މިނިމަމް ވޭޖް ކަނޑައެޅުން ލަސްވެއްޖެ!

އެންމެ ކުޑަ މުސާރައިގެ ގޮތުގައި ދޭނެ ވަރެއް، ކަނޑައެޅުން އިއްޔެއަށް ތާވަލް ކުރި ނަމަވެސް މިނިމަމް ވޭޖް ބޯޑު ބައްދަލުވުން މިއަދަށް ވަނީ ފަސްކޮށްފައެވެ.

މި ބައްދަލުވުން ބޭއްވުމަށް މިހާރު ހަމަޖައްސާފައިވަނީ މިއަދު މެންދުރު 2:00 ޖަހާއިރުއެވެ. ބައްދަލުވުން ފަސްކުރި ސަބަބެއް ހާމަނުކުރި ނަމަވެސް މިނިމަމް ވޭޖް ބޯޑުން ނިންމާ ނިންމުން ހިއްސާކުރާނީ އިކޮނޮމިކް މިނިސްޓްރީއާ އެވެ.

advertisement

ވަޒީފާއާ ބެހޭ ގާނޫނުގައިވާ ގޮތުން، މިނިމަމް ވޭޖް ކަނޑައަޅަން ޖެހޭނީ ވޭޖް ބޯޑުން ދޭ ލަފާގެ މަތިން އިކޮނޮމިކް މިނިސްޓަރެވެ. އެއީ މަސައްކަތްތެރިންނާއި ވަޒީފާ ދޭ ފަރާތްތައް ހިމެނޭ ގޮތަށް އުފައްދާފައިވާ މިނިވަން ބޯޑެކެވެ.

ސަރުކާރުން މިނިމަމް ވޭޖްގެ ގޮތުގައި ކަނޑައަޅާފައި އޮތް ސީލިންގަކީ 6،700ރ. އާއި 8،900ރ. އާ ދެމެދުގެ އަދަދެކެވެ. މީގެ ކުރިން އިކޮނޮމިކް މިނިސްޓާރު ފައްޔާޒު އިސްމާއިލް ވިދާޅުވީ، މިނިމަމް ވޭޖް ކަނޑައެޅުން ލަސްވަނީ، ވޭޖް ބޯޑުން ގޮތެއް ނިންމުން ލަސްވާތީ ކަމަށެވެ.

މިނިމަމް ވޭޖް ކަނޑައެޅުން ލަސްވާތީ މިކަމާއި ގުޅޭގޮތުން މަސައްކަތްތެރިން ދަނީ ކަންބޮޑުވުން ފާޅުކުރަމުންނެވެ.