ކޮރަޕްޝަން އެންމެ ގިނަ ކަމަށް ދައްކަނީ ރަށު ކައުންސިލްތަކުގައި

ކޮރަޕްޝަންގެ މައްސަލަތައް އެންމެ ގިނައީ ރަށު ކައުންސިލްތަކުގައިކަމަށް އެންޓި ކޮރަޕްޝަން ކޮމިޝަންގެ ތަފާސްހިސާބުތަކުން ދައްކައިފިއެވެ.

އޭސީސީއިން އާންމުކޮށްފައިވާ 2020 ވަނަ އަހަރުގެ ތަފާސްހިސާބުތައް ދައްކާގޮތުން 2020 ވަނަ އަހަރު ރަޖިސްޓްރީ ކުރެވުނު މައްސަލަތައް ރައްދުވާ އިދާރާތަކަށް ބަލާއިރު އެންމެ ގިނަ މައްސަލަތައް ރައްދުވަނީ ރަށު ކައުންސިލްތަކަށެވެ. އެގޮތުން ކޮރަޕްޝަންގެ މުޅި ޖުމްލަ 243 މައްސަލައެއް ރަށު ކައުންސިލްތަކާއި ގުޅޭގޮތުން ވަނީ ހުށައަޅާފައެވެ. ދެން އެންމެ ގިނަ މައްސަލަ ހުށައަޅާފައިވަނީ ސަރުކާރު ހިއްސާވާ ކުންފުނިތަކާއި ގުޅޭގޮތުންނެވެ. އެއީ 204 މައްސަލައެވެ.

advertisement

2020 ވަނަ އަހަރު އޭސީސީއަށް މުޅި ޖުމްލަ 938 މައްސަލަ ވަނީ ހުށައަޅާފައެވެ. މީގެތެރެއިން 427 މައްސަލަ ވަނީ ނިންމާފައެވެ.

2020 ވަނަ އަހަރު އޭސީސީއަށް ހުށައެޅުނު މައްސަލަތަކުގެ ތެރޭގައި އެންމެ ގިނައީ ޕްރޮކިއުމަންޓްއާއި ގުޅުންހުރި މައްސަލަތަކެވެ. މިދިޔަ އަހަރުގެ ތެރޭގައި ޕްރޮކިއުމަންޓާއި ގުޅުންހުރި 376 މައްސަލަ އޭސީސީއަށް ވަނީ ހުށައަޅާފައެވެ. މީގެތެރެއިން 176 މައްސަލަ ނިންމާފައިވާކަމަށް ތަފާސްހިސާބުތަކުން ދައްކައެވެ.

ޕްރޮކިއުމަންޓް މައްސަލަތައް ފިޔަވައި މިދިޔަ އަހަރު ދެން އެންމެ ގިނައިން އޭސީސީއަށް ހުށައަޅާފައިވަނީ ވަޒީފާއާއި ގުޅުންހުރި މައްސަލަތަކެވެ. އެގޮތުން މިދިޔަ އަހަރުގެ ތެރޭގައި ވަޒީފާއާއި ގުޅުންހުރި 127 މައްސަލައެއް ވަނީ ހުށައަޅާފައެވެ. އަދި އޭގެތެރެއިން 82 މައްސަލައެއް ނިންމާފައިވާކަމަށް އޭސީސީގެ ތަފާސްހިސާބުތަކުން ދައްކައެވެ.