ފަތުރުވެރި ކަމުގެ ދާއިރާގައި މަސައްކަތްކުރާ ދިވެހި އަންހެނުންގެ ނިސްބަތަކީ ހަމަ އެކަނި 3 އިންސައްތަ

ރާއްޖޭގެ އާބާދީގައި ވަޒީފާ އަދާކުރާ އަންހެނުންގެ ނިސްބަތް ވަރަށް ގިނައެވެ. އެކިއެކި އޮޕީސްތަކާއި ކުންފުނިތަކާއި އަދި ގޭގައި އަމިއްލައަށްވެސް އާމްދަނީ ލިބޭ އެކިއެކި މަސައްކަތްތައް އަންހެނުން އަންނަނީ ކުރަމުންނެވެ.

ނިސްބަތުން އަންހެނުން މަސައްކަތްކުރާ މިންވަރު އިތުރުވިނަމަވެސް ފަތުރުވެރިކަމުގެ ސިނާއަތުގައި މަސައްކަތްކުރާ އަންހެނުންގެ ނިސްބަތް ރާއްޖޭގައި ވަރަށް ބޮޑަށްވެސް ދަށެވެ. މޯލްޑިވްސް ސްޓެޓިސްޓިކް ބިއުރޯއިން އާންމުކޮށްފައިވާ ތަފާސްހިސާބުތައް ދައްކާގޮތުން ރިސޯޓްތަކުގައި މަސައްކަތްކުރާ ދިވެހި ފިރެހެނުންގެ ނިސްބަތަކީ %45 އެވެ. އަދި ދިވެހި އަންހެނުންގެ ނިސްބަތަކީ އެންމެ %3 އެވެ.

advertisement

މޯލްޑިވްސް ސްޓެޓިސްޓިކް ބިއުރޯއިން ކޮށްފައިވާ ދިރާސާއަކުން ދައްކާގޮތުގައި ރިސޯޓްތަކުގައި މަސައްކަތްކުރާ އަންހެނުންގެ ނިސްބަތް ދަށީ ރިސޯޓްތަކުގައި އަންހެނުން މަސައްކަތްކުރުމާއިމެދު ޒަމާންތަކެއް ވަންދެން މުޖްތަމައު ދެކެމުން އަންނަ ގޮތުގެ ސަބަބުންނެވެ. މީގެ އިތުރުން އަންހެނުންނަކީ އާއިލާގެ ކަންކަން ބެލެހެއްޓުމުގައި އެންމެ ބޮޑު ޒިންމާއެއް އަދާކުރާ ބަޔެއްގެ ގޮތުގައި ދެކެމުން އައުމަކީވެސް ރިސޯޓްތަކުގައި މަސައްކަތްކުރާ އަންހެނުންގެ ނިސްބަތް ދަށްވުމުގެ ސަބަބެއްކަމަށް ދިރާސާގައި ވަނީ ބުނެފައެވެ.

އާއިލާ ބެލެހެއްޓުމުގެ ޒިންމާ އަންހެނުން އުފުލަން ޖެހުމުގެ ސަބަބުން ރަށާއި ވަކިން އެހެން ރަށެއްގައި ވަޒީފާ އަދާކުރުމަކީ އަންހެނުންނަށް އުނދަގޫ ކަމަކަށްވަނީ ވެފައެވެ. އަދި ގިނަ ރިސޯޓްތަކުގެ މާހައުލަކީވެސް އަދި ވަޒީފާއަށް ނަގާއިރުވެސް ދިވެހި އަންހެނުންނަށް ބައެއް ރިސޯޓްތަކުން އިސްކަމެއް ނުދެއެވެ. މިއީވެސް މިދާއިރާގައި އަންހެނުންގެ ހިއްސާ ދަށްކަމެއްކަމަށް ދިރާސާގައި ވަނީ ބުނެފައެވެ.