ނޫސްވެރިންނަށް މިނިވަންކަމެއް ނެތް

ނޫސްވެރިންނަށް އޮތް މިނިވަންކަން އަނެއްކާވެސް ފަހަށްޖެހެފިއެވެ.

ފިޔަވަތީގައި އުޅޭ ކުދިންގެ ހައްޤުގައި ބޭއްވި މުޒާހަރާ ކަވަރކުރި ނޫސްވެރިންނަށް އަނިޔާކުރާ ފޮޓޯތަކެއް ހިއްސާކޮށް ރައިޒް އަޕް އެމްވީއިން ބުނެފައިވަނީ ފުލުހުން އަނެއްކާވެސް ދިވެހި ނޫސްވެރިންނަށް ހަރުކަށިކޮށް އަމަލުކޮށްފައިވާކަމަށެވެ. މި ފޮޓޯތަކުގައި ނޫސްވެރިން މަގުމައްޗަށް ވައްޓާލާ އަދި އަނިޔާވެފައިވާ މަންޒަރު ފެނެއެވެ.

advertisement

ރައިޒް އަޕް އެމްވީއިން ބުނެފައިވަނީ ފިޔަވަތީގައި އުޅޭ ކުދިންގެ ހައްޤުތައް ކަށަވަރުވަންދެން މުޒާހަރާ ކުރާނެކަމަށެވެ. އަދި އެކުދިންނަށް އަނިޔާ ލިބޭ މަންޒަރު ބަލަން ނުތިބޭނެކަމަށް ވަނީ ބުނެފައެވެ.

މިއަހަރުގެ ބައިނަލްއަގްވާމީ ޑިމޮކްރަސީގެ ދުވަހުގެ މުނާސަބަތުގައި ދެއްވި ހާއްސަ ހިތާބުގައި ރައީސް ވިދާޅުވީ، ދައުލަތުން ކުރާ ކަންކަމަށް ފާޑުކިޔައި، މިނިވަންކަމާ އެކު ހިޔާލު ފާޅުކުރާ އެއްވެސް މީހަކަށް ސަރުކާރުން ހުރަހެއް ނާޅާނެ ކަމަށެވެ. ގާނޫނުއަސާސީން ކަށަވަރުކޮށްދޭ ހިޔާލު ފާޅުކުރުމުގެ މިނިވަންކަމުގެ ހައްގަށް އަބަދު ވެސް ސަރުކާރުން އިހުތިރާމު ކުރާނެ ކަމަށާއި، ރައްޔިތުންނަށް ފުރިހަމަ އަށް އެ ހައްގު ލިބެދެވޭ ކަން ސަރުކާރުން ކަށަވަރުކުރާނެ ކަމަށް ރައީސް ވަނީ ވިދާޅުވެފައެވެ.

މި ސަރުކާރުން ވެރިކަމާއި ހަވާލުވުމަށްފަހު ރާއްޖެއަށް ނޫސްވެރިކަމުގެ މިނިވަންކަމުން ވަނީ ކުރިއެރުންތަކެއްވެސް ލިބިފައެވެ. އެގޮތުން ނޫސްވެރިކަމުގެ މިނިވަންކަމުގައި ރާއްޖެއަށް 7 ދަރަޖައިގެ ކުރިއެރުމެއްވެސް ލިބުނެވެ. މި ކުރިއެރުމާއިއެކު އެއިރު ރާއްޖެވަނީ ދުނިޔޭގެ ނޫސްވެރިކަމުގެ މިނިވަންކަމުގެ 72ވަނައަށް އަރާފައެވެ. 2018 ވަނަ އަހަރު ރާއްޖެ އޮތީ މިލިސްޓުގެ 120 ވަނައިގައެވެ. ނަމަވެސް ބައެއް ފަރާތްތަކުން މިހާރު ބުނަނީ ނޫސްވެރިކަމުގެ މިނިވަންކަމުން ރާއްޖެ އަނެއްކާވެސް ފަހަތައް ޖެހިފައިވާކަމަށެވެ.