ރާއްޖޭގައި އަމިއްލަ ދަރީންނާއި އެހެންމީހުންގެ ދަރީންނާ އަޅާ ކިޔުން ހުއްޓާލަން ޖެހޭ

ކޮންމެ ކުއްޖަކީވެސް ތަފާތު ކުއްޖެކެވެ. ކޮންމެ ކުއްޖެއްގެވެސް ހާއްސަ ސިފަތަކެއް ހުންނާނެއެވެ. އެއްކުއްޖަކު އަނެއްކުއްޖަކާއި ތަފާތު ތަކެއް ހުންނާނެއެވެ. އެއްބަނޑު އެއްބަފާ 2 ކުދިން ކަމުގައިވީނަމަވެސް 2 ކުދިންގެ ފަރަގު ތަފާތުވާނެއެވެ. ނަމަވެސް ބައެއް ބެލެނިވެރިންނަށް ކުރެވޭ ނޭދެވޭ ކަމަކީ އެއްކުއްޖަކު އަނެއްކުއްޖަކާއި އަޅާކިޔުމެވެ. ގޭތެރެއިންވިއަސް އަދި މުޖްތަމައުގެ ތެރެއިން ވިއަސް އެއްކުއްޖަކު އަނެއްކުއްޖަކާއި އަޅާކިޔޭތަން ފެނިގެންދެއެވެ.

އެކުއްޖަކު އަނެއްކުއްޖަކާއި އަޅާކިޔުމަކީ ރަނގަޅުގޮތެއް ނޫނެވެ. މީގެ ސަބަބުން ކުއްޖާއަށްވެސް ނޭދެވޭ އަސަރުތަކެއް ކުރާނެއެވެ. ތިމާގެ ދަރިފުޅު އެހެންކުއްޖަކާއި އަޅާކިޔުމަކީ ތިމާއަށްވެސް އަދި ދަރިފުޅަށްވެސް އޭގެ ސަބަބުން ސްޓްރެސް ލިބިގެންދާނެކަމެކެވެ. އެހެންމީހެއްގެ ދަރިއަކަށް ކުރެވޭކަމެއް ތިމާގެ ދަރިފުޅަށް ނުކުރެވިދާނެއެވެ. ނަމަވެސް އޭގެބަދަލުގައި އެހެން ކަމަކަށް ތިމާގެ ދަރިފުޅު މޮޅުވެދާނެއެވެ. ނަމަވެސް އެހެންކުއްޖަކާއި ތިމާގެ ދަރިފުޅު އަޅާކިޔާނަމަ ތިމާއަށްވެސް އަދި ދަރިފުޅަށްވެސް ލިބެން އޮތީ ގެއްލުމެވެ.

advertisement

ގުޅުމަށް ބުރޫއެރުން

އަޅާކިޔާނަމަ ބެލެނިވެރިޔާއާއި ކުއްޖާއާއިދެމެދު އޮންނަ ގުޅުމަށް ބުރޫއަރައިގެން ހިނގައިދާނެއެވެ. ކުއްޖާއަށް އިހްސާސްކުރެވޭނީ ކުއްޖާއަކީ މުހިންމު މީހެއްނޫންކަމާއި އޭނާއާއިމެދު އެއްވެސް އިތުބާރެއްނެތްކަމަށެވެ.

ކުރިމަގަށް އެޅޭ ހުރަހެއް

އަޅާކިޔުމަކީ އެކުދިންގެ ކުރިއެރުމަށް އެޅޭ ހުރަހެކެވެ. މީގެ ސަބަބުން އެ ކުދިންގެ ހުރި ހުނަރުތައް ދެނެގަތުމަށް ހުރަސްއެޅިގެންދާނެއެވެ. ކުއްޖާއަށް ވަކި ކަމަކަށް ބާރުއެޅުމަކީ ކުއްޖާގެ ފޮރުވިފައިވާ ހުނަރުތައް ދެނެގަތުމަށް އެޅޭ ހުރަހެކެވެ. ނަމަވެސް ކޮންމެ ކުއްޖަކީވެސް ވަކި ކަމަކަށް މޮޅި ކުއްޖަކަށްވާނެއެވެ. އެހެންކަމުން ވަކި ކަމަކަށް ބާރު އެޅުމުގެ ބަދަލުގައި ކުއްޖާގެ ހުނަރުތައް ދެނެގަތުމަކީ މުހިންމު ކަމެކެވެ.

ކޮންމެ ކުއްޖެއްގެވެސް ވަކި ހުނަރުތަކެއް ހުންނާނެކަމަށް ބެލެނިވެރިން ޤަބޫލުކުރަންޖެހެއެވެ. އެހެންކަމުން އެކުދިންގެ ހުރި ހުނަރުތައް ދެނެގަނެ އެކަންކަން ތަރައްޤީކުރުމަށް ބާރުއަޅަންޖެހެއެވެ.