ޑްރަގް އެޑިކްޝަން އަށް ފަރުވާ ދެންވީ ބައްޔެއްގެ ގޮތުގައި، ގާނޫނީ ކުށެއްގެ ގޮތުގައެއް ނޫން

2016 ވަނަ އަހަރު ޔުނައިޓެޑް ނޭޝަންސް ޖެނެރަލް އެސެންބްލީ ސްޕެސިއަލް ސެޝަން އޮން ޑްރަގްސްއިން ނެރުނު ޑޮކިއުމަންޓްގައިވާގޮތުން މަސްތުވާތަކެއްޗަށް ދެވިހިފުމުގެ މައްސަލައަށް ފަރުވާކުރަންޖެހޭނީ ސިއްހީ މައްސަލައެއްގެ ގޮތުގައެވެ. މި ޑޮކިއުމަންޓް މެންބަރު 193 ޤައުމަކުން ވަނީ އެޕްރޫވްކޮށްފައެވެ. 

މި ޑޮކިއުމަންޓްގައިވާގޮތުން މަސްތުވާތަކެއްޗަށް ދެވިހިފާފައިވާ މީހަކު ކުއްވެރިއެއްގެ ގޮތުގައި ބަލައިގެން ފަރުވާދީގެން ނުވާނެއެވެ. އޭގެބަދަލުގައި އެމީހުން ބަލަންޖެހޭނީ އަދި ފަރުވާ ކުރަންޖެހޭނީ ސިއްހީ މައްސަލައެއްގެ ގޮތުގައެވެ. 

advertisement

ރިޕޯޓްތަކުން ދައްކާގޮތުން މަސްތުވާތަކެއްޗަށް ދެވިހިފާފައިވާ މީހުން ރަނގަޅު ފަރުވާއާއިއެކު އެކަމުން ސަލާމަތްކުރެވެއެވެ. ބޭނުންވަނީ އެމީހުންނަށް ފޯރުކޮށްދޭންޖެހޭ ރަނގަޅު ފަރުވާއެވެ. އަދި މިކަމުގައި ބޭނުންކުރަންވާނީ އެވިޑެންސް ބޭސްޑް ޕްރިވެންޝަންކަމަށް ވަނީ ބުނެފައެވެ. 

އިއްޔެ ރައްޔިތުންގެ މަޖިލީހުގައި ވާހަކަދައްކަވަމުން ހެލްތް މިނިސްޓަރ އަޙްމަދު ނަސީމް ވިދާޅުވީ، ރާއްޖޭގައި ބޭނުންކުރާ މަސްތުވާތަކެތީގެ ބާވަތްތަކުގެ އަދަދު ވެސް ވަރަށް ބޮޑަށް އިތުރު، ކަމަށާއި، “މެތު” ފަދަ ބާވަތްތައް ހިލޭ ލިބެން ހުންނަ ކަމަށެވެ.

“ގިނަ އެއްޗެހި މިހާރު އަންނަނީ ޔޫރަޕުގެ ގައުމުތަކުން. މި އަންނަނީ މެތު މިތަނުން މި ލިބެނީ ހަމަ ހިލޭ. އެ ކޮންތާކުން ކަމެއް ސަޕްލައިކޮށްގެން އުޅެނީ އަޅުގަނޑަކަށް ނޭނގެ” މިނިސްޓަރު ނަސީމް ވިދާޅުވިއެވެ.

މީގެ ދިހަ ވަރަކަށް އަހަރު ކުރީގެ ރާއްޖޭގައި ބޭނުންކުރާ މަސްތުވާތަކެތީގެ ބާވަތްތަކާއި މިހާރު ބޭނުންކުރާ ތަކެއްޗާވެސް ތަފާތުކަމަށް ހެލްތް މިނިސްޓްރީން ވިދާޅުވެއެވެ. ކުރިން ބޭނުންކުރަނީ ގުދުރަތީ ބާވަތްތައް ނަމަވެސް މިހާރު ގިނައިން ބޭނުންކުރަނީ ކެމިކަލް ބާވަތްތައް ކަމަށް އެ މިނިސްޓްރީން ވިދާޅުވެއެވެ.