ހޫނު އިރު ވަރަށް ހޫނުގަދަަ، ވާރޭ ވެހޭއިރު ބޯކޮށް

ޓެކްނޮލޮޖީއާއިއެކު ދުނިޔެއަށް ގިނަ ބަދަލުތަކެއް ދަނީ އަންނަމުންނެވެ. އެގޮތުންވެސް އެންމެ ފާހަގަކޮށްލެވެނީ މޫސުމަށް އަންނަ ބަދަލުތަކެވެ. މޫސުމަށް އަންނަ ބަދަލުތަކުގެ ސަބަބުން ރާއްޖެ ފަދަ ޖަޒީރާ ރައްތަކަށް ލިބޭ ގެއްލުން ބޮޑެވެ. އެގޮތުން ރާއްޖޭގެ ރައްތައް ދިރިހުރުމާއި މޫސުމާއި ވަނީ ވަރަށް ބޮޑަށް ގުޅިލާމެހިފައެވެ.

މޫސުމަށް އަންނަ ބަދަލުތަކުގެ ސަބަބުން ހޫނު ދުވަސްވަރުގައި ހޫނުމިން މިހާރު ދަނީ ވަރަށް މަތިވަމުންނެވެ. އަދި ވާރޭވެހޭ ދުވަސްވަރުގައި ބޯކޮށް ވާރޭވެހުން ހިމެނެއެވެ. މިއީވެސް މޫސުމަށް އަންނަ ބަދަލުތަކުގެ ސަބަބުން ކުރިމަތިލާންޖެހޭ ކަންކަމެވެ.

advertisement

ރާއްޖޭގެ ކްލައިމެޓް ރިސްކް ޕްރޮފައިލްގައި ބުނެފައިވަނީ މޫސުމަށް އަންނަ ބަދަލުތައް ރާއްޖެއަށް ކުރަމުން އަންނަކަމަށެވެ. އެގޮތުން މާބޮޑަށް ހޫނުވުން މިހާރު ދިމާވާކަމަށެވެ. އެގޮތުން 1978 ވަނަ އަހަރުން ފެށިގެން 2018 ވަނަ އަހަރާއި ހަމައަށް 0.8 ޑިގްރީ ސެލްސިއަސްއަށް ހޫނުވެފައިވާކަމަށެވެ. 2090 ވަނަ އަހަރާއި ހަމައަށް 3.7 ޑިގްރީ ސެލްސިއަސްއަށް ހޫނުވާނެކަމަށް ލަފާކުރިނަމަވެސް މިހާރުވެސް ހޫނުމިން ހުރީ 3 ޑިގްރީ ސެލްސިއަސްއަށްކަމަށް ވަނީ ބުނެފައެވެ.

ދުނިޔެ ހޫނުވުމުގެ ސަބަބުން ކަނޑުގެ ލޮނުގަނޑު އުފުލެއެވެ. މީގެ ސަބަބުން ރާއްޖޭގެ ރައްތައް ގިރުމަށް މެދުވެރިވެއެވެ. މީގެ ސަބަބުން ދިވެހިންގެ ދިރިއުޅުމަށް ވަރަށް ބޮޑު އަސަރުތަކެއް ކުރާނެކަމަށް ވަނީ ބުނެފައެވެ.

ރާއްޖޭގެ އިޤްތިޞާދު އޭގެ މައްޗަށް ބަރޯސާވެފައިވާ ފަތުރުވެރިކަމަށްވެސް ރައްގިރުމުގެ ސަބަބުން އަސަރުކުރާނެކަމަށް  މި ރިޕޯޓުގައި ވަނީ ބުނެފައެވެ.