ރާއްޖޭގައި އުމުރާއި އެއްވަރަށް އިސްކޮޅު ދިގުނުވާ ކުޑަކުދިންގެ އަދަދު އިތުރު

ރާއްޖޭގައި އުމުރާއި އެއްވަރަށް އިސްކޮޅު ދިގުނުވާ ކުޑަކުދިންގެ އަދަދު އިތުރުކަމަށް ތަފާސްހިސާބުތަކުން ދައްކައެވެ.

އުމުރާ އެއްވަރަށް އިސްކޮޅު ދިގުނުވުމަކީ ހަށިގަނޑަށް ލިބެންޖެހޭ ނިއުޓްރިޝަން ދިގުމުއްދަތަކަށް ނުލިބުމުގެ ސަބަބުން ދިމާވާ މައްސަލައެކެވެ. ޑިމޮގްރަފިކް ހެލްތް ސަރވޭ 2017 އިން ދައްކާގޮތުން ރާއްޖޭގައި ކޮންމެ 100 ކުއްޖަކުން 15 ކުއްޖަކަށް ވަނީ މި މައްސަލަދިމާވެފައެވެ. މާނައަކީ ކޮންމެ 100 ކުއްޖަކުން 15 ކުއްޖަކު ވަނީ އުމުރާއި އެއްވަރަށް އިސްކޮޅު ދިގުނުވެއެވެ.

advertisement

މި ދިރާސާއިން ދައްކާގޮތުން 2009 ވަނަ އަހަރު %19 ކުދިން ވަނީ އުމުރާ އެއްވަރަށް އިސްކޮޅު ދިގުނުވެއެވެ. އަދި 2017 ވަނަ އަހަރު މި އަދަދު އުޅެނީ %15 ގައެވެ.

އުމުރާ އެއްވަރަށް ބަރުނުވުން ނުވަތަ އިސްކޮޅާއި އެއްވަރަށް ބަރުނުވުމަކީވެސް ގިނަ ކުޑަކުދިންނަށް ދިމާވާ މައްސަލައެކެވެ. ދިރާސާއިން ދައްކާގޮތުން 2009 ވަނަ އަހަރު އިސްކޮޅާ އެއްވަރަށް ބަރުނުވާ ކުދިންގެ އަދަދަކީ %11 އެވެ. އަދި 2017 ވަނަ އަހަރު މި އަދަދު އުޅެނީ %9 ގައެވެ.

އުމުރާ އެއްވަރަށް ބަރުނުވާ ކުދިންގެ ނިސްބަތްވެސް ރާއްޖޭގައި ގިނަކަމަށް ތަފާސްހިސާބުތަކުން ދައްކައެވެ. އެގޮތުން 2009 ވަނަ އަހަރު %17 ކުދިންނަކީ އެކަށީގެންވާ ވަރަށް ބަރުނޫންކުދިންނެވެ. އަދި 2017 ވަނަ އަހަރު މިއަދަދު އުޅެނީ %15 ގައެވެ.