނުވެވެއެވެ. ގެއިން ބޭރަށްގޮސް އުޅޭހިތެއް ނުވެއެވެ. ގޭގައި އުޅުން ނަމަވެސް މީހުންނާ ވާހަކަދެއްކުމެއް ނޯވެއެވެ. މިއީ މިހާރުގެ ގިނަ ކުދިންގެ ހާލަތެވެ. ފޯނާއި ޓެބްލެޓާއި އަދި ޓީވީއަށް ދެވިހިފުމުގެ ނަތީޖާއެވެ. ކޯވިޑް19 އާއިއެކު ގޭގައި ތިބެންޖެހުމުގެ ސަބަބުން ސްކްރީނަށް އެޑިކްޓުވުން ކުރިއާ ބަލާއިރު ވަރަށް ބޮޑަށް ވަނީ އިތުރުވެފަ އެވެ.

ސްކްރީން ޓައިމަކީ ސްކްރީނެއްގެ ކުރިމަތީގައި މީހަކު ހޭދަ ކުރާ ވަގުތެވެ. ސްމާޓް ފޯނާއި ކޮމްޕިއުޓާގެ އިތުރުން ޓީވީ އާއި ޓެބްލެޓް ފަދަ އާލާތްތައް ބޭނުން ކުރުމަކީ ސްކްރީން ޓައިމެވެ.

advertisement

ސްކްރީނަށް ވަގުތު ނުދީ މިއަދުގެ ދުނިޔޭގައި އުޅުމަކީ ވަރަށް ދަތިކަމެކެވެ. ތައުލީމު ހާސިލު ކުރުމާއި މަސައްކަތް ކުރުމުގެ އިތުރުން ވިޔަފާރި ކުރުމާއި މުނިފޫހިފިލުވުން ވެސް ގުޅިފައި ވަނީ ކޮންމެވެސް ސްކްރީނަކަށެވެ. ހާއްސަކޮށް ޕެންޑެމިކްގެ ސަބަބުން ގިނަ ކަންކަން އޮންލައިންކޮށް ކުރުމަށް ބަދަލު ކޮށްފައިވާއިރު ސްކްރީނަށް ދޭން ޖެހޭ ވަގުތު މިވަނީ އިތުރުވެފަ އެވެ.

އެކަމަކު މިއީ ބޮޑު ނުރައްކަލެކެވެ. ވިސްނަންވީ ކަމަކީ ވަކި މިންވަރަކަށް ސްކްރީން ބޭނުން ކުރުމެވެ. ނަފްސާނީ ޑޮކްޓަރުން ވިދާޅުވާގޮތުގައި އެވެރެޖުކޮށް ދިވެހި ކުއްޖަކު ދުވާލަކު ހަތަރު ގަޑިއިރު ސްކްރީން ބޭނުން ކުރެއެވެ. އަދި ނުވަ ގަޑިއިރަށް ވުރެ ގިނައިން ސްކްރީން ބޭނުން ކުރާ މީހުން ވެސް އުޅެއެވެ.

ތުއްތު ކުދިންނަށް މާގިނައިން ސްކްރީން ދެއްކުމަކީ އޭގެ އަސަރު އެކުދިންނަށް ކުރާނެކަމެކެވެ. އުމުރުން ދެ އަހަރު ނުވާ ކުއްޖަކަށް އެއްވެސް ގޮތަކަށް ސްކްރީން ދައްކަން ނުވާކަމަށް ތަޖުރިބާކާރުން ވިދާޅުވެއެވެ. އަދި ދެ އަހަރާއި ފަސް އަހަރާ ދެމެދުގެ ކުދިންނަށް ހަފްތާގެ ދުވަސްތަކުގައި ސްކްރީން ދައްކަން ޖެހޭނީ އެއް ގަޑިއިރު ކަމަށާއި ހަފުތާ ބަންދުގައި ވެސް ގިނަ ވެގެން ތިން ގަޑިއިރަށް ވުރެ އިތުރުނުވާނެހެން ސްކްރީން ވަގުތު ކަނޑައަޅަން ޖެހޭ ކަމަށް ޑޮކްޓަރުން ވިދާޅުވެއެވެ. ފަސް އަހަރުން ފެށިގެން މަތީގެ ކުދިން ތައުލީމު އުނގެނުމުގެ އިތުރުން ގިނަ ވެގެން ސްކްރީން ބޭނުން ކުރަން ވާނީ ދުވާލަކު ދެ ގަޑިއިރަށެވެ.

ދިރާސާތައް ބުނަނީ ސްކްރީން ޓައިމް ގިނަވުމުގެ ސަބަބުން ގިނަ މައްސަލަތަކެއް ދިމާވާ ކަމަށެވެ. އޭގެ ތެރޭގައި ވެސް ނަފްސާނީ ގޮތުން ދިމާވާ ކަންކަން އިތުރެވެ.

ވާހަކަ ދައްކަން ނުފަށާ ކުދިން ގިނަ ވަގުތު ސްކްރީން ކުރިމަތީ ވަގުތު ހޭދަ ކުރުމުން ބަސްމޮށެ އުޅުމަށް ދަތިތަކާ ކުރިމަތިވެ އެވެ. އަދި ސްކްރީނަށް ދޭ ވަގުތު ގިނަ ވުމުން އެ ކުއްޖާއަށް ދަސްވާން ޖެހޭ ގިނަ ކަންކަން ދަސްނުވެ ތޫނުފިލި ކަމަށް ވެސް އަސަރު ކުރެއެވެ.

ސްކްރީނަށް ގިނަ ވަގުތު ދިނުމުން ސިއްހީ ގިނަ މައްސަލަތަކެއް ކުރިމަތިވާއިރު އެކަންކަމުން ކުދިން ސަލާމަތް ކުރުމަށް ބެލެނިވެރިން ސަމާލުކަން ދޭންޖެހެ އެވެ. އެގޮތުން ސްކްރީންގައި ކުދިން ހޭދަކުރާ ވަގުތު މަދުކޮށް އެކަމަށް ވަކި ވަގުތުތަކެއް ކަނޑައަޅަންޖެހެއެވެ.