ޓީޗަރުން ވާންވާނީ ކުދިންނަށް ރަނގަޅު ނަމޫނާ ދައްކާ ބަޔަކަށް

ސްކޫލް ދައުރަކީ ހަޔާތުގެ ވަރަށް އުފާވެރި ދުވަސްތަކެކެވެ. ސްކޫލް ދައުރުގައި ލިބޭ ރަހުމަތްތެރިންނާއި ސްކޫލް މާހައުލުގެ ހަނދާންތަކަކީ އަބަދުވެސް ހަނދާނުގައި ހުންނަ ފޮނި ހަނދާންތަކެކެވެ. ސާނަވީ ތައުލީމުން ފެށިގެން މަތީ ސާނަވީ ތައުލީމާއި އެހެނިހެން ކިޔެވުމުގެ ހަޔާތުގައިވެސް ގިނަ ބަޔަކާއި ބައްދަލުވެ ގިނަ ކަންކަން ދަސްވެގެން ދެއެވެ.

ސްކޫލް ދައުރުގައި ކުއްޖެއްގެ ދިރިއުޅުމުގައި އެންމެ މުހިންމު އެއްބަޔަކަށް ވާނީ ޓީޗަރުންނެވެ. ޓީޗަރުންނަކީ ކުދިންގެ 2 ވަނަ ބެލެނިވެރިންނޭ ބުނަނީ އެހެންވެގެންނެވެ. ގޭތެރޭގެ މާހައުލުގެ އިތުރުން ކުދިން ދެން އެންމެ ގިނައިން ވަގުތު ހޭދަކުރަނީ ސްކޫލް މާހައުލުގައެވެ. އެހެންކަމުން ޓީޗަރުންގެ ފުށުން ކުދިން ގިނަ ކަންކަން ދަސްކުރެއެވެ.

advertisement

އެހެންކަމުން ޓީޗަރުން ވެފައިވަނީ ކުދިންގެ އަދި ޤައުމުގެ މުސްތަޤްބަލުގައި އަދި މާދަމާގެ ޖީލު ތަރުބިއްޔަތުކުރުމުގައި މުހިންމު ބަޔަކަށެވެ. އެހެންކަމުން ޓީޗަރުން ވާންވާނީ ކުދިންނާއި ވަރަށް ގުޅޭ އެކުދިން އިތުބާރުކުރާ ބަޔަކަށެވެ.

ގިނަ ކުދިންނަށް ޓީޗަރުންނާއި ގުޅިފައިވަނީ ވަރަށް ފޮނި ހަނދާންތަކެކެވެ. ގެއަށް އައިސްވެސް ގިނަފަހަރު ޓީޗަރުންގެ އުފާވެރި ވާހަކަތައް ދައްކައެވެ. މިވެނި އެވެނި ޓީޗަރެއްގެ ރަނގަޅު ވާހަކަދައްކައެވެ. ހަޤީގަތުގައި ޓީޗަރުން ވާންވާނީ ކުދިންނަށް ރަނގަޅު ނަމޫނާ ދައްކާ ބަޔަކަށެވެ. އަދި ގިނަ ޓީޗަރުންނަކީ މިފަދަ ޤައުމު ފަހުރުވެރިވާފަދަ ޓީޗަރުންނެވެ. ނަމަވެސް ބައެއް ފަހަރު މަދުން ނަމަވެސް ޓީޗަރުންގެ ފަރާތުން ކުދިންނަށް ފުރައްސާރައާއި މަލާމާތް ރައްދުވާ ފަހަރު އާދެއެވެ. ބައެއް ޓީޗަރުންގެ ސަބަބުން ކުދިންގެ ތައުލީމީ ހަޔާތް ހަލާކުވެގެންދާ ފަހަރުވެސް އާދެއެވެ.

ނަމަވެސް ކޮންމެ ޓީޗަރަކުވެސް ވިސްނަންވީ މިފަދަ މީހަކަށް ނުވުމަށެވެ. އެ ޓީޗަރަކީ ކުއްޖާގެ ދިރިއުޅުން އުޖާލާ ކޮށްދޭނެ އުފާވެރިކަން ގެނުވާނެ ޓީޗަރަކަށް ވުމަށެވެ.