ކެއުމުގެ ވައްޓަފާޅި ބަހައްޓާ ގޮތުންވެސް ބަރުދަން އިތުރުވޭ

ބަރުވުމަކީ ބައެއް މީހުންނަށް ދިމާވާ ކަންބޮޑުވާ މައްސަލައެކެވެ. ހަށިގަނޑު ލުއިކުރުމަށް ގިނަ ކަންކަން ކުރެއެވެ. ބައެއް މީހުން ބަރުދަން ލުއިކުރުމަށް ޖިމަށްގޮސް އެކްސަސައިޒްވެސް ކުރެއެވެ. ނަމަވެސް ކޮންމެ ދުވަހެއްގެ ކެއުމަށް ބޭނުންކުރާ ކާނާއިންވެސް ބަރުދަން ލުއިކުރެވޭނެއެވެ. އެގޮތުން ބަރުދަން ލުއިކުރުމަށް ކެއުމުގައި ބޭނުންކުރެވޭނެ ބައެއް ކާނާތައް މިތަނުގައި ހިމަނާލާނަމެވެ.

ބިސް

advertisement

ބަރުދަން ލުއިކުރުމަށް ކެއުމުގައި ބިސް ހިމެނިދާނެއެވެ. ކޮންމެ ބިހެއްގައި ހަ ގްރާމްގެ ޕްރޮޓީން އެކުލެވެއެވެ. މީގެ ސަބަބުން ބަރުދަން ލުއިކުރުމަށް އެހީތެރިވެދެއެވެ.

ޔޯގަޓް

ރިސާޗް ތަކުން ދައްކާ ގޮތުން ޔޯގަޓަކީ ޑައިޓްގައި ހިމަނަން ޖެހޭ ވަރަށް މުހިއްމު އެއްޗެކެވެ. ވިޓަމިނާއި ޕްރޮޓީން އެކުލެވިގެންވާ ޔޯގަޓަކީ ސަރުބީތައް ނައްތާލުމަށް ބޭނުންކުރެވޭނެ އެއްޗެކެވެ. މިއީ ހަށިގަނޑަށް އެންމެ ފައިދާ ހުރި ކާނާތަކުގެ ތެރޭގައި ހިމެނިގެންވާ އެއްޗެއްވެސްމެއެވެ.

ބަދަން

ބަދަނަކީ ޕްރޮޓީން އެކުލެވިގެންވާ އާއްމު ގޮތެއްގައި ކާނާގައި ހިމަނަން މުހިއްމު އެއްޗެކެވެ. ބަދަނުގެ ތެރެއިން ވެސް ވޮލްނަޓްސް އަދި އަލްމަންޑަކީ ފާހަގަ ކޮށްލެވޭ ބަދަނެކެވެ. ވޮލްނަޓަކީ އޮމެގާ 3 ފެޓީ އެސިޑްސް އެކުލެވިގެންވާ އެއްޗެކެވެ. ހަމައެހެންމެ، އަލްމަންޑަކީ ހަށިގަނޑުގައި ހުންނަ ކަށިތައް އިތުރަށް ވަރުގަދަކޮށްދޭ ކެލްސިއަމެއް އެކުލެވިގެންވާ ބަދަނެކެވެ.

ކެއުމުގައި ބޭނުންކުރާ ކާނާގެ އިތުރުން ކެއުމުގެ ވައްޓަފާޅި ބަހައްޓާ ގޮތުންވެސް ބަރުދަން ދަށްކުރުމަށް އެހީވެދޭނެއެވެ. އެގޮތުން ލަސްލަހުން ކެއުމަކީ ބަރުދަން ލުއިކުރުމަށް އެހީވެދޭނެކަމެކެވެ. ރަނގަޅަށް ހަފައިގެން ލަސްލަހުން ކެއުމަކީ އަވަހަށް ބަނޑުފުރި މަދުން ކެވެން މެދުވެރިވާ ކަމެއްކަމުގައި ދިރާސާތަކުން ދައްކަ އެވެ. އެހެން ކަމުން ބަރުދަން ލުއިކުރަން މަސައްކަތް ކުރާނަމަ ލަސްލަހުން ކާން އާދަ ކުރާށެވެ.

މީގެއިތުރުން ކެއުމުގައި ކުދި ތަށި ބޭނުންކުރުމަކީވެސް ބަރުދަން ލުއިވާނެކަމެކެވެ. އެއީ ކުދި ސައިޒުގެ ތެލިތަށި ގެންގުޅުމަކީ މަދުން ކެއުމަށް އެހީވެދޭނެ ކަމެކެވެ. ބޮޑު ތައްޓެއްގައި ކާނަމަ ގިނައިން ކެވުމުގެ ފުރުސަތު ބޮޑުވާނެ އެވެ. އެއާ ޚިލާފަށް ކުދި ތަށިތަކުގައި ކެވޭވަރު މަދުވާނެ އެވެ.