ފަރުދީ ފެންވަރުގައި ޕްލާސްޓިކަށް ނޫނެކޭ ބުނަންޖެހޭ

ވިޔަފާރިކޮށްގެން ގެއަށް އަންނައިރު އަތުގައި ކޮތަޅުތައް ގިނަ ހެއްޔެވެ؟ ނުވަތަ ގޭގައި ކޮތަޅުތައް ގިނަގެން އުޅެންޖެހޭ ހެއްޔެވެ؟ މިއީ ބައެއް މީހުންނަށް ދިމާވާ އުނދަގުލަކަށްވެސް ވެދާނެއެވެ. ނަމަވެސް މިކަމަށް ހައްލެއް އެބައޮތެވެ.

ބައެއް ތަންތަނުން ވިޔަފާރިކުރުމުން އަދިވެސް ދެނީ ޕްލާސްޓިކް ކޮތަޅެވެ. ޕްލާސްޓިކަކީ ތިމާވެއްޓަށްވެސް ގެއްލުން ހުރި އެއްޗެކެވެ. އެހެންކަމުން ފަރުދީ ފެންވަރުގައި ޕްލާސްޓިކަށް ނޫނެކޭ ބުނަންޖެހެއެވެ. މިކަމަށް އޮތް ފުރަމަ ހައްލަކީ ވިޔަފާރިކުރަން ދާއިރު އަމިއްލަ ކޮތަޅެއް ގެންދިއުމެވެ. އެއިރުން ގޭގައި ކޮތަޅުތައް ގިނަވެގެން އުނދަގޫވެގެން އުޅޭކަށް ނުޖެހޭނެއެވެ. އަދި ބާޒާރުކޮށް ނިމިގެން އަންނައިރު ކޮތަޅުތައް އަތުގައި ގިނަވެގެން އުޅޭކަށްވެސް ނުޖެހޭނެއެވެ. އެހެންކަމުން މިއީ ޕްލާސްޓިކަށް ނޫނެކޭ ބުނުމަށް ކުރަން އެންމެ މުހިންމު އެއްކަމެވެ.

advertisement

ވިޔަފާރިވެރިންގެ ހައިސިއްޔަތުން ޕްލާސްޓިކް ކޮތަޅަށް ތަކެތި އަޅަން ބޭނުންވާ ފަރާތްތަކަށް ވަކި އަދަދެއް ޗާޖު ކުރެވިދާނެއެވެ. މިއީ މިހާރުވެސް ބައެއް ތަންތަނުން ކުރަމުން އަންނަކަމެކެވެ. އެއިރުން ކަސްޓަމަރުން އަމިއްލަ ކޮތަޅު ގެނައުމަށް އެދަނީ ބާރު އެޅިގެންނެވެ.

ޕްލާސްޓިކް ކޮތަޅު ނެތި ފަނާވެގެން ދިއުމަށް ގިނަ އަހަރުތަކެއް ނަގައެވެ. އަދި މި ޕްލާސްޓިކް ކަނޑަށް އެޅުމުގެ ސަބަބުން ކަނޑުގެ ދިރުންތަކަށް އޭގެ ނޭދެވޭ އަސަރުކުރެއެވެ. އެހެންކަމުން ރާއްޖެ ފަދަ ޤައުމަކުން ޕްލާސްޓިކް ބޭނުންކުރުން މަދުކުރުމަކީ ވަރަށް މުހިންމުކަމެކެވެ. ސަރުކާރުން މިހާރު ވަނީ ޕްލާސްޓިކް މަދުކުރުމުގެ މަސައްކަތްތަކެއްވެސް ފަށާފައެވެ. އެގޮތުން ބައެއް ބާވަތްތަކުގެ ޕްލާސްޓިކް މަރުހަލާތަކަކަށް ބަހާލައިގެން ރާއްޖެ އެތެރެކުރުން މިހާރު އަންނަނީ މަނާކުރަމުންނެވެ. މީގެތެރޭގައި ޕްލާސްޓިކް ތަށި، ސަމުސާ އޫ، ފެންފުޅި ފަދަ ތަކެތި ހިމެނެއެވެ.