އެންމެ ކޮރަޕްޝަން ގިނައީ ޕްރޮކިއުމެންޓު ކުރުމުގައި

އެންޓި ކޮރަޕްޝަން ކޮމިޝަނަށް ހުށައަޅާ މައްސަލަތަކުގެ ތެރެއިން އެންމެ ގިނައީ ޕްރޮކިއުމަންޓާއި ގުޅުންހުރި މައްސަލަތައްކަމަށް ތަފާސްހިސާބުތަކުން ދައްކައިފިއެވެ.

އޭސީސީއިން އާންމުކޮށްފައިވާ 2020 ވަނަ އަހަރުގެ ތަފާސްހިސާބުތައް ދައްކާގޮތުން 2020 ވަނަ އަހަރު އެ މުވައްސަސާއަށް މުޅި ޖުމްލަ 938 މައްސަލަ ވަނީ ހުށައަޅާފައެވެ. މީގެތެރެއިން 427 މައްސަލަ ވަނީ ނިންމާފައެވެ.

advertisement

2020 ވަނަ އަހަރު އޭސީސީއަށް ހުށައެޅުނު މައްސަލަތަކުގެ ތެރޭގައި އެންމެ ގިނައީ ޕްރޮކިއުމަންޓްއާއި ގުޅުންހުރި މައްސަލަތަކެވެ. މިދިޔަ އަހަރުގެ ތެރޭގައި ޕްރޮކިއުމަންޓާއި ގުޅުންހުރި 376 މައްސަލަ އޭސީސީއަށް ވަނީ ހުށައަޅާފައެވެ. މީގެތެރެއިން 176 މައްސަލަ ނިންމާފައިވާކަމަށް ތަފާސްހިސާބުތަކުން ދައްކައެވެ.

އެއްމަހެއްގެ ތެރޭގައި އެންމެ ގިނަ ޕްރޮކިއުމަންޓާއި ގުޅުންހުރި މައްސަލަ ހުށައަޅާފައިވަނީ މިދިޔަ އަހަރުގެ ސެޕްޓެމްބަރ މަހުގެ ތެރޭގައެވެ. އެމަހުގެ ތެރޭގައި 65 މައްސަލަ ވަނީ ހުށައަޅާފައެވެ. އަދި އެމަހު 17 މައްސަލައެއް ވަނީ ނިންމާފައެވެ.

ޕްރޮކިއުމަންޓް މައްސަލަތައް ފިޔަވައި މިދިޔަ އަހަރު ދެން އެންމެ ގިނައިން އޭސީސީއަށް ހުށައަޅާފައިވަނީ ވަޒީފާއާއި ގުޅުންހުރި މައްސަލަތަކެވެ. އެގޮތުން މިދިޔަ އަހަރުގެ ތެރޭގައި ވަޒީފާއާއި ގުޅުންހުރި 127 މައްސަލައެއް ވަނީ ހުށައަޅާފައެވެ. އަދި އޭގެތެރެއިން 82 މައްސަލައެއް ނިންމާފައިވާކަމަށް އޭސީސީގެ ތަފާސްހިސާބުތަކުން ދައްކައެވެ.