ދިގު މުއްދަތައް ބޭސްކާމީހުންނަށް ދެން ބޭސް ދޫކުރާނީ 1 ފަހަރު

ދިގު މުއްދަތަށް ބޭސް ކާ މީހުންގެ ބޭސް ސިޓީއަށް، އަންނަ މަހުން ފެށިގެން ބޭސް ދޫކުރަނީ އެއް ފަހަރު ކަމަށް އާސަންދައިން ބުނެފިއެވެ.

ކޮވިޑް-19ގެ ހާލަތާއި ގުޅިގެން ދިގު މުއްދަތަކަށް ބޭސްކާ މީހުންގެ ބޭސް ސިޓީއަށް ދެފަހަރު ބޭސް ނެގޭ ގޮތަށް މިދިޔަ އަހަރު އާސަންދައިން އުސޫލެއް އެކުލަވާލިއެވެ. މިއީ އާންމުންނަށް އެއިރު ފަސޭހަކޮށްދިނުމަށް އާސަންދައިން އެކުލަވާލި އުސޫލެކެވެ.

advertisement

އާސަންދައިން ބުނީ، އަންނަ މަހުން ފެށިގެން އެ އުސޫލު ބަދަލު ކުރުމުން، ދެވަނަ ފަހަރަށް ބޭސް ނެގޭނީ ޑޮކްޓަރު އަލުން ބޭސް ސިޓީއެއް ލިޔެދިނުމުން ކަމަށެވެ. މިދިޔަ އަހަރު ބަދަލު ކުރި އުސޫލުތަކުގެ ތެރޭގައި އުފަންވާ ކުދިންނަށް 28 ދުވަސް ވުމަށް ފަހު ވެސް މަންމަގެ އައިޑީކާޑުން ހިދުމަތް ދެވޭނެ ގޮތް ހެދުން ހިމެނެއެވެ. ނަމަވެސް އަންނަ ނޮވެމްބަރުން ފެށިގެން އެ އުސޫލަށް ވެސް ބަދަލު އަންނާނެއެވެ.

އެހެންކަމުން ކުއްޖާއަށް 28 ދުވަސް ވުމުން އާސަންދަ ސްކީމްގެ ދަށުން ހިދުމަތް ލިބޭނީ ކުއްޖާގެ އައިޑީކާޑަށެވެ.

ހިދުމަތް ހޯދާއިރު އައިޑީކާޑު ފަދަ ތަކެތީގެ ކޮޕީއާއި ފޮޓޯއަށް އާސަންދައިގެ ދަށުން ހިދުމަތް ދިން ނަމަވެސް އެ ކުންފުނީގެ އުސޫލަކީ އެ ތަކެތީގެ އަސްލު ގެންދިއުމުން ހިދުމަތް ދިނުން ކަމަށް އާސަންދައިން ފާހަގަކުރިއެވެ.