ކުލި ބޮޑުވާ ވަރަށް މުސާރަ ބޮޑެއް ނުވޭ

ބޯހިޔާވަހިކަމުގެ މައްސަލައަކީ ރާއްޖެއަށް ދިމާވެފައިވާ އެންމެ ބޮޑު އެއް މައްސަލައެކެވެ. ޒަރޫރީ ގިނަ ޙިދުމަތްތައް އަތޮޅުތެރޭގެ ރަށްރަށުން ލިބެން ނެތުމުގެ ސަބަބުން ގިނަ މީހުން ވަނީ މާލެއަށް ތޮއްޖެހިފައެވެ. މީގެ ސަބަބުން މާލޭގެ އެޕާޓްމަންޓްތަކުގެ އަގުތައް ވަނީ އަތްނުފޯރާ ފަށައް މަތިވެފައެވެ.

އެޕާޓްމަންޓްތަކުގެ ކުލި ހައްތަހާވެސް ވަނީ ބޮޑެވެ. މާލޭގައި 1 ކޮޓަރީގެ އެޕާޓްމަންޓްތަކުގެ އަގުތައްވެސް އުޅެނީ 10،000 އިން މަތީގައެވެ. ނަމަވެސް ކުލި ބޮޑުވާ ވަރަށް މީހުންގެ މުސާރައެއް ބޮޑެއް ނުވެއެވެ. އެހެންކަމުން ކުލިތަކާއި އެހެނިހެން ބިލްތައް ދެއްކުމަށްފަހު ޒަރޫރީ އެހެނިހެން ކަންކަމަށް ހަރަދުކުރުން ވެފައިވަނީ ދަތިކަމަކަށެވެ. ކުލި ދެއްކުމަށްފަހު އެހެންކަމެއް ކުރަން ގިނަ މީހުންގެ އަތުގައި ފައިސާއެއް ނުހުރެއެވެ. އެންމެ ކުޑަމިނުން ސިއްހަތައް ފައިދާހުރި ކާނާއެއް ކާލުމަށްވެސް ގިނަ މީހުންގެ އަތުގައި ފައިސާއެއް ނުހުރެއެވެ.

advertisement

 މީގެ ސަބަބުން ލޯނު ނަގައި ދަރާ ވިކޭ މަންޒަރު ފެނިގެންދެއެވެ. އާއިލީ ގިނަ މައްސަލަތަކާއި އިޖްތިމާއީ މައްސަލަތައް ދިމާވެއެވެ.

ރާއްޖޭގައި އެކަށީގެންވާ ބޯހިޔާވަހިކަމުގެ ނިޒާމެއް ޤާއިމްކުރަންޖެހެއެވެ. މާލެ ސަރަހައްދަށް އަމާޒުކޮށްގެން އެންމެ ފަހުން ހިންގި ހިޔާ މަޝްރޫއަކީ މިކަމަށް ހައްލު ގެނުވާނެ ކަމެއްކަމަށް އެއްބަޔަކު ބުނާއިރު މި މަޝްރޫއާއަކީވެސް މީހުން އަޅުވެތިކުރަން ކުރިއަށްގެންދިޔަ މަޝްރޫއެއްކަމަށް ބައެއް މީހުން ބުނެއެވެ.

އަތޮޅުތެރޭގެ ރަށްރަށުގައިވެސް ބޯހިޔާވަހިކަން ނުލިބިފައިތިބި މީހުން ގިނައެވެ. އެގޮތުން ގެވަޅު ދޫކުރާއިރުވެސް ޝަރުތުތައް ކަނޑައަޅާފައިވާ ގޮތުން ގިނަ މީހުން އަންނަނީ ކަންބޮޑުވުން ފާޅުކުރަމުންނެވެ. އެގޮތުން ދަރިން ތިބޭ މީހުންނަށް އަންނަނީ އިސްކަން ދެމުންނެވެ. ކައިވެނިކޮށްގެން 10 ނުވަތަ 12 އަހަރު ވެފައިވާ މީހުންވެސް އެމީހުންގެ ދަރިއަކު ނެތްނަމަ ބޯހިޔާވަހިކަމުން މަޙްރޫމުވެއެވެ. މިއީ ވަރަށް ދެރަކަމެއްކަމަށް ގިނަ ބަޔަކު ބުނެއެވެ. ސަބަބަކީ ދަރިއަކު ނެތުމަކީ ބޯހިޔާވަހިކަމުން މަޙްރޫމްވާންޖެހޭ ކަމެއްކަމަށް ނުބެލެވުމެވެ.